Puha Fehuʻi
◼ Ko e hā ʻoku totonu ai ke tau līpooti vave ʻetau ngāue fakamalangá ʻi he māhina taki tahá?
Ko e kotoa ʻo kitautolú ʻoku tau ongoʻi fiefia ʻi he taimi ʻoku tau fanongo ai ʻo fekauʻaki mo ha ngaahi meʻa lelei kuo fakahoko ʻi hono malangaʻi ʻa e pōpoaki ʻo e Puleʻangá. (Sio ki he Palovepi 25:25.) ʻOku fakamatalaʻi ʻe he Ngāue 2:41 (PM) hili ʻa e malanga fakaueʻiloto ʻa Pita ʻi he ʻaho ʻo e Penitekosí, “nae ului ae kakai e toko tolu afe nai.” ʻI ha taimi nounou ki mui mai, ko e fika ko iá naʻe tupu hake ki he “toko nima afe nai.” (Ng. 4:4) Ko ha fakaueʻiloto ē ʻa e fakamatala ko iá kuo pau naʻe hoko ki he kau Kalisitiane ʻi he ʻuluaki senitulí! ʻOku tau tali ʻi he founga tatau ki he ngaahi līpooti fakalototoʻa ʻi he ʻaho ní. ʻOku tau fiefialoto ke fanongo fekauʻaki mo e lavameʻa ʻoku hokosia ʻe hotau ngaahi tokouá ʻi hono malangaʻi ʻa e ongoongo leleí ʻi māmani lahi.
Koeʻuhi ko e taimi lahi ʻaupito mo e feinga ʻoku kau ʻi hono tānaki ʻa e ngaahi līpooti peheé, ʻoku mātuʻaki fiemaʻu ʻa e ngāue fakataha kotoa ʻa e kau malanga ʻo e Puleʻangá. ʻOkú ke tokanga fakamātoato fekauʻaki mo hono ʻave vave hoʻo līpootí he māhina taki taha?
Ko e līpooti ʻo e tupú ʻokú ne ʻomai kiate kitautolu ʻa e fiefia lahi. Tānaki atu ki ai, ko e ngaahi līpootí ʻoku tokoni ia ki he Sōsaietí ke vakaiʻi ʻa e fakalakalaka ʻo e ngāue ʻi māmani lahí. Kuo pau ke fai ʻa e ngaahi fakakaukau ki he ngaahi feituʻu ʻoku fiemaʻu lahi ange nai ai ʻa e tokoní pe ki he faʻahinga pea mo e lahi ʻo e ngaahi tohi ke faʻú. ʻOku ngāueʻaki ʻe he kau mātuʻa ʻi he fakatahaʻanga taki taha ʻa e ngaahi līpooti ngāue fakamalangá ke fakapapauʻi pe ko fē ʻe lava ke fai hano fakaleleiʻí. ʻOku fakatupu langa hake ʻa e ngaahi līpooti leleí, ʻo ueʻi kotoa ai kitautolu ke vakaiʻi ʻetau ngāue fakafaifekaú ki ha ngaahi fakaleleiʻi ʻe ala fai.
Ko e kotoa ʻo e kau malangá ʻoku fiemaʻu ke nau fakatokangaʻi honau fatongia tāutaha ke ʻomai vave ha līpooti ngāue fakamalanga ʻi he māhina taki taha. Ko e kau faiako ʻo e Ako Tohi ʻa e Fakatahaʻangá ʻoku nau ʻi ha tuʻunga lelei ke fakamanatu ki he kau malangá fekauʻaki mo e fatongia ko ʻení, koeʻuhi ʻoku nau tokanga foki ke fai ha tokoni fakafoʻituitui ki he faʻahinga ʻoku ʻi ai nai ha kiʻi faingataʻa ʻi he kau maʻu pē ki he ngāue fakamalangá ʻi he māhina taki taha. Ko e fakamanatu ko ʻení ʻe lava ke fai ia ʻi he ako tohi fakamuimui ʻo e māhina taki taha pe ʻi ha taimi feʻungamālie kehe. Kapau ʻoku ʻikai ke ʻi ai ha faingamālie ke ʻomai ʻa e ngaahi līpooti ngāue fakamalangá ki he Fale Fakatahaʻangá, ko e faiako ʻo e Ako Tohi ʻa e Fakatahaʻangá te ne lava ke tānaki kinautolu pea ʻave ia ki he sekelitalí ʻi he taimi totonu ke fakakau ʻi he līpooti fakamāhina tuʻumaʻu ʻa e fakatahaʻangá ki he Sōsaietí.
Ko ʻetau tōtōivi ʻi hono līpooti faitotonu mo vave ʻetau ngāue fakamalangá ʻokú ne ʻai ai ke maʻamaʻa ange ʻa e kavengá ki he kau faifatongia ko ia ki haʻatau lelei fakalaumālié.