Feingangāue Makehe ʻi ʻOkatopa 16 ki Nōvema 12!

¹ “Ko e Ngataʻanga ʻo e Lotu Loí ʻOku Ofi!” Ko e ʻuluʻi-kaveinga ia ʻo e Ongoongo ʻo e Puleʻangá Fika 37, ʻa ia ʻe tufaki takai ʻi he māmaní ʻo kamata ʻi he māhina ka tuʻú. ʻI he lolotonga ʻo e ʻuluaki konga ʻo ʻOkatopá, te tau tuʻuaki ai ʻa e ngaahi makasini Taua Leʻo mo e ʻĀ Hake! Kamata he Mōnite ʻo ʻOkatopa 16 ki he Sāpate ʻo Nōvema 12, te tau kau atu ai ki hono tufaki lahi ʻa e Ongoongo ʻo e Puleʻangá Fika 37. ʻI he ngaahi fakaʻosinga uike he lolotonga ʻo e feingangāué, te tau tuʻuaki fakataha ai ia mo e ngaahi makasini lolotongá.

² Faʻahinga ʻe Lava Ke Nau Kau ki Aí: Ko kinautolu kotoa ʻoku nau malangaʻi longomoʻui ʻa e ongoongo leleí te nau saiʻia ke kau kakato ki ai. ʻE malava ʻa e niʻihi ke tāimuʻa tokoni. ʻOku ʻi ai haʻo fānau pe kau ako Tohi Tapu ʻoku nau laka ki muʻa fakalaumālie? Tokoniʻi kinautolu ke nau fakalea ki he kau mātuʻá ke sio pe ʻoku nau taau ke hoko ko ha kau malanga teʻeki papitaiso. ʻOku totonu ke tomuʻa talanoa ʻa e kau mātuʻá mo e kau malanga ʻikai longomoʻuí koeʻuhi ke fakaʻaiʻai kinautolu ke nau kau ki ai, ʻo ngāue fakataha nai mo e kau malanga taukeí.

³ ʻE ʻoatu ki he fakatahaʻanga kotoa pē ha tatau ʻo e Ongoongo ʻo e Puleʻangá Fika 37 koeʻuhi ke lava ʻo maʻu ʻe he kau malangá mo e kau tāimuʻá ʻo ʻikai siʻi hifo he tatau ʻe 50. ʻE maʻu nai ʻe he faʻahinga mahuʻingaʻia ka kuo teʻeki ai ke nau hoko ko e kau malangá ha tatau ʻe nima ke tufa ki he ngaahi mēmipa ʻo e fāmilí mo e ngaahi kaungāmeʻá. ʻOku totonu ke tauhi ʻe he tokotaha kotoa ha lēkooti ʻo e lahi kuo nau tufá pea hikiʻi ia ʻi mui ʻi heʻenau ngaahi līpooti ngāue fakamalanga ʻi he ngataʻanga ʻo ʻOkatopa mo Nōvemá. ʻE lēkooti ʻe he sekelitalí ʻa e fakakātoa ʻo e meʻa kuo tufa ʻe he fakatahaʻangá pea fakahā ia ki he ʻōfisi vaʻá ʻi he ngataʻanga ʻo e māhina taki taha. Ko ha ngaahi tatau pē ʻo e Ongoongo ʻo e Puleʻangá ʻe toe ʻi he hili ʻa e feingangāué ʻe ngāueʻaki nai ia ʻi ha tafaʻaki pē ʻo e ngāue fakafaifekaú.

⁴ Meʻa ke Leaʻakí: ʻAi ke nounou hoʻo tuʻuakí, koeʻuhi he ʻe lahi ange ai ʻa hono tufaki ʻo e pōpoakí. ʻE lava ke ke pehē: “ʻI he tuʻunga ko ha ngāue tokoni ki he kakaí, ʻoku ou kau ʻi hono tufaki ʻi māmani lahi ʻa e pōpoaki mahuʻinga ko ʻení. Ko hoʻo tatau taʻetotongi ʻeni. Kātaki ʻo lau ia.” ʻE lelei ange nai ke ʻoua ʻe toʻotoʻo ha kato malanga. Fakapapauʻi ke tauhi ha lēkooti ʻo e faʻahinga mahuʻingaʻia ʻe maʻú.

⁵ Founga ke ʻOsiki Ai Ho Feituʻu Ngāué: ʻI he ʻikai ke tufaki ʻa e Ongoongo ʻo e Puleʻangá ʻi he ngāue he halá, tokangataha ke ʻosiki ʻa hono ngāueʻi ʻa e ngaahi ʻapí mo e ngaahi feituʻu pisinisí ʻo ka malava. Hikiʻi ʻa e ngaahi ʻapi ʻoku ʻikai ʻi ai ha tahá, pea feinga ke toe foki ki ai ʻi ha taimi kehe pe ko ha ʻaho kehe ʻi he uiké. Kamata ʻi he Mōnite ʻo Nōvema 6, ʻe tuku nai ai ha tatau ʻi he ngaahi ʻapi ʻoku ʻikai ʻi ai ha tahá. Kae kehe, kapau ʻoku lahi ange ʻa e feituʻu ngāue ia ʻa e fakatahaʻangá ke ʻosiki ʻi he vahaʻa taimi kuo vaheʻí, ʻe fakapapauʻi nai ʻe he kau mātuʻá ʻoku totonu ke tuku ʻa e Ongoongo ʻo e Puleʻangá ʻi he ngaahi ʻapi ʻoku ʻikai ʻi ai ha tahá ʻi he lolotonga ʻo e feingangāué fakakātoa.

⁶ ʻOku ofi ʻaupito ʻa e fakaʻauha ʻo “Pāpilone ko e Lahi.” ʻOku fiemaʻu ki he kakaí ke nau mavahe mei ai ki muʻa ke fakaʻauha fakaʻaufuli iá. (Fkh. 14:​8, NW; 18:8) Fai ha palani he taimí ni ke kau kakato ki he feingangāue fakaemāmanilahi ko ʻení ke ʻai ke ʻilo ʻe he tokotaha kotoa ʻoku ofi ʻa e ngataʻanga ʻo e lotu loí!