Kuó Ke ʻAhiʻahiʻi ʻa e Faifakamoʻoni he Efiafí?

¹ Ko kitautolu kotoa ʻoku tau maʻu ʻa e fiefia ʻi he hoko ʻo fua lelei ʻi heʻetau ngāué. ʻI he tafaʻaki ʻe tahá, ʻi he taimi ʻoku ʻikai malava ai ke tau sio ki ha ngaahi ola pau, ʻe lava ke hoko ʻa e ngāué ʻo fakafiu pea ʻikai fakahoko. Ko e ngāue mohu ʻuhingá ʻoku fakapaleʻi fakafoʻituitui, pea ko ha tāpuaki ia. (Fakafehoanaki mo Koheleti 3:​10-13.) ʻE lava ke tau ngāueʻaki ʻa e tefitoʻi moʻoni ko ʻení ki heʻetau ngāue fakamalangá. ʻOku tau ʻilo mei he ngaahi meʻa ʻoku hokosia ʻi he taimi ʻoku tau ʻalu atu ai mei he matapā ki he matapā pea lava ke tau lea ki he kakaí ʻo kau ki he Tohitapú, ʻoku tau ongoʻi fakafoʻou fakalaumālie ʻi heʻetau foki ki ʻapí. ʻOku tau ongoʻi naʻa tau lavaʻi moʻoni ha meʻa.

² ʻI he ngaahi feituʻu ʻe niʻihi ʻoku hoko ʻo fuʻu faingataʻa ke maʻu ʻa e kakaí ki ʻapi he lolotonga ʻo e ngaahi houa ʻo e ʻahó. ʻOku fakahā ʻe he ngaahi lipootí, ʻi he ngaahi feituʻu lahi ʻoku laka hake he peseti ʻe 50 ʻo e kakaí ʻoku ʻikai ke ʻi ʻapi he taimi ʻoku tau ʻaʻahi atu ai he taimi ʻahó. Ko e ngaahi fakatahaʻanga lahi ʻoku nau fekuki mo e palopalemá ni ʻaki hono fai ha ngaahi fokotuʻutuʻu ki he fakamoʻoni he efiafí, pea kuo nau maʻu ha lavameʻa lelei. ʻOku fakamatala ʻe he kau malangá ʻo pehē ʻi he taimi ʻoku nau ʻaʻahi ai he efiafí, ʻoku tokolahi ʻa e kakai ʻoku nau ʻi ʻapí, pea ʻi he lahi tahá, ko e kakaí ʻoku nau hehema ke fiemālie ange pea mo fiefanongo ange ki he pōpoaki ʻo e Puleʻangá. Kuó ke ʻahiʻahiʻi ʻa e faifakamoʻoni he efiafí ʻi ho feituʻú?​—Fakafehoanaki mo Maʻake 1:​32-34.

³ Fokotuʻu ʻe he Kau Mātuʻá ʻa e Faifakamoʻoni he Efiafí: ʻI he ngaahi feituʻu ʻe niʻihi ko e ngaahi fakataha ki he ngāue fakamalanga he efiafí pe kamata ke efiafi poʻulí kuo poupouʻi lelei. ʻE lava ke fai ha tokanga ki he kau malanga kei talavou ʻoku nau ʻatā mei he ʻapiakó ʻi he efiafí pea ki he kakai lalahi kuo ʻosi ʻenau ngāue ʻi he māmaní ʻamui ange. Ko e kau malanga ʻe niʻihi ʻoku ʻikai malava ke nau kau ki he ngāue fakamalangá he fakaʻosinga ʻo e uiké ʻoku nau ʻiloʻi ko e faifakamoʻoni he efiafí he lolotonga ʻo e uiké ko ha founga ʻaonga ia kiate kinautolu ke nau kau maʻu pē ʻi he ngāue fakamalangá.

⁴ ʻOku ʻi ai ʻa e ngaahi ngāue kehekehe ʻe lava ke ke kau ki ai he lolotonga ʻa e faifakamoʻoni he efiafí. ʻE lava ke ke faifakamoʻoni mei he fale ki he fale mo e ngaahi makasiní pe ngāueʻaki ʻa e tohi ʻoku tuʻuaki he māhina ko iá. Ko e efiafí ko ha taimi lelei ia ke ʻaʻahi ai ki he kakai naʻe ʻikai te nau ʻi ʻapi ʻi he taimi naʻe ʻaʻahi atu ai ʻa e kau malangá he taimi ʻahó pe fakaʻosinga ʻo e uiké. ʻE ʻi ai nai ha feituʻu lelei ki he faifakamoʻoni he halá, ʻo ʻatā ai kiate koe ke fetuʻutaki mo e kakai ʻoku foki ki ʻapi mei he ngāué. ʻOku ʻilo ʻe he tokolahi ko e efiafí ko e taimi lelei ia ke fai ha ngaahi toe ʻaʻahi ki he faʻahinga kuo nau fakahā ha mahuʻingaʻia.

⁵ Ke Tokanga pea Fakapotopoto: Ko e ʻalu atu he taimi fakapōpōʻulí pe poʻulí ʻe fakatuʻutāmaki ia ʻi he ngaahi feituʻu ʻe niʻihi. ʻOku fakapotopoto ke fononga tautau toko ua pe fakakulupu ʻi he ngaahi hala ʻoku maamá pea ʻaʻahi ki he ngaahi ʻapí ʻi he taimi pē ʻoku ʻi ai ha loto-pau te ke malu. ʻI he taimi ʻokú ke tukituki ai he matapaá, tuʻu ʻi ha feituʻu ʻe lava ke fai ha sio atu kiate koe, pea fakahāhaaʻi mahino koe. Ke fakapotopoto. ʻI he taimi ʻokú ke fakatokangaʻi ai ʻokú ke ʻaʻahi atu ʻi ha taimi ʻoku ʻikai faingamālie, hangē ko e taimi kai ʻa e fāmilí, tala ange te ke ʻaʻahi atu ha taimi kehe. ʻOku faʻa lelei ange ke fakangatangata hoʻo faifakamoʻoní ki he kamata ʻo e houa efiafí, ʻo ʻikai ko hano fai ha ʻaʻahi ʻe fuʻu tōmui, ʻi he taimi ʻoku kamata nai ai ʻa e tokotaha-ʻapí ke mālōlō he poʻulí.

⁶ Ko e faʻahitaʻu ʻafuá ʻoku mātuʻaki feʻungamālie ki he faifakamoʻoni he efiafí. ʻI heʻetau fai ki he ʻOtuá ʻa e “ngāue toputapú ʻi he ʻaho mo e pō,” ʻe tāpuakiʻi moʻoni ʻe Sihova ʻetau ngaahi feingá.​—Fkh. 7:​15, NW.