Fai Hono Tufaki Lahi Atu ʻa e Ongoongo ʻo e Puleʻangá Fika 35

¹ Ko ʻOkatopa mo Nōvema ʻe hoko ia ko e ongo māhina moʻumoʻua kiate kitautolu kotoa pē. ʻI he lolotonga ʻo e ʻuluaki ʻaho ʻe 11 ʻo ʻOkatopá, te tau tuʻuaki ai ʻa e ngaahi tatau tāutaha ʻo e Taua Leʻo mo e Awake! Hili iá, mei he Sāpate, ʻOkatopa 12, ʻo aʻu ki he Sāpate, Nōvema 16, te tau kau ai ki hono tufaki ʻi māmani lahi ʻa e Ongoongo ʻo e Puleʻangá Fika 35. ʻE hoko ia ko e monū kiate kitautolu ke tau ʻave ha pōpoaki mahuʻinga ki he kotoa ʻo e kakai ʻi hotau feituʻú. Ko e tali ia ki he fehuʻi, “ʻE Feʻofaʻaki Kotoa Koā ʻa e Kakaí?” ʻI he lolotonga ʻo e feingangāue makehe ko ʻení, te tau tufaki atu ai ʻa e Ongoongo ʻo e Puleʻangá Fika 35 ʻi he ngaahi ʻaho ʻo e uiké. ʻI he fakaʻosinga ʻo e uiké, ʻo tānaki atu ki hono tuʻuaki ʻa e Ongoongo ʻo e Puleʻangá, te tau fakaeʻa ai ʻa e ngaahi tatau lolotonga ʻo e ngaahi makasiní.

² Ko Hai ʻE Lava ke Kau Ki Ai? Hangē ko ia ʻoku angamaheniʻakí, ʻe takimuʻa ʻa e kau mātuʻá ʻi he ngāué. ʻOku fiefia ʻa e tokotaha kotoa pē ʻi hono tufaki atu ʻa e Ongoongo ʻo e Puleʻangá, pea ʻoku ʻikai ha toe veiveiua ko ha fuʻu tokolahi ʻo e kau malangá te nau kau ki he tāimuʻa tokoní he lolotonga ʻo e māhina ʻe taha pe fakatouʻosi ʻo e ongo māhina ʻo e feingangāué. Ko e kau malanga ʻe niʻihi te nau fiemaʻu ke fakamoleki ha taimi lahi ange ʻo hangē ko ia ʻoku angaʻaki ʻi he ngāue fakafaifekaú.

³ ʻOku ʻi ai haʻo tokotaha ako Tohitapu kuo mei ʻosi ʻene ako ʻa e tohi ʻIlo pea ʻe vavé ni ʻene taau ke kau ki he ngāue fakamalangá? Mahalo ʻe lava ke ne hoko ko ha tokotaha malanga teʻeki papitaiso ʻi ha taimi feʻunga, ki muʻa ke ne kau ʻi he feingangāue ki he Ongoongo ʻo e Puleʻangá. Ko ha tuʻuaki faingofua pē ʻoku fiemaʻu ki hono tuʻuaki ʻa e tulekí. Ko e fakatātaá, ʻe pehē nai ʻe ha taha: “Ko e pōpoaki ko ʻení ʻoku fuʻu mahuʻinga ʻa ia ʻoku tufaki ʻi māmani lahi ʻi he māhiná ni ʻi he ngaahi lea ʻe 169. Te u saiʻia ke ke maʻu haʻo tatau pē ʻaʻau.” Naʻa mo e fānau tupú ʻe lava ke nau kau mohu ʻuhinga ki he ngāue fakafiefia ko ʻení.

⁴ ʻOku totonu ki he kau faiako ʻi he kulupu ako Tohí ke nau fakalototoʻaʻi ʻa e mēmipa kotoa pē ʻi heʻenau kulupú ke nau kau kakato ʻi hono tufaki ʻo e Ongoongo ʻo e Puleʻangá Fika 35. ʻOku ʻi ai nai ha kau malanga kuo nau hoko ʻo ʻikai ke longomoʻui, ka te nau toe kau longomoʻui ʻi he ngāue fakamalangá kapau te nau maʻu ʻa e fakalototoʻa ʻoku fiemaʻú. Ki muʻa ʻi he feingangāué, ʻoku totonu ki he kau mātuʻá ke nau ʻaʻahi ki he faʻahinga pehē tāutaha ke sio pe ko e hā ʻe lava ke faí ke tokoniʻi kinautolu ke nau ngāue mo ha kau malanga taukei ʻi hono fai ʻa e tafaʻaki ko ʻeni ʻo e ngāue fakafaifekaú.

⁵ Ko Fē ʻa e Taimi Nai ke Tau Fakataha Ai ki he Ngāue Fakamalangá? Ko e ngāue kotoa ko ʻení ʻe fiemaʻu ki ai ʻa e ngaahi fokotuʻutuʻu faifakamoʻoni ʻa e kulupú ʻa ia ʻoku faingamālie mo ʻaonga fakatouʻosi. Kapau ʻe ala lava, ko e ngaahi fakataha ki he ngāue fakamalangá ʻoku totonu ke fokotuʻutuʻu maau ki he ʻaho ʻo e uike taki taha, ʻi he fakaʻosinga ʻo e uiké, pea ʻi he efiafí. ʻOku totonu ke fai ia ʻi he taimi ʻe lava ai ʻa e kau malangá mo e kau tāimuʻá ke nau kau kakato ki he vahaʻa taimi ʻo e faifakamoʻoní. ʻE toe fai nai foki mo e ngaahi fokotuʻutuʻu ke fai ha fakataha ʻi he efiafí koeʻuhi ke ʻaonga ki he kau akó pea mo e niʻihi kehé. ʻOku totonu ki he ʻovasia ngāué ke ne fakapapauʻi ʻe lahi pē ʻa e fale-ki-he-fale mo e feituʻu pisinisi ʻoku ala maʻú koeʻuhi ke lava ʻa e tokotaha kotoa pē ʻo kau kakato ki he ngāué. Kapau ʻoku tokolahi ha kau malanga ʻi ha feituʻu, ʻoku totonu ke fakapotopoto fekauʻaki mo e tokolahi ʻoku ngāue ʻi he konga pē ʻe taha ʻo e feituʻú.

⁶ Fēfē ʻa e ʻIkai-ʻi-ʻApí? ʻOku tau fiemaʻu ke tau lea tāutaha ki he lahi taha ʻo e kakai ʻe malavá ke fakamatalaʻi ki ai ʻa e ʻuhinga ʻoku totonu ai ke nau lau ʻa e Ongoongo ʻo e Puleʻangá Fika 35. Ko ia, kapau ʻoku ʻikai ha taha ʻi he ʻapí ʻi hoʻo ʻaʻahi atú, tohiʻi ʻa e tuʻasilá pea toe foki ki ai ʻi ha taimi kehe ʻo e ʻahó. Kapau ʻe aʻu ki he uike fakaʻosi ʻo e feingangāué, ʻoku ʻikai pē lavameʻa hoʻo feinga ke fetuʻutaki ki he kakai ko iá, te ke tuku nai ha tatau ʻo e Ongoongo ʻo e Puleʻangá ʻi he lalo matapaá ʻi ha feituʻu ko ia ʻe ʻikai ke lava ha sio ki ai ʻa e faʻahinga ʻoku ʻalu holó. ʻI he ngaahi feituʻu nofoʻangá, tokanga ke tuʻuaki ʻa e Ongoongo ʻo e Puleʻangá ki he tokotaha tāutaha ʻoku feʻaluʻaki holo nai he halá. ʻI he ngāue ki he ngaahi ʻotu motú mo e ngaahi koló ʻa ia ʻe ʻikai malava ke ke toe foki ki ai he lolotonga ʻo e taimi ki he feingangāué, ko ha tatau ʻo e Ongoongo ʻo e Puleʻangá ke tuku nai ʻi he ʻikai-ʻi-ʻapí ʻi he ʻuluaki ʻaʻahí.

⁷ Ko e Hā ʻEtau Taumuʻá? ʻOku totonu ki he ngaahi fakatahaʻangá ke nau feinga ke ngāueʻaki kotoa ʻenau tatau ʻo e Ongoongo ʻo e Puleʻangá ke ngāueʻi kotoa ʻa honau feituʻú ki muʻa ke ngata ʻa e feingangāué ʻi Nōvema 16. Kapau ko e feituʻu ʻoku vaheʻi ki hoʻo fakatahaʻangá ʻoku lahi pea ʻoku malu pē ke ke ngāue tokotaha ʻo ʻikai mo ha taha kehe, te ke ʻilo nai ʻoku ʻaonga ke fai pehē. ʻE malava ai heni kiate koe ke ke aʻu ki he lahi taha ʻo e faʻahinga ʻoku taau ʻe ala lavá mo e ongoongo leleí. (Mt. 10:11) ʻE lelei nai ke toʻotoʻo ha ngaahi tuleki ʻe niʻihi ʻi ho nimá pea mo ha Tohitapu ʻi he kato ho kofú pe peesí, kae ʻikai ko hano ngāueʻaki ha kato lahi. Fakapapauʻi ke tauhi ha lēkooti lelei ʻo e mahuʻingaʻia naʻe maʻú.

⁸ ʻOkú Ke Mateuteu ke Kamata? ʻOku totonu ke ʻilo ʻe he kau mātuʻá ʻa e lahi ʻo e toe ngaahi makasini ʻe fiemaʻu ʻe he fakatahaʻangá pea ʻoku totonu ke ʻota ʻo fakatatau pē ki ai. ʻOku ʻikai fiemaʻu ke ʻota ʻa e Ongoongo ʻo e Puleʻangá Fika 35, koeʻuhi ʻe ʻoatu ki he fakatahaʻanga taki taha ʻa e utá. Ko e kau tāimuʻa makehé, tuʻumaʻú, pea mo e tāimuʻa tokoní te nau maʻu taki taha ʻa e ngaahi tatau ʻe 250 ke tufaki, lolotonga iá ko e kau malanga ʻi he fakatahaʻangá ʻe ʻoatu kiate kinautolu ʻa e ngaahi tatau ʻe 50 ki he tokotaha taki taha. ʻOku tau maʻu ʻetau ngāue kuo vaheʻi mai kiate kitautolú. ʻOkú ke loto-vēkeveke ke ke kau ʻi he ngāue fakafiefia ko ʻení? ʻOku ʻikai ha veiveiua ʻoku pehē. Tau ʻoatu muʻa ʻa e pōpoaki makatuʻunga ʻi he Tohitapú ʻi he Ongoongo ʻo e Puleʻangá Fika 35 ki he lahi taha ʻe malava ke tau tufaki atu aí!