Ngaahi Mātuʻa​—Akoʻi Hoʻomou Fānaú mei he Kei Valevalé

¹ “Atu ako ki ha tamasiʻi, ʻo tāu mo hono ʻalunga, talaatu ʻo ka ne ka motuʻa ʻe ʻikai te ne hiki mei ai.” (Pal. 22:6) Ngaahi mātuʻa, kapau ʻoku ʻikai te mou loto ke “hiki” hoʻomou fānaú mei he hala ʻo e moʻoní, ko fē ʻa e taimi ʻoku totonu ke kamata ai ʻa e akoʻi peheé? Mei he kei valevalé!

² ʻI he taimi naʻe pehē ai ʻe Paula ko e akoʻi fakalaumālie ʻo Tīmoté naʻe ‘talu mei heʻene valevalé,’ ʻoku hā mahino ko ʻene ʻuhingá mei he kei pēpeé. (2 Tim. 3:​14, 15) Ko hono olá, naʻe tupulekina ʻa Tīmote ki he tuʻunga ko ha tangata fakalaumālie lelei. (Fili. 2:​19-22) Ngaahi mātuʻa, kuo pau foki ke mou kamata ‘mei he kei valevalé’ ke ʻoatu ki hoʻomou fānaú ʻa e akoʻi ʻoku nau fiemaʻú ke ‘tupu fakataha hake ai mo Sihova.’​—1 Sam. 2:​21, NW.

³ Tokonaki ʻa e Vai ʻOku Fiemaʻu Ke Nau Tupu Aí: Hangē ko e fiemaʻu maʻu pē ʻe he fanga kiʻi fuʻu ʻakaú ha vai ke tupu ai ʻo hoko ko ha ʻulu ʻakau lalahí, ʻoku fiemaʻu ki he fānau ʻo e taʻumotuʻa kotoa pē ke fuʻifuʻi kinautolu ʻaki ʻa e vai ʻo e moʻoni faka-Tohitapú ke nau tupu ai ko ha kau sevāniti matuʻotuʻa ʻa e ʻOtuá. Ko e founga tefito ke akoʻi ai ki he fānaú ʻa e moʻoní pea ke tokoniʻi kinautolu ke fekoekoeʻi mo Sihová ʻoku fakafou ia ʻi ha ako Tohitapu fakafāmili tuʻumaʻu. Kae kehe, ngaahi mātuʻa, fakakaukau ki he lahi ʻo e tokanga ʻa e kiʻi tama taki taha. Ki he fānau īkí, ʻoku ngalingali ko ha ngaahi vahaʻa taimi ako nounou ʻoku toutou faí ʻe ola lelei ange ia ʻi ha ngaahi vahaʻa taimi ako lōloa kae siʻi hono faí.​—Teu. 11:​18, 19.

⁴ ʻOua ʻaupito ʻe fakasiʻisiʻia ʻa e malava ʻa hoʻo fānaú ke akó. Fai kiate kinautolu ha ngaahi talanoa fekauʻaki mo ha faʻahinga ʻi he Tohitapú. ʻAi kinautolu ke nau tā ha ngaahi fakatātā ʻo ha ngaahi konga ʻi he Tohitapú pe fakatātaaʻi ha ngaahi meʻa faka-Tohitapu naʻe hoko. Ngāueleleiʻaki ʻa ʻetau ngaahi foʻi vitioó mo e kāseté, kau ai ʻa e ngaahi tulama faka-Tohitapú. Liliu ʻa e ako fakafāmilí ʻo fakatatau ki he taʻumotuʻa mo e malava fakaeako ʻa hoʻo fānaú. Ko e ʻuluaki akoʻí ʻe faingofua, ʻi ha taimi nounou; ka ʻi he tupu hake ha kiʻi tama ʻo motuʻá, ko hono akoʻí ʻoku totonu ke hoko ʻo toe lahi ange mo fakalakalaka. ʻAi ʻa e fakahinohino faka-Tohitapú ke longomoʻui mo kehekehe. ʻOkú ke fiemaʻu ʻa hoʻo fānaú ke nau “holi” ki he Folofolá, ko ia, ʻai ʻa e akó ke fakamānako ʻi he lahi taha te ke malavá.​—1 Pita 2:2.

⁵ Fakakau Kinautolu ʻi he Fakatahaʻangá: Fokotuʻu ha ngaahi taumuʻa fakalakalaka ki hoʻomou fānaú koeʻuhi ke nau hoko ʻo kau kakato ange ai ʻi he fakatahaʻangá. Ko e hā nai ʻenau ʻuluaki taumuʻá? Ko e ongo mātuʻa ʻa ha ongo tamaiki ʻe toko ua naʻá na pehē: “Naʻe kamata ke na fakatou maʻu hona akoʻi ke tangutu fakalongolongo ʻi he Fale Fakatahaʻangá.” Ki mui ai, tokoniʻi ʻa e fānaú ke fai ha tali ʻi he ngaahi fakatahá ʻi he ngaahi lea pē ʻa kinautolu pea ʻai ia ko ʻenau taumuʻa ke kau ʻi he Ako Fakafaifekau Fakateokalatí. ʻI he malaʻe ngāué, ko ha ngaahi taumuʻa lelei ke aʻusiá ko hano tuʻuaki ha tuleki ʻi he matapaá, ko hano lau ha konga Tohitapu, tuʻuaki ha makasini pea ko hano fakakau ʻa e tokotaha-ʻapí ʻi ha fetalanoaʻaki mohu ʻuhinga.

⁶ Fokotuʻu ha Faʻifaʻitakiʻanga Fakalotomāfana: ʻOku fanongo fakaʻaho ʻa hoʻo fānaú ʻokú ke lea ʻo kau kia Sihova pea lotu kiate ia? ʻOku nau sio kiate koe ʻokú ke ako ʻa ʻene Folofolá, maʻu ʻa e ngaahi fakatahá, kau ki he malaʻe fakafaifekaú, pea maʻu mo e fiefia ʻi hono fai ʻa e finangalo ʻo e ʻOtuá? (Sāme 40:8) ʻOku mātuʻaki mahuʻinga ke nau sio ʻoku mou fai pehē pea ke mou fai fakataha ʻa e ngaahi meʻá ni. Ko ha finemui naʻá ne lave ʻo fekauʻaki mo ʻene faʻeé, ʻa ia naʻá ne tauhi hake ha fānau ʻe toko ono ke nau hoko ko e Kau Fakamoʻoni loto-tōnungá: “Ko e meʻa naʻe maongo lahi taha kiate kimautolú ko e faʻifaʻitakiʻanga tonu ʻa ʻemau faʻeé​​—naʻe leʻo-lahi ange ia ʻi he leá pē.” Naʻe fakamatala ha mātuʻa ʻa ha toko fā: “‘Oku muʻomuʻa ʻa Sihová,’ naʻe ʻikai ko ha kupuʻi lea anga-maheni pē ka ko e founga ia naʻa mau moʻuiʻaki ai ʻemau moʻuí.”

⁷ Ngaahi mātuʻa, kamata tōmuʻa ʻa hono akoʻi hoʻomou fānaú, ʻo akoʻi kiate kinautolu ʻa e moʻoni mei he Folofola ʻa e ʻOtuá, fokotuʻu ha ngaahi taumuʻa fakalakalaka pea tokonaki ʻa e faʻifaʻitakiʻanga lelei taha ʻe malavá. Te ke fiefia ai ʻi hoʻo fai ʻa e ngaahi meʻá ni!