Fiemaʻu ʻi he Malangá ʻa e Kātaki
1 Laka hake ʻi he taʻu ʻe 30, naʻe maʻu ai ʻe he ʻapositolo ko Paulá ha ngāue fakafiemālie ʻi heʻene hoko ko ha ʻevangeliō. Hangē ko ia ʻi ha faʻahinga ngāue mahuʻinga pē, ko ʻene ngāue fakamalangá naʻe ʻi ai hono ngaahi faingataʻa. (2 Kol. 11:23-29) Neongo ia, naʻe ʻikai ke foʻi ʻa Paula. (2 Kol. 4:1) Naʻá ne mahinoʻi ko e mālohi ke kātaki lolotonga hono fakahoko ʻa ʻene ngāue fakafaifekaú ʻe haʻu ia meia Sihova. (Fili. 4:13) ʻI he vakai ki heʻene faʻifaʻitakiʻanga ʻo e kātaki faitōnungá, naʻe lava ai ke pehē ʻe Paula: “Mou hoko ko e kau faʻifaʻitaki kiate au, ʻo hange foki ko ʻeku faʻifaʻitaki ʻaku kia Kalaisi.”—1 Kol. 10:34 (11:1, PM).
2 Kātakiʻi ʻa e ʻAhiʻahí he ʻAhó Ni: ʻI he ʻaho taki taha, ʻoku fehangahangai ai ʻa hotau fanga tokouá mo e manuki, fakafepaki, pe taʻemahuʻingaʻia mei he ngaahi mēmipa ʻo e fāmilí, kaungāngāué, pe kaungāakó. (Mt. 10:35; Sione 15:20) Mahalo pē ʻoku hoko ia ʻi ho tuʻungá. ʻI he tafaʻaki ʻe tahá, ʻokú ke fekuki nai mo ha mahamahaki, pe ʻokú ke fāinga fakaʻaho nai ke taʻofi ʻa e ngaahi fakahohaʻa mo e fakatauele ʻokú ne ʻahiʻahiʻi ʻa hoʻo tuí mo e kātakí. ʻE lava ke tau maʻu ʻa e mālohi ʻi he lāulea ki he faʻifaʻitakiʻanga ʻa e kau sevāniti faitōnunga ʻi he kuonga muʻá pea pehē ki he kaungā Kalisitiane ko ia he ʻahó ni kuo nau fehangahangai mo e ngaahi faingataʻá pea ikuʻi ia.—1 Pita 5:9.
3 ʻE lava ke tau maʻu ʻa e mālohi ʻi he tuʻumaʻu ai pē ʻi heʻetau ngāue fakafaifekaú ʻaki hono fakapapauʻi ʻoku tau ‘ʻai kiate kitautolu ʻa e mahafukotoa ʻa e ʻOtuá.’ (Ef. 6:10-13, 15) ʻOku toe fiemaʻu foki ʻa e lotú ki ha kātaki. ʻOku foaki mai ʻe he ʻOtuá ʻa hono laumālie māʻoniʻoní koeʻuhi ke tau lava ʻo kātakiʻi ai ʻa e ʻahiʻahí. (2 Kol. 6:4-7) Ke lavameʻa ʻi heʻetau faitau fakalaumālié, kuo pau ke tau tokanga ki he ngaahi fakamanatu ʻa e ʻOtuá ke fakafoʻou ʻa hotau laumālié. (Sāme 119:24, 85-88) Hangē nai ko hano toutou lau ʻe ha kiʻi tama haʻane tohi mei ha tamai ʻofa, ko ʻetau lau Tohi Tapu fakaʻahó ʻokú ne ʻai ke mālohi ʻa hotau vahaʻangatae mo Sihová. ʻOku tau maʻu ʻa e poto ke fekuki ai mo e ngaahi ʻahiʻahí fakafou ʻi he ako fakafoʻituitui tuʻumaʻu, ʻo fakaʻatā ai ʻa e fakakaukau ʻa e ʻOtuá ke ne tākiekina ʻetau fili ʻoku faí pea ʻai ai ke mālohi ʻa ʻetau mateakí.—Pal. 2:10, 11.
4 ʻOmai ʻi he Kātakí ʻa e Tāpuaki: Hangē ko ia naʻe hoko ʻi he tuʻunga ʻo Paulá, ko ʻetau kātaki faitōnunga lolotonga hono fakahoko ʻetau ngāue fakafaifekaú ʻoku iku ai ki hono ʻai ke fiefia ʻa e loto ʻo Sihová pea ʻomai ai ʻa e tāpuaki kia kitautolu pea ki he niʻihi kehé. (Pal. 27:11) ʻOfa ke tau fakapapauʻi ke kītaki ʻi he ngāue fakafaifekaú, ʻo fakamoʻoniʻi ai ko ʻetau tuí ʻoku tuʻuloa pea “ko e meʻa mahuʻinga ange ʻi he koula, ʻa é neongo ko e meʻa ʻauha, ka ʻoku ʻahiʻahiʻi ia ʻaki ʻa e afi.”—1 Pita 1:6, 7.