Founga ʻe Lava Ke Tau Fakatupulekina Ai ʻa e Malava ke Fakaʻuhingá

¹ Ko e ʻuhinga ʻe taha ʻo e foʻi lea ko e “fakaʻuhingá” ko e “talanoa mo ha taha koeʻuhi ke tākiekina ai ʻene ngaahi tōʻongá pe ngaahi fakakaukaú.” Koeʻuhi ke fakalakalaka hoʻo ola lelei ʻi he ngāue fakafaifekaú, ʻoku fiemaʻu ke ke fakatupulekina ʻa e malava ke fakaʻuhinga mo e faʻahinga ʻokú ke fetaulaki mo iá. (Ng. 17:​2-4) Ka ʻe lava fēfē ke ke fakatupulekina ʻa e pōtoʻi ko ʻení?

² ʻOku Kamata ʻAki ʻa e Fakalaulauloto: ʻI hono ako ʻa e ngaahi moʻoni ʻo e Tohitapú, te ke ʻilo ai ʻoku ʻaonga ke fakakaukau ki he fakamatalá. Kapau ʻoku hā ngali ʻoku kiʻi fihi ʻa e ngaahi poiní, vaheʻi ha taimi ke fai ai ha fekumi pea fakalaulauloto ki he ngaahi talí. Kumi ke ʻoua ʻe ngata pē ʻi hono mahinoʻi lelei ʻa e ngaahi fakamatala ʻoku tokonaki maí kae toe pehē foki ki he ngaahi ʻuhinga Fakatohitapu ki he ngaahi fakamatala ko iá.

³ ʻOku Kau ki Ai ʻa e Teuteu ki he Ngāue Fakafaifekaú: Fakakaukau ʻo fekauʻaki mo e founga ʻo haʻo fakamatalaʻi ʻa e moʻoní ki he faʻahinga kakai kehekehe. Faʻu ha foʻi fehuʻi fakatupunga fakakaukau ke langaʻi ʻa e mahuʻingaʻiá. Fakapapauʻi ʻa e founga ke fakafehokotaki ki ai ha poini Fakatohitapu pea fakaʻuhinga ki ai. Tomuʻa fakakaukau ki ha ngaahi fakafepaki ʻe langaʻi hake nai, pea fakakaukau fekauʻaki mo e founga ke fetalanoaʻaki ai kiate kinautolú. Fakaʻilongaʻi ʻi he tohi ʻoku tuʻuakí ha meʻa mahuʻinga ʻe lelei taha ke ngāueʻakí.

⁴ Muimui ʻi he Faʻifaʻitakiʻanga ʻa Sīsuú: Naʻe fokotuʻu ʻe Sīsū ʻa e sīpinga lelei taha ʻo e fakaʻuhinga ola lelei mei he ngaahi Konga Tohitapú. Ke sivisiviʻi ʻa e founga naʻá ne faiako aí, fakakaukau ki he fakamatala ʻoku maʻu ʻi he Luke 10:​25-37. Fakatokangaʻi ʻa e hokohoko ko ʻení: (1) Fakahanga ʻa e tokangá ki he ngaahi Konga Tohitapú ʻi hono tali ʻa e ngaahi fehuʻi ʻa e kakaí. (2) Fakaafeʻi kinautolu ke nau fai ha fakamatala, pea fakaongoongoleleiʻi kinautolu ʻi heʻenau fai ʻa e ngaahi fakamatala mahinó. (3) Fakapapauʻi ke hanganaki tokangataha ki he fehokotaki ʻi he vahaʻa ʻo e fehuʻí mo e ngaahi Konga Tohitapú. (4) Ngāueʻaki ha fakatātā ʻoku fakamānako ki he lotó ke fakapapauʻi ai ʻoku mahinoʻi ʻa e ʻuhinga moʻoni ʻo e talí.—Sio ki he Taua Leʻo ʻo Nōvema 1, 1986, peesi 27-28, palakalafi 8-10.

⁵ Ngāueʻaki ʻa e Meʻangāue Kuo ʻOmai Kiate Kitautolú: Ko e Reasoning From the Scriptures mo e Founga ke Kamata mo Hoko Atu ʻa e Fetalanoaʻaki Fakatohitapú naʻe pulusi kinaua ke ngāueʻaki ʻi he ngāue fakamalangá. Ko hona ngaahi talateú, ʻokú ne fai ha tali ki he ngaahi taʻofiʻanga ʻo e fetalanoaʻaki ʻe ngali fai maí, pea ko e ngaahi poini fakaʻuhingá ʻokú ne tokoniʻi kitautolu ke fakatupulekina ʻa e malava ke fakaʻuhingá. Ko e tohi Reasoning mo e kiʻi tohi ko e Kamata mo Hoko Atu ʻa e Fetalanoaʻaki ko ha ongo meʻangāue mahuʻinga ia ʻoku totonu ke tau toʻotoʻo maʻu pē ki he ngāué pea ʻoua ʻe toumoua ke ngāueʻaki ʻi he taimi ʻokú ke kau ai ʻi ha ngaahi fetalanoaʻaki faka-Tohitapu. Fakamanatu ʻa e peesi 7-8 ʻo e tohi Reasoning ke sio ki he founga ke ngāueʻaki ai kinaua ki he ʻaonga lahi tahá.

⁶ Ko hono fakatupulekina ʻa hoʻo malava ke fakaʻuhingá te ne fakalahiʻi ʻa hoʻo pōtoʻi ʻi he ngāue fakamalangá mo e faiakó. ʻE iku ʻeni ki he ngaahi tāpuaki lahi kiate koe pea ki he faʻahinga ʻokú ke fetaulaki mo ia ʻi he ngāue fakafaifekaú.