Kau Talavou—Ko e Hā ʻa Hoʻomou Ngaahi Taʻumuʻa Fakalaumālié?
1 ʻOku ʻiloʻi ʻe Sihova ʻa e ngāue mohu ʻuhinga mahuʻinga pea mo e ngaahi taumuʻa ala lavaʻi ʻokú ne ʻomai ʻa e fiefiá. (Sio ki he Senesi 1:28; 2:15, 19.) ʻI he ʻahó ni, kuo ʻoange ʻe Sihova ki heʻene kakaí ʻa e ngāue ke malanga mo faiako. ʻOku tau maʻu foki mo e taumuʻa taʻengata ko hono maʻu ha moʻui taʻengata ʻi he Palataisí. Lolotonga iá, ʻoku fiemaʻu kiate kitautolu ke fokotuʻu ha ngaahi kolo fakalaumālie fakalakalaka kapau ʻoku tau fie fakaʻehiʻehi mei hono ngāuehalaʻaki hotau iví mo e ngaahi meʻá.—1 Kol. 9:26.
2 Ngaahi Taumuʻa Moʻoni Maʻá e Toʻutupú: Kau talavou, ʻoku mou moʻuaʻaki ke ʻi ai ha ngaahi taumuʻa fakateokalati ʻa ia te mou aʻu ki ai ʻo fakatatau ki hoʻomou ngaahi malava fakatāutahá. (1 Tim. 4:15) Ko e faʻahinga kei siʻi ʻe niʻihi kuo nau lavaʻi ʻa e taumuʻa ko hono lau maʻuloto ʻa e ngaahi tohi ʻo e Tohitapú naʻa mo e ki muʻa ke nau ako ke lautohí. Fakafou ʻi he ako fakafāmilí, ʻoku ako ai ʻa e fānaú ke teuteu ki he ngaahi fakatahá koeʻuhi ke nau lava ʻo aʻusia ʻa e ngaahi taumuʻa ko hono fai ha ngaahi tali mohu ʻuhinga pea kau ki he Akoʻanga Fakafaifekau Fakateokalatí. ʻI he taimi ʻoku ngāue fakataha ai ʻa e fānaú mo ʻenau ngaahi mātuʻá ʻi he ngāue fakamalangá, ʻoku nau ako ke ʻi ai haʻanau konga ʻi hono fai ha fakamoʻoni ʻi heʻenau fakalakalaka atu ki he taumuʻa ko e hoko ko ha kau malanga teʻeki papitaiso. ʻOku totonu ki he ngaahi mātuʻá ke nau fakamamafaʻi ki heʻenau fānau iikí ʻa e taumuʻa ko e fakatapui mo e papitaiso.
3 Kapau ʻokú ke kei taʻu hongofulu tupu, ko e hā ʻoku fakakau atu ki hoʻo ngaahi taumuʻa fakalaumālié? “Manatu eni ki ho Tupuaga” ʻaki hoʻo tokangataha ki he ngaahi taumuʻa mahuʻinga moʻoni ʻi he moʻuí. (Koh. 12:2 [Malaga 12:1, PM]; Sāme 71:17) Fēfē ke tāimuʻa tokoni he lolotonga ʻo e ngaahi māhina ʻokú ke mālōlō ai mei he akoʻangá? Kuó ke fakakaukau ke kau ki he ngāue fakafaifekau taimi-kakató ko ha tāimuʻa tuʻumaʻu? Fēfē ʻa hono ako ha lea foʻou koeʻuhí he ʻi he kahaʻú te ke lava ai ʻo tokoni ki he kulupu pe fakatahaʻanga lea muli ʻi ho feituʻú pe ko ha feituʻu kehe? Ko e tokolahi ʻoku nau ngāue ʻi he Pētelí pe ko ha kau ʻovasia fefonongaʻaki pe kau misinale kuo nau fokotuʻu ha ngāue taimi-kakato makehe ko ʻenau taumuʻá ia ʻi he taimi ʻoku nau kei ʻi he akoʻangá aí. Fēfē ke ke fai ha meʻa tatau?
4 ʻI he lolotonga ʻo e kei taʻu siʻí, feinga ke faʻifaʻitaki ki he faʻifaʻitakiʻanga ʻa Sīsuú. Naʻa mo e ʻi he taʻu 12, naʻá ne lea tauʻatāinaʻaki ai ʻa e ngaahi meʻa fakalaumālié. (Luke 2:42-49, 52) Ko hono fokotuʻu ha ngaahi taumuʻa ʻaonga kiate koe ke fai ha ako fakafoʻituitui, ke lau fakaʻaho ʻa e Tohitapú, pea mo feohi maʻu pē mo e kau Kalisitiane matuʻotuʻá ʻi he ngaahi fakatahá pea ʻi he ngāué, te ne tokoniʻi koe ke ke maʻu ʻa e poto ke akoʻi ʻa e niʻihi kehé fekauʻaki mo e Puleʻanga ʻo e ʻOtuá ʻi he founga naʻe fai ʻe Sīsuú.