Puha Fehuʻi

◼ ʻOku kei feʻunga ke fai ha ako Tohitapu ʻi ʻapi mo ha tokoua pe tuofefine ʻoku ʻikai longomoʻui, ʻi he tataki ʻa ha taha ʻo e kau mēmipa ʻo e Kōmiti Ngāue ʻa e Fakatahaʻangá?

ʻOku maʻu ʻe he kau mātuʻá ʻa e fatongia ke tauhi ʻa e fakatahaʻangá, ʻo kau ai ha mēmipa kuo hoko ʻo ʻikai toe longomoʻui. ʻOku nau ʻaʻahi ki he faʻahinga peheé pea fakapapauʻi ai pe ko e hā ha tokoni fakafoʻituitui ʻoku fiemaʻu. ʻI heʻene feʻungamālié, ʻe lava ʻo kau ki he meʻá ni ʻa e tuʻuaki ki he tokotaha ʻikai longomoʻuí ʻa e ʻaonga ʻo ha ako Tohitapu fakafoʻituitui. ʻOku fakamatalaʻi ʻi he Organized to Accomplish Our Ministry, peesi 103, ko e Kōmiti Ngāue ʻa e Fakatahaʻangá te nau fili pe ko hai nai ʻe maʻu ʻaonga mei ha tokonaki pehē.

ʻOku fakapapauʻi ʻe he ʻovasia ngāué pe ko hai ʻe lelei taha ke ne fai ʻa e tokoní, ko e ngaahi tuʻunga-lea ʻoku totonu ke fai ai ʻa e akó, pea mo e tohi ko ia ʻe ʻaonga lahi tahá. Mahalo pē ko e tokotaha ko ia naʻe fuofua ako mo e tokotahá pe ko ha taha ʻokú ne ʻiloʻi mo tokaʻi ʻe ʻi ha tuʻunga lelei ke tokoni. ʻE kole nai ki ha tuofefine taukei mo matuʻotuʻa ke ne tokoniʻi ha tuofefine ʻikai longomoʻui. ʻE ʻikai nai ke faʻa fiemaʻu ki ha tokotaha malanga ʻe taha ke ʻalu fakataha mo e tokotaha faiako kuo vaheʻí. ʻI he taimi ʻoku vaheʻi aí, ʻe lava ke lau ʻa e taimí ʻe he tokotaha malanga ʻokú ne fai ʻa e akó, ko e ngaahi toe ʻaʻahí, pea mo e akó.​—Sio ki he ʻEtau Ngāue Fakafaifekau ʻo e Puleʻanga, ʻo Nōvema 1987, peesi 1-2.

Koeʻuhi ko e tokotaha akó ko e tokotaha ia kuo ʻosi papitaiso, ʻi he tuʻunga lahi tahá ʻoku ʻikai fiemaʻu ke hokohoko atu ʻa e akó ʻi ha vahaʻa taimi lōloa. Ko e taumuʻá ke tokoniʻi ʻa e tokotaha ʻikai longomoʻuí ke ne toe maʻu ʻa e ngaahi fakataha kotoa ʻa e fakatahaʻangá pea ke hoko ko ha tokotaha malanga tuʻumaʻu ʻo e ongoongo leleí. ʻE vakaiʻi ʻe he ʻovasia ngāué ʻa e fakalakalaka ʻa e ngaahi ako peheé. Ko e ola ʻo e tokoni anga-ʻofa ko ení ʻoku totonu ke hoko ia ke malava ai ʻo fua ʻe he fanga tokoua mo e fanga tuofāfine ko ení ʻenau kavenga tonu ʻo e fatongiá ʻi he ʻao ʻo Sihová pea hoko ʻo nau “aka . . . mo tuu mau” ʻi he moʻoní.​—Ef. 3:​17, PM; Kal. 6:5.