Faʻifaʻitaki ki he Lelei ʻa Sihová
1 Hili ʻa e fiefia ʻi ha fakatōtō hifo fisifisimuʻa ʻa e laʻaá pe ko ha foʻi kai ifo, ʻikai ʻoku ueʻi kitautolu ke fakamālō kia Sihova, ko e Matavai ʻo e lelei kotoa pē? Ko ʻene leleí ʻoku ueʻi ai kitautolu ke tau loto ke faʻifaʻitaki kiate ia. (Sāme 119:66, 68; Ef. 4:32e [5:1, PM]) ʻE lava fēfē ke fakahāhā ʻa e ʻulungaanga ko e leleí?
2 Ki he Kau Taʻetuí: Ko e founga ʻe taha ʻe lava ke tau faʻifaʻitaki ai ki he lelei ʻa Sihová ko hono fakahāhā ʻa e tokanga loto-moʻoni ki he faʻahinga ʻoku ʻikai felāveʻi mo kitautolu ʻi he tuí. (Kal. 6:10) Ko e fakahaaʻi ʻo e tuʻunga leleí ʻi he ngaahi founga ʻaongá ʻe lava ke ʻi ai hono ola lelei ki he anga ʻo ʻenau vakai ki he Kau Fakamoʻoni ʻa Sihová pea mo e pōpoaki ʻoku tau fatakí.
3 Ko e fakatātaá, lolotonga ʻa e tatali ʻi ha kilīniki fakafaitoʻo, naʻe tangutu ai ha talavou tāimuʻa ʻo hoko atu ki ha fefine taʻumotuʻa ʻa ia ne hā ngali naʻá ne puke lahi ange ʻi he tokolahi taha ʻo e faʻahinga naʻe ʻi aí. ʻI he taimi ne hoko mai ai ki hono taimi ke ne sio ki he toketaá, naʻá ne fakaʻatā ʻa e fefiné ke ne fetongi ia. Naʻá ne toe fetaulaki mo ia ki mui ai, ko e taimi ko ení ʻi he māketí, pea naʻá ne fiefia ke sio kiate ia. Neongo naʻá ne taʻefiefanongo ki muʻa ki he ongoongo leleí, naʻá ne pehē naʻe ʻikai te ne ʻiloʻi ʻoku ʻofa moʻoni ʻa e Kau Fakamoʻoni ʻa Sihová ʻi honau ngaahi kaungāʻapí. Naʻe kamata ha ako Tohitapu tuʻumaʻu mo ia.
4 Ki Hotau Fanga Tokouá: ʻOku tau toe faʻifaʻitaki ki he lelei ʻa Sihová ʻi he taimi ʻoku tau hoko atu ai ke tokoniʻi ʻa e kaungātuí. ʻI he ngaahi taimi ʻo e fakatamakí, ʻoku tau ʻi he lotolotonga ʻo e faʻahinga ʻoku ʻuluaki haʻu ke tokoniʻi hotau fanga tokouá. ʻOku tau fakahaaʻi ʻa e laumālie tatau ʻi he taimi ʻoku tau tokoniʻi ai ʻa e faʻahinga ʻoku nau fiemaʻu ha meʻalele ki he ngaahi fakatahá, ʻaʻahi ki he faʻahinga mahamahakí, pea fano atu ʻi he ʻofa ki he faʻahinga ʻoku ʻikai te tau loko ʻiloʻi lelei ʻi he fakatahaʻangá.—2 Kol. 6:11-13; Hep. 13:16.
5 Ko e toe founga ʻe taha ʻa ia ʻoku fakahaaʻi ai ʻe Sihova ʻa e leleí ʻoku ʻi heʻene “tokateu ke fakamolemolé.” (Sāme 86:5, NW) ʻI he faʻifaʻitaki kiate iá, ʻoku lava ke tau fakahāhā ʻetau ʻofa ʻi he leleí ʻaki hono fakaaʻu atu ʻa e fakamolemolé ki he niʻihi kehé. (Ef. 4:32) ʻOku tokoni eni ke ʻai ʻetau feohi mo e kaungātuí ke ‘lelei, mo sai.’—Sāme 133:1-3.
6 ʻOfa ke hanga ʻe he lelei lahi ʻa Sihová ʻo fakatupunga kitautolu ke tau longomoʻui ʻi he fakahīkihiki kiate iá pea ke hoko ʻo ulo ʻi he fiefiá. Pea ʻofa ke ne ueʻi kitautolu ke tau feinga ke faʻifaʻitaki ki heʻene leleí ʻi he meʻa kotoa ʻoku tau faí.—Sāme 145:7; Sel. 31:12.