ʻE Lava Ke Ke Kau ʻi he Faifakamoʻoni Efiafí?

1. Fakatatau ki he mataotao ʻe taha, ko fē taimi naʻe malanga ai ʻa e ʻapositolo ko Paulá mei he fale ki he falé?

¹ Fakatatau ki he tohi Daily Life in Bible Times, ko e ʻapositolo ko Paulá naʻá ne kau ʻi he ngāue fakafaifekau fale ki he falé “mei he 4 efiafí ʻo aʻu ki he poʻulí.” ʻOku ʻikai ke tau ʻilo pe ko e taimi-tēpile anga-maheni eni ʻa Paulá ka ʻoku tau ʻilo naʻe loto-lelei ʻa Paula ke “fai ʻa e meʻa kotoa pē maʻá e ongoongo leleí.” (1 Kol. 9:19-23) Naʻe kau heni ʻene fokotuʻutuʻu ʻa e ngaahi meʻá ke ʻalu mei he fale ki he fale ʻi he taimi naʻe lelei taha ai ke fai peheé.

2. Ko e hā ko ha taimi lelei ai ʻa e ngaahi efiafí ke kau ʻi he ngāue fakafaifekaú?

² Ko e kau malanga ʻi he ngaahi feituʻu lahi ʻoku nau angaʻaki ʻa e ʻalu mei he fale ki he falé ʻi he ngaahi pongipongi lolotonga ʻa e uiké. Neongo ia, ʻi ho feituʻú ʻoku kei hoko eni ko e taimi lelei tahá? ʻOku pehē ʻe ha tokotaha tāimuʻa fekauʻaki mo hono feituʻu ngāué: “ʻOku tātaitaha ke ʻi ai ha taha ʻi ʻapi he lolotonga ʻa e ʻahó. Ka ko e tokolahi tahá ʻoku nau ʻi ʻapi he efiafí.” Ko e faifakamoʻoni efiafí ʻokú ne ʻomai nai ʻa e taimi lelei taha ke aʻu ai tautefito ki he kakai tangatá mo e ongoongo leleí. Ko e faʻahinga ʻi ʻapí ʻoku nau faʻa nonga mo loto-lelei ange ke fetalanoaʻaki. Kapau ʻoku ʻaonga ke fai ia, ʻoku totonu ki he kau mātuʻá ke nau fokotuʻu ʻa e ngaahi fakataha malanga ki he efiafí.

3. ʻE anga-fēfē haʻatau fakahāhā ʻa e ʻiloʻiló ʻi heʻetau kau atu ʻi he faifakamoʻoni efiafí?

³ Ngāueʻaki ʻa e ʻIloʻiló: ʻI he kau atu ʻi he faifakamoʻoni efiafí, ko e ʻiloʻiló ʻoku mahuʻinga. Ko e fakatātaá, tau pehē kapau te ke ʻaʻahi ki ha taha ʻi ha taimi ʻikai feʻungamālie, hangē ko e lolotonga ʻo e kai efiafí, ʻoku lelei tahá ke kole ange ke toe foki mai ʻamui ange. Kapau kuo poʻuli, tuʻu ʻi ha feituʻu ʻe sio atu ai ʻa e tokotaha ʻapí kiate koe pea fakamatalaʻi fakavave koe mo e taumuʻa ʻo hoʻo ʻaʻahí. ʻOku toe fakapotopoto ke ngāue toko ua pe ʻi ha ngaahi kulupu pea ngāue ʻi he ngaahi hala ʻoku maama ʻo ʻikai maomaonganoa. ʻOua te ke ʻaʻahi kuo fuʻu poʻuli naʻá ke fakahohaʻasi ʻa e tokotaha ʻapí ʻi heʻene te u ke mohé. (2 Kol. 6:3) Kapau ko ha feituʻu ʻoku ʻikai malu ʻi he mamalu ʻa e poʻulí, malanga ai lolotonga ʻoku kei ʻahó.—Pal. 22:3.

4. Ko e hā ʻa e ngaahi tāpuaki ʻoku haʻu mei he faifakamoʻoni efiafí?

⁴ Ngaahi Tāpuaki: Ko e ngāue fakafaifekaú ʻoku toe fakafiefia lahi ange ʻi he taimi ʻoku tau lava ai ke fai ha fakamoʻoni. Pea ko e lahi ange ʻa e lava ke tau faifakamoʻoní, ko e lahi ange ia ʻa e ngaahi faingamālie te tau maʻu ke tokoniʻi ʻa e niʻihi kehé ke ‘‘fakahaofi pea ke nau aʻusia ha ʻilo totonu ki he moʻoní.’’ (1 Tīm. 2:3, 4) ʻE lava ke feʻunuʻaki hoʻo taimi tēpilé ke kau he faifakamoʻoni efiafí?