Founga ke Fengāueʻaki Fakataha Ai ʻa e Ngaahi Mēmipa ʻo e Fāmilí ke Kau Kakato—Ki he Ngāue Fakafaifekaú
1 Ko e hā ʻoku lava ke toe fakalotomāfana lahi ange ʻi he sio ki he ngaahi husepānití mo e ngaahi uaifí, ngaahi mātuʻá mo e fānaú ʻoku nau ngāue fakataha ʻi he ngāue fakafaifekau faka-Kalisitiané, ʻo fakahīkihikiʻi fakahāhā ʻa e huafa ʻo Sihová? (Sāme 148:12, 13) ʻOku totonu ki he ngaahi fāmili kotoa pē ke ʻi ai ha founga tuʻumaʻu lelei ki he kau maʻu pē ʻi he ngāue fakamalangá. ʻOku fokotuʻu ʻe ho fāmilí ha ʻaho pau ʻi he uike taki taha ke fakamoleki ʻi he ngāue fakafaifekaú? Kapau ko ia, ʻoku ʻiloʻi leva ʻe he tokotaha kotoa pē ʻa e meʻa tofu pē ke palani ki aí mo malava ke kau kakato aí.—Pal. 21:5a.
2 ʻI he ki muʻa ʻi ha ʻaho ngāue fakafāmili, ko e hā ʻoku ʻikai ke ngāue fakataha ai ʻi hono teuteu ʻa e ngaahi tuʻuaki ʻe ngāueʻaki ʻe ho fāmilí? Ko e ʻahiʻahiʻi ʻo e ngaahi kongá ʻe lava ke tokoni lahi tahá, pea ʻe lava ke nau fakatupu ha laumālie moʻoni ʻo e fengāueʻaki fakafāmilí. Ko ha pale moʻoni ē ʻi he hoko ʻa e ngāue fakamalangá ko ha meʻa fakafāmilí pea ko e ngaahi mēmipa kotoa pē ʻoku nau teuteu lelei!
3 Ko ha ʻovasia fefonongaʻaki naʻá ne ngāue fakataha mo ha fāmili fakalūkufua ʻi he ngāue makasiní. ʻI he lolotonga ʻo ʻene ngāue mei he fale ki he falé mo e taha ʻo e ngaahi ʻofefiné, naʻá ne fakaʻekeʻeke: “Ko e hā hono lōloa ʻo hoʻo ngāue mo aú?” Naʻá ne fakamatala leva ʻo pehē te ne ngāue hono hokó mo ʻene tamaí. Naʻe hā mahino ko ia mo ʻene tamaí naʻá na fiefia moʻoni ʻi heʻena ngāue fakatahá. Ko ha laumālie fakafāmili lelei ē!
4 Ko e ngaahi fāmili ʻe niʻihi ʻoku malava nai ke nau tāimuʻa tokoni fakataha ʻi ha māhina ʻe taha he lolotonga ʻo e taʻú. Pe ʻoku malava nai ʻo ʻikai toe siʻi ange ʻi he mēmipa ʻe taha ʻo e fāmilí ke ngāue hokohoko atu ko ha tāimuʻa tokoni pe naʻa mo e hū ʻo hoko ko ha tāimuʻa tuʻumaʻu. ʻI he fokotuʻutuʻu mo e fengāueʻaki lelei, mahalo ko e kotoa ʻo e ngaahi mēmipa ʻo e fāmilí te nau malava ke fakalahi ʻenau kau fakafoʻituitui ki he ngāué ʻaki ʻenau fai ha poupou ki he tokotaha ʻoku ngāue tāimuʻá. ʻE pau ke tāpuakiʻi ʻa e fāmilí ʻi he fakalahi ko ʻeni ʻo e ngāué pea ʻi he ngaahi meʻa lelei naʻe hokosia ʻoku nau fiefia ai ʻi he ngāue fakafaifekaú.—Mal. 3:10.
5 Ko e kau kakato ʻi he ngāue fakaʻevangelioó ʻe tokoni ia ʻi he tauhi ke vāofi ai ʻa e ngaahi fāmilí, faivelenga, ola lelei, pea fiefia ʻi he ngāue ʻa Sihová!—Fakafehoanaki mo Filipai 2:1, 2.