ʻOku Lelei Fēfē ʻa Hoʻo Kai Fakalaumālié?
1 ʻOku ʻi ai ʻa e lea ʻoku taka ʻo pehē, ‘ʻoku tau iku pē ki he meʻa ʻoku tau kaí.’ Ko e moʻoni, ko ʻetau mālohi mo moʻuilelei fakaesinó ʻoku uesia ia ʻe heʻetau tōʻonga kaí. Koeʻuhi naʻe pehē ʻe Sīsū: “Oku ikai moʻui ʻa e tangata ʻi he ma pe, ka ʻi he ngāhi folofola kotoa pe ʻoku ʻalu atu mei he fofonga ʻo e ʻOtua,” ko ʻetau tōʻonga kai fakalaumālié ʻokú ne uesia tatau ai kitautolu ki he lelei ange pe ki he kovi ange. (Mt. 4:4) Ko ia ai, ʻoku lelei fēfē ʻa hoʻo kai fakalaumālié? Ko ha tokotaha kai filifili koe? ʻOkú ke kai pē mo lele? Pe ʻokú ke fiefia ke vaheʻi ha taimi ke ke maʻu ai ha meʻakai fakalaumālie tuʻumaʻu, mafamafatatau mo fakatupu moʻuilelei?
2 Sivisiviʻi Hoʻo Tōʻonga Kaí: ʻOku tokonaki mai ʻe Sihova ʻa e “mea kai i hono taimi totonu” pea “mo ha katoanga meʻa lolo,” fakafou ʻi he “tamaioeiki agatonu mo boto.” (Mt. 24:45, PM; Ai. 25:6) Ke maʻu ha ʻaonga kakato mei he ngaahi tokonaki anga-ʻofa ko ʻení, kuo pau ke tau fai ha feinga ke kai lelei ʻi he tuʻunga fakalaumālié.
3 Te ke ʻeke hifo nai kiate koe: ‘ʻOku ou lau ʻa e konga tohi mo e fakamatala ʻo e ʻahó ʻi he ʻaho taki taha? ʻOku ou lautohi pea fakalaulauloto fakaʻaho ki he Tohitapú? ʻOku ou teuteu ki he ngaahi fakataha ʻa e fakatahaʻangá ʻaki hono ako ki muʻa ʻa e fakamatalá? Kuó u lau kotoa ʻa ʻetau ngaahi tohi fakamuimui tahá, ʻo kau ai ʻa e Moʻungaʻi Tangata Lahi Taha Kuo Moʻui Maí.’
4 Naʻe talaʻofa ʻe Sīsū: “Fiefiaā ka ko kinautolu ʻoku nau ʻiloʻi ʻa ʻenau fiemaʻu fakalaumālié . . . Fiefiaā ka ko e faʻahinga ʻoku fiekaia mo fieinua ki he māʻoniʻoní, koeʻuhi ʻe fakafonu kinautolu.” (Mt. 5:3, 6, NW) Ko ia kai lelei fakalaumālie ʻaki hono fakafonu ho ʻatamaí mo e lotó ʻaki ʻa e ʻiloʻi ʻo e ʻOtuá.