ʻOua ʻe Taʻofi!
1. ʻI he founga fē ʻoku ʻikai ai te tau “taʻofi ha lelei”?
1 ʻI he kau longomoʻui ki hono fanongonongo ʻa e ongoongo lelei ʻo e Puleʻanga ʻo e ʻOtuá, ʻoku ʻikai ai te tau “taʻofi ha lelei” mei he faʻahinga ʻi hotau feituʻu ngāue kuo vaheʻi maí. (Pal. 3:27) ʻOku ʻikai ha pōpoaki ʻe toe lelei ange ke vahevahe ki he faʻahinga ʻo e tangatá ka ko e ngaahi taimi lelei ange ʻe hoko ʻi he pule mai ʻa e ʻOtuá. Neongo te ke vahevahe loto-lelei atu nai ʻa e ʻamanaki ʻo e Puleʻangá ʻi he faifakamoʻoni ʻikai ʻi he founga anga-mahení pe ko hono tuku ha tohi, ko e hā ʻoku ʻikai te ke ʻai ai ko hoʻo taumuʻá ia ke fai ha ako Tohi Tapu, kapau ʻoku teʻeki ai ke ke fai pehē?
2. Ko e hā nai ʻokú ne taʻofi kitautolu mei hano kamata ha ako Tohi Tapu?
2 ʻI he taimi ʻe niʻihi, ko e taha ʻo e fakafaingataʻaʻiaʻanga lahi taha ki hono fai ʻo ha ako Tohi Tapu ko e anga ʻo ʻetau ongoʻi fekauʻaki mo ha meʻa. ʻOku taʻofi ʻe he niʻihi hono fai ha ako Tohi Tapú koeʻuhi ko ʻenau ongoʻi taʻefeʻunga pe koeʻuhi ko e moʻumoʻua ʻenau taimi-tēpilé. Ko e ngaahi fokotuʻu hono hokó ʻe tokoni nai ia kia koe ke ʻoua ʻe taʻofi ai ʻa e kau ki hono fai ha ako Tohi Tapú.—Mt. 28:19; Ng. 20:20.
3. Ko e hā ʻoku tau taau ai ke akoʻi ʻa e Tohi Tapú?
3 ʻIkai ke Loto-Maʻu: Mahalo ko e ʻikai ke fuʻu sai ho tuʻunga fakaeakó pe ko ha toe ʻuhinga kehe ʻoku ʻikai ai ke ke loto-maʻu ki hoʻo malava ke fai ha ako Tohi Tapú. Ko e kau faifekau Kalisitiane ola lelei ʻi he ʻuluaki senitulí ko e kau “taʻekolisi pea taʻemaʻu tuʻunga.” Ko e hā naʻá ne fakamafeia kinautolu ke akoʻi ki he niʻihi kehé ʻa e moʻoní? ‘Naʻa nau faʻa ʻia Sisu.’ (Ng. 4:13) Naʻa nau ako mei he Faiako Lahí, ʻa Sīsū, ʻa ia ko ʻene ngaahi faiakó mo ʻene foungá kuo fakatolonga mai ia maʻatautolu ʻi he Tohi Tapú. Neongo ʻoku ʻikai ke fuʻu sai ho tuʻunga fakaeakó, ʻokú ke maʻu ʻa e ako fakalaumālie ʻoku taʻehanotatau.—Ai. 50:4; 2 Kol. 3:5.
4. Ko e hā ʻe lava ke tau ako mei he faʻifaʻitakiʻanga ʻa ʻĒmosí?
4 Naʻe faʻa ngāueʻaki ʻe Sihova ʻa e kau palōfitá ke valokiʻi ʻa e kau pule faihalá pe ko e niʻihi kehe naʻe ʻi he tuʻunga māʻolungá. Ko e niʻihi, hangē ko ʻĒmosí, naʻe mei ha puipuituʻa masiva. Naʻe fakahā ʻe ʻĒmosi: “Naʻe ʻikai ko e palofita au, pea naʻe ʻikai te u kau ki haʻa palofita; ka ko e tauhimanu au, mo e tama teleʻi sukamino.” (Emosi 7:14) Ka neongo ia, naʻe ʻikai ke toumoua ʻa ʻĒmosi ʻi hono talaki ʻa e pōpoaki fakaefakamaau ʻa Sihova kia ʻAmasaia ko e taulaʻeiki naʻe lotu ki he kiʻi pulú. (Emosi 7:16, 17) Kuo pau ke tau manatuʻi maʻu pē ʻoku tau fakahoko ʻa e ngāue ʻa e ʻOtuá pea te ne ʻai kitautolu ke tau taau ki he ngāué.—2 Tim. 3:17.
5. Ko e hā ʻoku totonu ai ke tau feinga ke kamata ha ako Tohi Tapu naʻa mo e taimi ʻoku moʻumoʻua ai ʻetau taimi-tēpilé?
5 Taimi-Tēpile Moʻumoʻua: Neongo kapau ʻoku moʻumoʻua hoʻo taimi-tēpilé, ʻoku hā ngali kuó ke ʻosi vaheʻi ha taimi ke kau maʻu pē ki he ngāue fakafaifekaú. Ko hono fai ha ako Tohi Tapú, ko e taha ia ʻo e ngaahi meʻa fakafiefia taha ʻi he ngāue fakafaifekaú. Ko ha monū ia ke sio ki he ngāue ʻa e Folofola ʻa Sihová ʻi ha moʻui ʻa ha taha. (Hep. 4:12) ʻOku fiefia ʻa Sihova ʻi heʻetau fai ha ngaahi feilaulau fakafoʻituitui koeʻuhi ke tokoniʻi ha taha ke ne “aʻusia ʻa e ʻilo kanokano ki he moʻoni.” (1 Tim. 2:4) Naʻa mo e kau ʻāngeló ʻoku nau fiefia ʻi he fakatomala ha taha mei hono ʻalunga ki muʻá pea fai ha laka ki muʻa fakalaumālie.—Luke 15:10.
6. Ko e hā ʻa e monū ʻoku tau maʻu ʻi hono fakahoko ʻa e finangalo ʻo e ʻOtuá?
6 Ko e “finangalo [ia ʻo e ʻOtuá] ke maʻu moʻui ʻe he kakai kotoa pe, pea ke nau aʻusia ʻa e ʻilo kanokano ki he moʻoni.” (1 Tim. 2:4) He monū makehe ē ʻoku tau maʻú ke ngāue ʻo fehoanaki mo e finangalo ʻo e ʻOtuá, ʻo ʻikai taʻofi ʻa hono fai ʻo e ngaahi ako Tohi Tapú!