Fakamahuʻingaʻi Ho Monū ʻo e Ngāué
1. ʻOku anga-fēfē vakai ʻa e tokolahi ʻi he māmaní ki heʻetau ngāue fakamalangá?
1 Ko e tokolahi ʻi he māmani ʻo Sētané ʻoku nau vakai ki heʻetau ngāue fakamalangá ko e “vale.” (1 Kol. 1:18-21) Kapau heʻikai ke tau tokanga, ko e vakai fehālaaki ko ení ʻe lava ke fakatupu loto-siʻi pea ʻe hōloa ai ʻetau faivelengá. (Pal. 24:10; Ai. 5:20) Ko e hā ʻa e ngaahi ʻuhinga ke fakamahuʻingaʻi ai hotau monū ʻo e hoko ko e Kau Fakamoʻoni ʻa Sihová?—Ai. 43:10.
2. Ko e hā ʻe lava ai ke ui ʻa e ngāue fakafaifekaú ko ha ngāue toputapú?
2 Ko ha Ngāue Toputapu: Naʻe fakamatalaʻi ʻe he ʻapositolo ko Paulá ko e ngāue fakafaifekaú ko ha ngāue ʻa e taulaʻeikí ʻo lave ki he meʻa ʻoku tau fai ki he ʻOtuá. (Loma 15:15, 16) ʻOku anga-fēfē hoko ʻa e ngāue fakafaifekaú ko ha ngāue toputapu? Ko e kau ki aí ʻoku ʻai ai kitautolu ko e “kaungāngaue” mo e “Toko Taha Maʻoniʻoni,” ʻa Sihova, ʻo tau tokoni ai ki hono fakamāʻoniʻoniʻi ʻa hono huafá. (1 Kol. 3:9; 1 Pita 1:15) ʻOku vakai mai ʻa Sihova ki heʻetau ngāue fakamalangá ko ha “feilaulau fakafetaʻi,” ko ia ko e ngāue fakafaifekaú ko ha tafaʻaki mātuʻaki mahuʻinga ia ʻo ʻetau lotú.—Hep. 13:15.
3. Ko e hā ʻokú ne ʻai ʻa hono malangaʻi ʻa e ongoongo leleí ko ha lāngilangi lahí?
3 Ko hono malangaʻi ʻa e ongoongo leleí ko ha lāngilangi lahi ia ʻa ia ko e kiʻi tokosiʻi pē ʻoku nau maʻú. Ko e kau ʻāngeló te nau tokangaʻi fiefia ha vāhenga-ngāue pehē pea ʻoku ʻikai ha veiveiua te nau fakahoko lelei ʻaupito ia. (1 Pita 1:12) Kae kehe, kuo fili ʻe Sihova kitautolu faʻahinga taʻehaohaoa ʻo e tangatá, ko e “gaahi ibu umea,” ki he monū fakaofo ko ení!—2 Kol. 4:7, PM.
4. ʻE lava fēfē ke tau fakahāhā ʻoku tau fakamahuʻingaʻi ʻa e ngāue fakafaifekaú?
4 Ko ha Meʻa Muʻomuʻa: Koeʻuhi ʻoku tau fakamahuʻingaʻi moʻoni hotau monuú, ʻoku tau vakai ki he ngāue fakafaifekaú ko e taha ia ʻo e “ngaahi meʻa ʻoku lelei lahi” pe mahuʻinga ange ʻi heʻetau moʻuí. (Fili. 1:10) Ko ia ai, ʻoku tau fakataimitēpileʻi ha taimi ʻi he uike taki taha ke kau ai ki ai. Ko ha tokotaha tā meʻalea ʻa ia ʻokú ne fakamahuʻingaʻi ʻa hono monū ke tā ʻi ha kau tā meʻalea ʻiloa he māmaní te ne teuteu ki he fakaʻaliʻali taki taha pea ngāue ke fakatupulekina ʻene pōtoʻí. ʻI he tuʻunga meimei tatau, te tau teuteu ki muʻa ke ʻalu ʻi he ngāue fakafaifekaú koeʻuhi ke lava ʻo tau “tofa totonu ʻa e folofola ʻo e moʻoni,” pea te tau ngāue ke fakaleleiʻi ʻetau ‘pōtoʻi fakafaiakó.’—2 Tim 2:15; 4:2, NW.
5. Ko hai ʻokú ne fakahoungaʻi ʻetau ngāue fakafaifekaú?
5 ʻOua ʻe ʻai ʻa e vakai ʻa e kakai tokolahi tahá ke ne fakalotosiʻiʻi koe. Manatuʻi ʻoku kei ʻi ai ʻa e tokolahi ʻi hotau feituʻu ngāué ʻoku nau houngaʻia ʻi heʻetau ngaahi ʻaʻahí. Kae kehe, ʻoku ʻikai ko e leleiʻia ʻa e tangatá ʻoku tau kumi ki aí. Ko e meʻa ʻoku mahuʻinga mamaʻo angé ko e anga ʻo e ongoʻi ʻa Sihová, pea ʻokú ne fakamahuʻingaʻi lahi ʻetau ngaahi feinga tōtōiví.—Ai. 52:7.