“Langa Hao Fale”
1 ʻOku ʻikai toe fehuʻia, ʻi he anga-fakasivilaise kotoa pē ʻoku takatakai ʻi he māmaní, ko e moʻui fakafāmilí ʻoku vaivai ʻaupito. Ko e māmani ʻo Sētané ʻoku tofanga ʻi he taʻefaitotonu mo e ʻulungaanga taʻetaau. (1 Sione 5:19) ʻOku fakamamafaʻi mai heni ʻa e fakavavevave kiate kitautolu ke ‘langa hotau falé’ pea ke akoʻi ʻa e niʻihi kehé ki he founga te nau lava ke fai tatau pehē ki hoʻonautolú.—Pal. 24:3, 27.
2 Ko ha Maluʻi ʻa e Ngaahi Tefitoʻi Moʻoni ʻa e Tohitapú: Ko e kī ki he fāmili fiefia moʻoní ʻoku maʻu ia ʻi hono ngāueʻaki ʻa e ngaahi tefitoʻi moʻoni ʻa e Tohitapú. Ko e ngaahi moʻoni mālohi ko ʻení ʻoku ʻaonga ia ki he mēmipa kotoa pē ʻo e fāmilí ʻi he ngaahi tafaʻaki kotoa pē ʻo e moʻuí. Ko e fāmili ʻoku nau ngāueʻaki kinautolú te nau maʻu ʻa e fiefia pea te nau maʻu ʻa e melino fakaʻotuá.—Fakafehoanaki mo Aisea 32:17, 18.
3 Ko e ngaahi tefitoʻi moʻoni ʻe lava ke ne tokoniʻi kitautolu ke langa hake hotau falé, ʻoku hā pea fakamatalaʻi ia ʻi he tohi naʻa tau toki maʻu ʻi he lea faka-Tongá, Ko Hono ʻAi Hoʻo Moʻui Fakafāmilí ke Fiefia. Ko e vahe taki taha ʻoku ʻi ai ʻa e ngaahi fakamatala lahi ki he ngaahi konga tohi mei he Tohitapú ʻa ia ʻe ngāueʻaki ki he ngaahi tuʻunga kehekehe ʻi he fāmilí. ʻOku fakahanga ai heni ʻa e tokangá ki he ngaahi fakakaukau ʻa e ʻOtuá koeʻuhi ke tau maʻu ʻene fakakaukaú ʻi he kaveinga ʻoku fakamatalaʻí.—Ai. 48:17.
4 ʻAi ke alāanga mo e tohí. Ako ke ʻilo ʻa e ngaahi tefitoʻi moʻoni ʻe lava ke hoko ko ha tokoni ʻi he taimi ʻoku malanga hake ai ha ngaahi palopalema kehekehe. ʻOku fakamatalaʻi ʻe he tohí ʻa e ngaahi meʻa hangē ko ʻení: ko e meʻa ʻoku totonu ke sio ki ai ha taha ʻi he taimi ʻoku fakakaukau atu ai ke maʻu ha hoa mali (vahe 2), ngaahi meʻa tefito ʻe niʻihi ʻo hono kamata lelei ha nofo mali (vahe 3), ko e ngaahi ngafa ʻo e husepānití mo e uaifí (vahe 4, 5), ko e mahuʻinga taha ʻo e ʻofá (vahe 6), ko hono akoʻi ʻo e fānaú mei heʻenau kei taʻu iikí (vahe 9), founga ʻe lava ai ʻe he ongo mātuʻá ʻo ʻohake ʻena fānau tupú ke hoko ʻo lavameʻa, ko e kakai lalahi ʻoku manavahē-ʻOtua (vahe 10, 11), ko e tafaʻaki ʻe lava ke fai ʻe he kau talavoú ke fiefia ai ʻa e fāmilí (vahe 12), pea mo e founga ke hokohoko atu ai ha fiefia ʻa ha fāmili neongo ʻa e ʻi he tuʻunga taʻumotuʻá (vahe 13).
5 Ngāue Kakato ʻAki ʻa e Tohi Foʻoú: Kapau ʻoku teʻeki ai ke ke fai pehē, ko e hā ʻoku ʻikai te mou ako ai ʻa e tohi ko e Moʻui Fakafāmilí fakataha ko ha fāmilí? Pehē foki, ʻi he taimi pē ʻoku fehangahangai ai ho fāmilí mo ha ngaahi palopalema foʻou pe ngaahi tuʻunga faingataʻa, fakamanatu ʻa e ngaahi vahe ʻi he tohí ʻa ia ʻoku lave ki he ngaahi meʻa ko iá, pea fakakaukau faʻa lotu ki he founga ke ngāueʻaki ai ʻa e akonakí.
6 Ko e ngaahi fāmili ʻoku anga-līʻoa fakaʻotuá te nau hoko ʻo mālohi fakalaumālie mo fāʻūtaha pea te nau mateuteu lelei ke fehangahangai mo e ngaahi ʻohofi ʻa Sētané. (1 Tim. 4:7, 8; 1 Pita 5:8, 9) Ko ha fakamālō ē ka ko kitautolu ʻi heʻetau maʻu ʻa e fakahinohino fakaʻotua mei he Tupuʻanga ʻo e fāmilí!