Akoʻi Hoʻo Fānaú Ke Nau Fakahīkihikiʻi ʻa Sihova
1. ʻE lava ke fakahīkihikiʻi ʻe he fānau īkí ʻa Sihova?
1 ʻOku fakalototoʻaʻi mai ʻi he Sāme 148:12, 13 ʻa e tamaiki tangatá mo e tamaiki fefiné ke nau “fakamaloʻia [pe fakahīkihikiʻi] ʻa e huafa ʻo e ʻEiki” pe Sihová. ʻOku maʻu ʻi he Tohi Tapú ʻa e ngaahi faʻifaʻitakiʻanga ʻo e fānau iiki naʻa nau fai pehē. Ko e fakatātaá, “ko Samiuela naʻe fai ngaue ʻi he ʻao ʻo Sihova, ko e tamasiʻi pe.” (1 Sam. 2:18) Ko “ha kiʻi taʻahine” naʻá ne tala ki he uaifi ʻo Neamaní ko e palōfita ʻa Sihova ʻi ʻIsilelí te ne lava ke fakamaʻa ʻa e kilia ʻo Neamaní. (2 Tuʻi 5:1-3) ʻI he hū atu ʻa Sīsū ki he temipalé ʻo fakahoko ai ʻa e ngaahi ngāue maná, naʻe kalanga ai ʻa e “tamaiki” tangatá: “Hosana ki he Hako ʻo Tevita”! (Mt. 21:15) ʻE lava fēfē ke akoʻi ʻe he ngaahi mātuʻá ʻenau fānaú ke nau fakahīkihikiʻi ʻa Sihova?
2. Ko e hā ʻoku mahuʻinga ai ki he ngaahi mātuʻá ke nau fokotuʻu ha faʻifaʻitakiʻanga lelei ki heʻenau fānaú?
2 Faʻifaʻitakiʻanga: Ki muʻa ke akoʻi ʻa e moʻoní ki he loto ʻo ʻenau fānaú, naʻe tomuʻa fakahinohinoʻi ʻa e ngaahi tamai ʻIsilelí ke nau ʻofa kia Sihova pea ʻai ʻa ʻene ngaahi fekaú ki honau lotó tonu. (Teu. 6:5-9) Kapau te ke talanoa fakalototoʻa ʻo kau ki he ngāue fakafaifekaú pea ʻai ia ko ha konga ʻo hoʻo taimi-tēpile fakauiké, ʻe hehema ai hoʻo fānaú ke vakai ki he ngāue fakafaifekaú ʻoku mahuʻinga mo fakafiemālie.
3. Naʻe anga-fēfē ʻa e maʻu ʻaonga ʻa ha tuofefine ʻe taha mei he faʻifaʻitakiʻanga ʻa ʻene ongo mātuʻá?
3 ʻOku manatu lelei ha tuofefine ʻe taha: “ʻI he taimi naʻá ku tupu hake aí, ko e founga tuʻumaʻu homau fāmilí naʻe fakakau ai ʻa e kau ki he ngāue fakamalangá ʻi he uike kotoa pē. Naʻe lava ke u sio naʻe fiefia moʻoni ʻeku ongo mātuʻá ʻi he ngāue fakamalangá. Naʻa mau tupu hake ʻo vakai ki he ngāue fakafaifekaú ko ha ngāue fakafiefia.” Naʻe hoko ʻa e tuofefiné ni ko ha tokotaha malanga teʻeki papitaiso ʻi hono taʻu fitú pea ko e taʻu ʻaki eni ʻe 33 ʻa ʻene ngāue taimi-kakato.
4. Ko e hā ʻa e ʻuhinga ke akoʻi hokohoko ai ʻa e fānaú?
4 Akoʻi Hokohoko: Fakakau hoʻo fānaú ʻi hoʻomou kau atu ki he ngāue fakafaifekaú. Mahalo ʻe lava ke nau fakatatangi ʻa e fafangu ʻi he matapaá, ʻoatu ha tuleki ki he tokotaha-ʻapí, pe lau ha konga Tohi Tapu. ʻE tānaki ʻeni ki heʻenau fiefiá pea tokoniʻi ai kinautolu ke nau loto-maʻu ʻi heʻenau malava ke vahevahe atu ʻa e pōpoaki ʻo e Puleʻangá. ʻI heʻenau tupu hake ʻo motuʻá, ʻe lahi ange ʻenau kau ki he ngāue fakafaifekaú. Ko ia ai, tokoniʻi kinautolu ke nau fakalakalaka pea ke nau fakakaukau ki ha ngaahi taumuʻa fakalaumālie.
5. Ko e hā ʻoku fiemaʻu ki ha kiʻi tama ka ne hoko ai ko ha tokotaha malanga teʻeki papitaisó?
5 Lea ki he kau mātuʻá ʻi hoʻo ongoʻi pē kuo taau hoʻo fānaú ke hoko ko e kau malanga teʻeki papitaiso pea ʻi he taimi ʻoku nau fakahāhā ai ʻa e holi ke hoko ʻo fai peheé. ʻI he hoko ko ha tokotaha malangá ʻe maongo ai kia kinautolu ʻa honau fatongia fakafoʻituitui ke fakahīkihikiʻi ʻa Sihová. Manatuʻi, ʻoku ʻikai ke fiemaʻu ia ki he kiʻi tamá ke ne maʻu ha ʻilo lahi ange ʻo hangē ko ha taha lahi ʻosi papitaiso ka ne toki taau ai. ʻOku mahinoʻi ʻe hoʻo kiʻi tamá ʻa e ngaahi akonaki tefito ʻa e Tohi Tapú? ʻOkú ne pipiki ki he ngaahi tuʻunga fakaeʻulungāanga ʻa e Tohi Tapú? ʻOkú ne loto ke kau ʻi he ngāue fakafaifekaú pea hoko ʻo fakaʻilongaʻi ko e taha ʻo e Kau Fakamoʻoni ʻa Sihová? Kapau ko ia, ʻe fakapapauʻi nai ʻe he kau mātuʻá ʻokú ne taau ke hoko ko ha tokotaha malanga teʻeki papitaiso.—Sio ki he Organized to Do Jehovah’s Will, p. 79-82.
6. Ko e hā ʻoku mahuʻinga ai ke akoʻi ʻe he ngaahi mātuʻá ʻenau fānaú?
6 Ko hono akoʻi ʻo e fānaú ke nau fakahīkihikiʻi ʻa Sihova mei honau lotó ʻoku fiemaʻu ki ai ʻa e feinga. Kae kehe, ʻoku ʻikai ha meʻa lahi ʻe fiefia ai ʻa e ngaahi mātuʻá ka ko ʻenau sio ki heʻenau fānaú ʻoku nau fakalakalaka fakalaumālié. Ko e toe mahuʻinga angé, ʻoku hōifua mai ʻa Sihova ʻi he taimi ʻoku talaki ai ʻe he fānaú ʻa ʻene ngaahi ngāue fakaofó.