ʻOkú Ke Lau ʻa e Ngaahi Makasiní?
1 Ko ha ongo mātuʻa misinale ʻi ʻAfilika naʻá na leaʻaki ʻeni fekauʻaki mo ʻetau ngaahi makasiní: “ʻOku tokoniʻi kimaua ʻe he Taua Leʻo ke ma ʻāʻā fakalaumālie ʻi homa feituʻú. ʻOkú ma maʻu ʻa e fakalototoʻa mo e mālohi mei he tatau taki taha.” ʻOkú ke maʻu ʻa e houngaʻia loloto tatau ki heʻetau ngaahi makasiní? ʻOkú ke vēkeveke ke lau kinautolu?
2 ʻOku fiemaʻu ha taimi lahi ke teuteu ai ʻa e ngaahi kupu ʻi he makasiní ʻe lava ke lau ʻi ha ngaahi miniti siʻi pē. ʻI hono ʻiloʻi ʻení, te ke lau vave pē ʻa e ngaahi kupú, sio ki he ngaahi fakatātaá, pe faai atu pē ʻo ke lau ha kupu ʻokú ne maʻu ʻa hoʻo tokangá? ʻOku tau poto kapau ʻoku tau fai ke toe lahi ange ai. ʻOku totonu ke tau vaheʻi ha taimi ke lau pea sivisiviʻi kotoa ʻa e ngaahi kupu ʻi he tatau kotoa pē ʻo ʻetau ngaahi makasiní. Ko e Taua Leʻo ko ʻetau makasini tefito ia ki he meʻakai fakalaumālie taimi totonú. Ko e Awake! ʻokú ne ʻomai ʻa e ngaahi kupu mahuʻinga mo e fakamatala ʻi he ngaahi kaveinga kehekehe. Ko e meʻa ʻoku tau ako mei hono lau ʻa e ongo makasini ko ʻení ʻoku ʻikai ngata pē ʻi hono fakaivimālohiʻi fakalaumālie ai kitautolú ka ʻokú ne toe teuteuʻi ai kitautolu ki ha kau ola lelei lahi ange ki he ngāue fakafaifekaú. ʻI heʻetau hoko ko e kau lautohi loto-tōnungá, te tau faivelenga ai fekauʻaki mo hono tuʻuaki ʻa e ngaahi makasiní ki he niʻihi kehé.
3 Founga ke Fakaleleiʻi Ai ʻa e Tōʻonga Lautohí: ʻE lava ke toe lelei ange ʻa hoʻo tauhi maʻu ki hoʻo lautohi ʻi he ngaahi makasiní? Ko e ongo fokotuʻu ʻeni ʻe ua ʻoku ʻaonga ki he tokolahi. (1) Fokotuʻu ha taimi-tēpile lautohi tuʻumaʻu. Ko hono vaheʻi pē ʻa e miniti ʻe 10 ki he 15 ʻi he ʻaho taki taha ke lautohi, te ke ʻohovale ai ʻi he meʻa lahi te ke lava ke lau ʻi ha uike. (2) ʻAi ha founga ke ke hanganaki ʻilo ai ki he meʻa ʻokú ke laú. Mahalo pē te ke lava ke ʻai ha fakaʻilonga ʻi he kamataʻanga ʻo e kupu taki taha kuó ke laú. ʻI he ʻikai ʻení, te ke liʻaki ai ʻa hono lau ha ngaahi kupu ʻe niʻihi pe naʻa mo ha makasini kakato. ʻOku mahuʻinga ke fakatupulekina ha taimi-tēpile lautohi ʻe ʻaonga kiate koé pea pipiki ki ai.—Fakafehoanaki mo Filipai 3:16.
4 ʻOku tali fakapotopoto ʻa e “tamaioeiki agatonu mo boto” ki he liliu ʻa e taimí ʻaki hono pulusi ʻa e ngaahi kupu ʻa ia ʻoku feʻunga mo e ngaahi fiemaʻu moʻoni ʻa e kakaí. (Mt. 24:45, PM) Ko hono moʻoní, kuo ueʻi ʻe he ngaahi makasiní ʻetau moʻuí. Ko e lahi ʻo ʻetau fakalakalaka fakalaumālié, ki ha tuʻunga lahi ange, ʻoku puleʻi ia ʻe he anga ʻo ʻetau tōʻonga lautohi fakateokalatí. Ko ha tāpuaki fakalaumālie lahi ange ʻoku tukutauhi maʻa kinautolu ʻoku nau ʻai ha taimi ke lau ai ʻa e kotoa ʻo e ngaahi makasiní.