Fai ha Tokanga ki he Folofola ʻa Sihová ʻi he ʻAho Kotoa Pē!

¹ ʻOku ʻomai ʻe he ʻaho taki taha ʻa e ngaahi pole foʻou ki hoʻo tuí. Mahalo ko ha maheni ʻi he māmaní ʻokú ne hanganaki tenge maʻu pē koe ke mo faialea. ʻOku fiemaʻu koe ʻe hoʻo faiakó ke ke tulimui ki ha ngāue fakamāmani, pe ʻoku fiemaʻu koe ʻe hoʻo pule ngāué ke ke ngāue ʻi he ngaahi houa lōloa ange. ʻOku hōloa nai hoʻo moʻui-lelei fakasinó. Neongo te ke fetaulaki nai ʻi ha taimi mo e ngaahi ʻahiʻahi peheé, ʻoku ʻikai te ke tokotaha pē. ʻOku mateuteu ʻa Sihova ke ne ʻoatu kiate koe ʻa e poto ʻoku fiemaʻú ke ke fekuki ai mo kinautolu. Ko e fakakaukau ki he konga tohi faka-Tohitapú pea mo e ngaahi fakamatalá ʻi he Ko Hono Vakaiʻi Fakaʻaho ʻa e Tohitapú ko e founga ia ʻe taha te ke lava ai ke ke fakakaukau ki he Folofola ʻa Sihová ʻi ha tuʻunga tuʻumaʻu. ʻOkú ke ngāueʻaongaʻaki ʻa e tokonaki ko ʻení?

² ʻOku Ala Maʻu ʻa e Tokoní: ʻOku fakamatalaʻi ʻe he Aisea 30:20 (NW) ʻa Sihova ko e “Faiako Maʻongoʻonga” ʻa ia ʻoku malava ke hanga ki ai ʻa e kakai ʻa e ʻOtuá ki ha tokoni. ʻOkú ne tokonaki atu kiate koe ʻa e meʻa tofu pē ko ia ʻokú ke fiemaʻu ke fehangahangai ai mo e ngaahi pole ki hoʻo tuí. ʻO anga-fēfē? ʻOku fakamatalaʻi ʻe he (Aisea 30:21 veesi hoko maí: “ʻE fanongo ʻe ho telinga ki ha lea mei ho tuʻa, Ko eni ʻa e hala. Fou ai.” ʻI he ʻahó ni, ʻoku ʻomai ʻe Sihova ʻene “folofolá” ʻo fakafou mai ʻi he ngaahi Konga Tohitapú pea mo e ngaahi tohi ʻa e ‘tamaioeiki agatonu mo botó.’ (Mt. 24:​45, PM) ʻOku ʻi ai ha poto lahi fakaʻulia ʻi he ngaahi kupu ʻo e Taua Leʻo ʻi he kuohilí ʻataʻata pē, ʻoku meimei lave ai ki he tafaʻaki kotoa pē ʻo e moʻui ʻa e Kalisitiané. ʻI hono fakamanatu ʻa e ngaahi meʻa ko ia ʻoku ʻomai ʻi he Ko Hono Vakaiʻi Fakaʻaho ʻa e Tohitapú ʻokú ne tokoniʻi ai koe ke langa ha fale tukuʻanga ʻilo ʻa ia ʻoku mahuʻinga taʻehanotatau ʻi he feangainga mo e ngaahi faʻahinga kehekehe kotoa ʻo e ʻahiʻahí.—Ai. 48:17.

³ ʻAi ha Taimi-Tēpile ki Ai: Neongo ko e ngaahi pongipongí ko ha taimi femoʻuekina, ko ha faʻē ʻe taha naʻá ne ʻai ko ha taumuʻa ia ke lau pea fetalanoaʻaki ʻi he konga tohí mo e ngaahi fakamatalá mo ʻene tamá he lolotonga ʻa ʻene kai pongipongí. Ko e ngaahi lea ko ʻení fakataha mo e lotu ko e ngaahi lea fakamuimui ia naʻe fanongo ki ai ʻa e tamá ʻi he pongipongi taki taha ki muʻa ke ne ʻalu ki he ʻapiakó. Naʻa nau fakaivimālohiʻi ia ke ne talitekeʻi ʻa e ngaahi fakaʻaiʻai ki he fehokotaki fakasinó, ke tuʻu ʻo ʻikai ngaofengofua ʻi he fehangahangai mo e mateakiʻi fonuá, pea ke ne fai ha fakamoʻoni loto-toʻa fakatouʻosi ki he kaungāakó mo e kau faiakó. Neongo ko ia tokotaha pē ʻa e Fakamoʻoni ʻi he ʻapiakó, naʻe ʻikai ʻaupito te ne ongoʻi tuēnoa.

⁴ Hanga kia Sihova pea mo ʻene Folofolá ki ha fakahinohino mo ha tataki. Kapau ʻokú ke fai pehē, te ne hoko ai ʻo moʻoni kiate koe, hangē ha kaumeʻa falalaʻangá. Hanga kiate ia ʻi he ʻaho kotoa pē! Fakataha mo e laui miliona ʻo e niʻihi kehe ʻi he māmaní kotoa ʻa ia ʻoku nau vakaiʻi fakaʻaho ʻa e Folofola ʻa e ʻOtuá, ʻofa ke ke ʻilo ai ko ho ongo matá te na hoko ko e “ongo mata ʻokú na sio ki ho Faiako Maʻongoʻongá.”