Ngāue Lelei ʻAki ʻa e Tohi ko e ʻIlo
1 Ko Sihova ʻa e “Tokotaha ʻokú ne akoʻi ʻa e ʻilo ki he tangata.” (Sāme 94:10, NW) ʻOkú ne ngāueʻaki kitautolu ke fakamafola atu ʻa e ʻilo fakahaofi moʻui ʻo kau kiate iá ki he faʻahinga ʻoku nau taʻeʻilo ki he founga ke tauhi ai kiate ia ʻi he tuʻunga ʻokú ne hōifua ki aí. Ko e tohi ko e ʻIlo ʻA Ia ʻOku Taki Atu ki he Moʻui Taʻengatá ko ha meʻangāue lelei ia ʻe lava ke maʻu ai ʻe he faʻahinga loto-totonú ha ʻilo kānokano ʻo e ʻOtuá mei heʻene Folofola kuo tohí, ko e Tohitapú. (1 Tim. 2:3, 4) Ko e mahino mo e māʻalaʻala maeʻeeʻa ʻo e moʻoní ʻi he tohi ko e ʻIlo ʻe lava ke tokoniʻi ai ʻa e kakaí ke nau maʻu ʻa e meʻa ʻoku kumi ʻe Sihova ke akoʻi kiate kinautolú. Ke ngāue lelei ʻaki ia ʻi he māhina ko ʻení ʻoku fiemaʻu ke tau fakakau ʻa e kakaí ʻi he ngaahi fetalanoaʻaki ʻa ia te ne ueʻi ai kinautolu ke nau fie lau ʻa e tohí. Ko e ngaahi fokotuʻu ʻeni ʻe niʻihi. ʻI he ʻikai ke feinga ke maʻuloto kinautolú, feinga ke fakahā ʻa e ngaahi tefitoʻi fakakaukaú ʻi he lea pē ʻaʻau mo fakaenatula pē hono fai ʻo e fetalanoaʻakí.
2 Koeʻuhi ko e kakai tokolahi kuo mole atu ha faʻahinga naʻa nau ʻofa ai ʻi he maté, ʻe lava ke ke ngāueʻaki ʻa e ʻamanaki ki he toetuʻú ki ha fetalanoaʻaki ʻaki hoʻo ʻuluaki leaʻaki ha meʻa hangē ko ʻení:
◼ “Ko e tokolahi taha ʻo kitautolu kuo mole atu ha taha naʻa tau ʻofa ai ʻi he maté. Kuó ke fifili nai pe te ke toe sio ki he faʻahinga peheé? [Tuku ke ne tali.] Ko e maté naʻe ʻikai ko e konga ia ʻo e ʻuluaki taumuʻa ʻa e ʻOtuá ki he tangatá. Naʻe fakamoʻoniʻi ʻe Sīsū ko e faʻahinga naʻa tau ʻofa aí ʻe lava ke nau toetuʻu mai mei he maté. [Lau ʻa e Sione 11:11, 25, 44.] Neongo naʻe hoko ʻeni ʻi he ngaahi senituli ki muʻa atú, ʻoku fakahaaʻi ai ʻa e meʻa kuo talaʻofa ʻe he ʻOtuá te ne fai maʻatautolú. [Fakaava ʻa e tohi ʻIlo ki he fakatātā ʻi he peesi 85 pea lau ʻa e fakamatala ʻi he fakatātaá. Fakahā ange leva ʻa e fakatātā ʻi he peesi 86 pea fakamatalaʻi ia.] Kapau te ke saiʻia ke ʻilo lahi ange fekauʻaki mo e ʻamanaki fakafiemālie ko ʻeni ʻo e toetuʻú, te u saiʻia ke tuku atu ʻa e tohí ni maʻau.”
3 ʻI he hili ʻa e ʻuluaki fetalanoaʻaki fekauʻaki mo e ʻamanaki ʻo e toetuʻú, ʻe lava ke ke kamata ʻa e fetalanoaʻaki hono hoko mo e tokotaha tatau pē ʻi he founga ko ʻení:
◼ “ʻOkú ke manatuʻi nai ʻeku pehē ko ia ko e maté naʻe ʻikai ko e konga ia ʻo e ʻuluaki taumuʻa ʻa e ʻOtuá ki he tangatá. Kapau ʻoku moʻoni ia, ko e hā ʻoku tau motuʻa ai pea maté? ʻOku moʻui ʻa e fonu ia ʻe niʻihi ʻo laka hake ʻi he taʻu ʻe 100, pea ʻi ai mo e ngaahi ʻuluʻakau ia kuo nau moʻui mai ʻi he ngaahi taʻu ʻe laui afe. Ko e hā hono ʻuhinga ʻoku moʻui ai pē ʻa e faʻahinga ʻo e tangatá ia ʻo taʻu pē ʻe 70 pe 80? [Tuku ke ne tali.] ʻOku tau maté koeʻuhi ko e ʻuluaki ongo mātuʻa ʻi he faʻahinga ʻo e tangatá naʻá na talangataʻa ki he ʻOtuá.” Lau ʻa e Loma 5:12. Huke ki he peesi 53 ʻi he tohi ko e ʻIlo pea lau ʻa e kaveinga ʻo e vahé. Vakai ki he ʻuluaki palakalafi ʻe tolú, lave ki he ngaahi tali ki he ngaahi fehuʻi kuo pulusí. Fai ha fokotuʻutuʻu ke toe ʻaʻahi atu ʻamui ange ke fakamatalaʻi ʻa e toenga ʻo e vahé. Fakalototoʻaʻi ʻa e tokotahá ke ne lau fakaʻosi ia ʻi he vahaʻa taimi ko iá.
4 Kapau te ke lea ki ha taha ʻoku hā ngalingali ko ha tokotaha lotu, te ke pehē nai:
◼ “Ko hono moʻoní, ʻoku ʻi ai ʻa e ngaahi lotu kehekehe ʻe laui teau ʻi he ʻahó ni. ʻOku nau akoʻi ʻa e ngaahi tui fepakipaki kotoa pē. Ko e kakai ʻe niʻihi ʻoku nau pehē, ʻoku lelei ʻa e ngaahi lotu kotoa pē, pea ʻoku ʻikai ha faikehekehe ʻi he meʻa ʻoku tau tui ki aí. Ko e hā hoʻo fakakaukaú? [Tuku ke ne tali.] Naʻe akoʻi ʻe Sīsū ʻa e lotu moʻoní peá ne fakahaaʻi ai ko e ngaahi founga-lotu ʻe niʻihi ʻoku ʻikai fakahōifua ki he ʻOtuá. [Lau ʻa e Mātiu 7:21-23.] Kapau ʻoku tau fiemaʻu ke fakahōifuaʻi ʻa e ʻOtuá, kuo pau ke tau lotu kiate ia ʻo fakatatau ki hono finangaló.” Fakaava ʻa e tohi ʻIlo ki he vahe 5, lau ʻa e kaveingá, pea lave ki he ngaahi kaveinga tokoni ʻe niʻihi. Fakamatalaʻi ko e fakamatala ko ʻení ʻe tokoni ia ki ha taha ke ako ai ki he founga ke fakahōifua ki he ʻOtuá. Tuʻuaki ke tuku ʻa e tohí kapau ʻokú ne palōmesi mai te ne lau ia, pea lave ai ʻokú ke tali ha tokoni ki heʻetau ngāue ʻi māmani lahí.
5 Ko e kakai ʻoku nau puputuʻu koeʻuhi ko e lahi ʻa e ngaahi lotú te nau mahuʻingaʻia nai ʻi he tali ki he fehuʻi ko ʻení ʻi haʻo toe ʻaʻahi atu:
◼ “Koeʻuhi ko e lahi ʻaupito ʻa e ngaahi lotu kehekehe ʻi he ʻaho ní, ʻe lava fēfē ke tau ʻilo pe ko fē ʻa e lotu moʻoní? Te ke fakapapauʻi fēfē ia? [Tuku ke ne tali.] Naʻe talamai ʻe Sīsū kiate kitautolu ʻa e founga ke ʻilo ai ʻa hono kau muimui moʻoní.” Lau ʻa e Sione 13:35. Vakai ki he palakalafi 18 mo e 19 ʻi he vahe 5 ʻo e tohi ʻIlo. Lave ki ai ʻo pehē ʻi hono ngāueʻaki ʻa e ngaahi tataki Fakatohitapú ni mo e founga ko hono fakapapauʻí, ʻe lava ai ʻe ha taha ke ne ʻilo ʻa e lotu moʻoní. Lave ki he founga ʻoku ʻiloa ai ʻi māmani lahi ʻa e Kau Fakamoʻoni ʻa Sihová koeʻuhi ko ʻenau ʻofa moʻoní pea mo honau ngaahi tuʻunga māʻolunga fakaeʻulungaangá. Fakamatalaʻi ʻa e founga ʻo ha ako ʻo e Tohitapú, ʻo ngāueʻaki ʻa e tohi ko e ʻIlo, te ne malava ke fakapapauʻi mahino ai ʻa e founga-lotu ʻoku hōifua ai ʻa e ʻOtuá.
6 Kapau te ke fetaulaki mo ha mātuʻa, ʻe ola lelei nai ʻa e fakalea ko ʻení:
◼ “ʻI he ʻaho kotoa pē, ʻoku tau fanongo ai ʻi he ngaahi līpooti fekauʻaki mo e ʻulungaanga puleʻingataʻa ʻo e kau talavou ʻa ia ʻoku hā ngali ʻoku ʻikai te nau fakamahuʻingaʻi ha faʻahinga ʻulungaanga lelei pē. Ko e kakai lalahi ʻe niʻihi ʻoku nau fiemaʻu ke tukuakiʻi ʻa e tuʻunga fakaakó ki he ʻikai te nau akoʻi ʻa e fānaú ki he faikehekehe ʻi he meʻa ʻoku tonú pea mo ia ʻoku halá. Ko hai ʻokú ke fakakaukau ʻoku totonu ke ne tokonaki ʻa e ako ko ʻení? [Tuku ke ne tali.] Fanongo ki he meʻa ʻoku leaʻaki ʻe he Tohitapú ʻo fekauʻaki mo e fehuʻi ko ʻení. [Lau ʻa e Efeso 6:4.] ʻOku fakahā mai ai kiate kitautolu ko hono fakahūhū ʻa e mahuʻinga ʻo e ʻulungaanga tāú ki he fānaú ko e fatongia ia ʻo e mātuʻá.” Fakaava ʻa e tohi ʻIlo ki he peesi 145, lau ʻa e palakalafi 16, pea fakamatalaʻi ʻa e ngaahi fakatātā ʻi he peesi 147. Fakamatalaʻi ko e tohí naʻe faʻu maʻá e fāmilí kotoa ke nau ako ia. Ngāueʻaki ʻa e palakalafi 17 mo e 18 ʻi he peesi 146, tuʻuaki ange hano fakahāhaaʻi ʻa e founga ʻoku tau fai ai ha ako pehē mo e ngaahi fāmilí.
7 Kapau naʻá ke kamata ha ako mo ha mātuʻa tokanga ʻi he ʻuluaki ʻaʻahí, te ke hoko atu nai ʻa e akó ʻi he toe ʻaʻahí ʻaki hoʻo pehē:
◼ “ʻOku lahi ʻa e ngaahi ʻahiʻahi ʻoku fokotuʻu ʻe he māmani ʻo e ʻaho ní ki heʻetau kau talavoú. ʻOku ʻai ai ke fuʻu faingataʻa kiate kinautolu ke hoko ʻo manavahē-ʻOtua ʻi heʻenau tutupu haké. Mahalo pē naʻá ke manatuʻi ʻi heʻeta fetalanoaʻaki fakamuimuí, naʻá ta lave ai ki he ongo tefitoʻi moʻoni ʻe ua. ʻI he tuʻunga ko e ngaahi mātuʻa manavahē-ʻOtuá, ʻoku fiemaʻu ke tau fokotuʻu ha faʻifaʻitakiʻanga lelei ki heʻetau fānaú, pea ʻoku totonu ke tau fai hano fakahāhaaʻi hokohoko ʻo ʻetau ʻofá kiate kinautolu. ʻOku ʻi ai ʻa e meʻa ʻe taha ʻoku leaʻaki ʻe he Tohitapú ʻoku fiemaʻu ki he fānaú mei heʻenau ngaahi mātuʻá.” Lau ʻa e Palovepi 1:8. Huke ki he peesi 146 ʻi he tohi ko e ʻIlo pea hoko atu ʻa e akó, ʻo aʻu ki he palakalafi 19-23. Fokotuʻu ange te ke toe foki atu ke ako mo e fāmilí kotoa, ʻo kamata ʻi he vahe 1.