ʻE Lava Ke Ke Feʻunuʻaki Hoʻo Taimi-Tēpilé?
1. Ko e hā ʻoku totonu ai ke tau feʻunuʻaki ʻetau taimi-tēpile ki he malangá?
1 ʻI he tuʻunga ko e kau Kalisitiane moʻoní, kuo tau tali ai ha fakaafe ke hoko ko e kau “toutai tangata.” (Mt. 4:19) ʻI he hangē ko ha kau tangata toutaí, ngalingali te tau maʻu ʻa e ngaahi ola lelei ange ʻi he toutai tangatá kapau ʻoku tau fakataimitēpileʻi ʻa e taimi ke malanga ai ʻi hono maʻu ʻa e kakaí. ʻOku ʻaonga eni tautefito ʻi he lolotonga ʻo e ngaahi māhina ʻo e ngāue makehé. ʻI he efiafí mo e tūmāmá, ʻoku tokolahi ange ai ʻa e kakaí ʻi ʻapi. ʻOku ʻikai ai te nau faʻa femoʻuekina pea nau hehema ange ai ke tali ʻa e kau ʻaʻahí. ʻE lava ke ke feʻunuʻaki hoʻo taimi-tēpilé ke malanga ʻi he ngaahi taimi ko iá?—1 Kol. 9:23.
2. Ko e hā ʻa e ngaahi founga ʻe niʻihi ʻe lava ke tau aʻu ai ki he kakai tokolahi ange mo e ongoongo leleí?
2 Faifakamoʻoni Efiafi: Ko e palani ki muʻa ke malanga lolotonga ʻa e ngaahi houa efiafí ʻe malava nai ai ke tau aʻu ki he kakai tokolahi ange mo e ongoongo leleí. (Pal. 21:5) ʻE lava nai ai ʻa e toʻutupú ke malanga ʻi he tuku ʻa e akó. ʻE lava nai ai ʻa e niʻihi kehé ke fai ia he tuku ʻa e ngāué. ʻE lava ke fokotuʻutuʻu ʻa e ngaahi kulupu ako tohi ʻe niʻihi ke malanga ʻi ha houa ʻe taha ki muʻa ʻi he ako tohi fakauiké.
3. ʻI he ngaahi founga fē ʻe lava ke ke malanga ai lolotonga ʻa e efiafí mo e ngaahi houa tūmaama ʻi ho feituʻu ngāué?
3 Ko e malanga mei he fale ki he fale lolotonga ʻa e efiafí mo e ngaahi houa tūmāmá ʻe iku nai ai ki he talanoa mo e faʻahinga ko ia ʻoku anga-maheni ʻaki ʻa e ʻikai te nau ʻi ʻapí. ʻI he ngaahi feituʻu lahi, ko e ngāue he halá mo e ngaahi founga kehe ʻo e faifakamoʻoni ki he kakaí ʻe toe lava foki ke fai ia ʻi he efiafí. Pea ʻoku ʻiloʻi ʻe he tokolahi ko e ngaahi efiafí ʻa e taimi lelei taha ke fai ai ʻa e ngaahi toe ʻaʻahi ʻo kamata ʻa e ngaahi ako Tohi Tapú.
4. Ko e hā ʻoku mahuʻinga ai ke fakahaaʻi ʻa e ʻiloʻilo pea ke fakaʻatuʻi ʻi he kau ki he faifakamoʻoni efiafí?
4 Fiemaʻu ʻa e ʻIloʻilo: ʻOku fiemaʻu ʻa e fakafuofua lelei ʻi he kau ki he faifakamoʻoni efiafí. ʻOku faʻa lelei tahá ke fakangatangata pē ʻa e faifakamoʻoní ʻi he ngaahi houa tūmāmá, kae ʻikai ko e ʻaʻahi ʻi he taimi ʻoku teu nai ai ʻa e faʻahinga ʻi he ʻapí ke nau mohé. (Fili. 4:5) ʻI hoʻo tukituki ʻi he matapaá, tuʻu ʻi he feituʻu ʻe lava ke sio atu ai kia koé, pea fakahaaʻi mahino atu koe. ʻAi ke ʻiloʻi vave ʻa e taumuʻa ʻo hoʻo ʻaʻahí. Kapau ʻokú ke ʻaʻahi ʻi ha taimi ʻoku ʻikai faingamālie, hangē ko ia ko e taimi kai ʻa e fāmilí, tala ange te ke toki ʻaʻahi atu ʻi ha taimi kehe. Fakaʻatuʻi maʻu pē.—Mt. 7:12.
5. ʻE lava fēfē ke tau fakaʻehiʻehi mei he ngaahi fakatuʻutāmaki ʻe lava ke hoko lolotonga ʻa e malangá?
5 ʻOku toe fiemaʻu ke tau lāuʻilo ki he ngaahi fakatuʻutāmaki ʻe lava ke hokó. Kapau ʻokú ke faifakamoʻoni ʻi he tūmāmá pe mamalu ʻa e poʻulí, ʻoku fakapotopoto ke fononga tautau toko ua pe ʻi ha ngaahi kulupu. ʻAlu ʻi he ngaahi hala ʻoku maama lelei ʻo ʻikai ai te ke tokotahá. Faifakamoʻoni ʻi he ngaahi feituʻu pē ʻokú ke ongoʻi malu aí. Fakaʻehiʻehi mei he ngaahi feituʻu ʻoku ʻikai nai ke malu ʻi he mamalu ʻa e poʻulí.—Pal. 22:3.
6. Ko e hā ʻa e ngaahi ʻaonga lahi ange ʻe hoko mai nai lolotonga ʻa e faifakamoʻoni efiafí mo e tūmāmá?
6 Ko e faifakamoʻoni lolotonga ʻa e efiafí mo e tūmāmá ʻoku fakaʻatā nai ai kitautolu ke ngāue mo e kau tāimuʻa tokoní mo e tāimuʻa tuʻumaʻú. (Loma 1:12) ʻE lava ke ke feʻunuʻaki hoʻo taimi-tēpilé ke kau ai ʻi he tafaʻaki ko eni ʻo e ngāué?