Kuo Tuku Mai ha Koloa
1 Naʻe fakamahuʻingaʻi ʻe he ʻapositolo ko Paulá ʻa hono fekauʻi faka-ʻOtua ia ke malangá ʻo ne lave ai ki ai ko ha “koloa.” (2 Kol. 4:7) Naʻá ne kātekina ʻa e ngaahi faingataʻa mo e fakatanga ʻi hono fakahoko ʻa e fekau ko iá. Naʻá ne malanga taʻetuku ki ha taha pē naʻá ne maʻu. Naʻá ne fononga ʻi he laui maile lahi ʻi he faingataʻa mo e fakatuʻutāmaki ʻi ʻuta mo tahi. ʻE lava fēfē ke tau faʻifaʻitaki kia Paula pea fakahaaʻi ʻoku tau fakamahuʻingaʻi ʻetau ngāue fakafaifekaú? (Loma 11:13) Ko e hā ʻokú ne ʻai ʻetau ngāue fakafaifekaú ko ha koloa taʻealafakatatauá?
2 Ko ha Koloa Fungani: Ko e ngaahi koloa fakamāmaní ʻoku faʻa haʻu fakataha ia mo e loto-mamahi lahi pea ʻoku fakangatangata pe fakataimi pē hono ngaahi ʻaongá. ʻI he tafaʻaki ʻe tahá, ʻoku ʻomai ʻe heʻetau ngāue fakafaifekaú ʻa e ngaahi ʻaonga tuʻuloa kia kitautolu mo e niʻihi kehé. (1 Tim. 4:16) ʻOku tokoni ia ki he kakai loto-moʻoní ke nau ʻiloʻi ʻa Sihova, fai ʻa e ngaahi liliu ʻoku fiemaʻu ʻi heʻenau moʻuí, pea maʻu ʻa e ʻamanaki moʻoni ʻo e moʻui taʻengatá. (Loma 10:13-15) ʻI hono fakamahuʻingaʻi lahi ʻetau ngāue fakafaifekaú, ʻoku tau maʻu ai ha taumuʻa fakafiemālie ʻi he moʻuí, ko ha ongoʻi tuʻuloa ʻo e lavameʻa pea mo ha ʻamanaki fakafiefia ki he kahaʻú.—1 Kol. 15:58.
3 Fakahāhā ʻOkú Ke Fakamahuʻingaʻi Hoʻo Koloá: Ko e mahuʻinga ʻo ha meʻa kia kitautolu ʻoku faʻa hā ia ʻi he meʻa ʻoku tau loto-lelei ke fakamoleki ʻi he meʻa ko iá. Ko ha monū moʻoni ke ngāueʻaki hotau taimí mo e iví ke fakahīkihikiʻi ai ʻa Sihova! (Ef. 5:16, 17) Ko e anga ʻo ʻetau ngāueʻaki hotau taimí ʻoku totonu ke hā mei ai ʻoku tau fakamahuʻingaʻi lahi ange ai ʻa e ngaahi meʻa fakalaumālié ʻi he ngaahi meʻa fakamatelié. Koeʻuhi ʻoku ʻi ai ʻa e meʻa mātuʻaki mahuʻinga ke tau vahevahe atu, te tau loto ai ke malanga faivelenga mo tokanga ke tala ʻa e ongoongo leleí ʻi he faingamālie kotoa pē.
4 Ko e ngaahi koloa mahuʻingá ʻoku ʻikai ke faʻa fufū ka ʻoku fakaʻaliʻali ia ke mamata ki ai ʻa e niʻihi kehé. Kapau ʻoku tau vakai ki heʻetau ngāue fakafaifekaú ko ha koloa, ʻe hoko ia ko ha tafaʻaki tuʻu-ki-muʻa ʻi heʻetau moʻuí. (Mt. 5:14-16) ʻI ha loto ʻoku fonu ʻi he houngaʻia, ʻofa ke tau faʻifaʻitaki maʻu pē ki he ʻapositolo ko Paulá pea ngāueʻaongaʻaki ʻa e faingamālie kotoa pē ke fakahaaʻi ʻoku tau fakamahuʻingaʻi moʻoni ʻetau ngāue fakafaifekaú ʻo hangē ha koloá.