Ko Hono Kamata ʻa e Ngaahi Ako ʻi he Polosiua Fiemaʻu
1 ʻOku fakahaaʻi ʻe he ngaahi līpooti mei he māmaní takatakai ko e polosiua Ko e Hā ʻOku Fiemaʻu ʻe he ʻOtuá Meiate Kitautolú? ko ha meʻangāue mālohi ia ki hono akoʻi ʻa e moʻoní ki he kakaí. ʻOku laui afe ʻa e ngaahi ako Tohitapu kuo kamata ʻi he uike taki taha ʻi he polosiua ko ʻení. Kuó ke lavameʻa ʻi hono kamata mo fai ha ako Tohitapu ʻi he polosiua Fiemaʻu?
2 Lolotonga ʻoku ʻiloʻi ʻe he tokolahi taha ʻa e faingofua ke tufa ʻa e polosiuá, ʻoku fakatokangaʻi ʻe he niʻihi ia ʻoku faingataʻa ke ʻilo ʻa e meʻa ke leaʻaki ke aʻu ai ki ha ako. Ko e hā ʻa e ngaahi founga kuo ʻilo ʻe he niʻihi ʻoku hoko ʻo ola lelei ʻi hono kamata ʻa e ngaahi ako Tohitapu ʻo ngāueʻaki ʻa e polosiua Fiemaʻu? Ko e ngaahi fokotuʻu hoko haké ʻoku totonu ke hoko ia ko ha tokoni.
3 Tuʻuaki ke Fakahāhaaʻi ʻa e Akó: ʻI hono fai ha ʻuluaki ʻaʻahi pe ko ha toe ʻaʻahi, ʻi he ʻikai ke tuʻuaki ange pē ha ako Tohitapu ki he tokotaha-ʻapí, ʻe lava ke tau fakahāhaaʻi ʻa e founga ʻe fai ai ʻa e ako Tohitapú. ʻE hoko ʻeni ke toʻo atu ai ʻa e misiteli mo e puputuʻu ʻamui ange ʻoku feʻao mo e tokotaha-ʻapí koeʻuhi ko e foʻi lea “ako.” ʻI heʻetau ako ke fakahāhaaʻi iá, te tau ʻiloʻi ai ko ha lea kamata faingofua, ʻe lava ke aʻu tonu ai ki he akó.
4 Teuteú ko e Kií Ia: Ko ʻetau loto-māfana ki hono kamata ha ngaahi ako Tohitapu, ʻoku fekāingaʻaki hangatonu ia ki he lelei ʻo e founga ʻoku tau teuteu aí. ʻE tokoniʻi kitautolu ʻe he teuteu ki muʻá ke ikuʻi ai ha toumoua pē ʻoku tau maʻu nai ʻi he kau atu ki he ngāue ako Tohitapú. ʻI hono ʻahiʻahiʻi ʻetau tuʻuakí ʻi ha ngaahi taimi kehekehe, te tau hoko ʻo anga-fakafetalanoaʻaki ange, ʻo malava ai ke fakahaaʻi tauʻatāina atu kitautolu pea ʻi heʻetau ngaahi leá tonu pē. ʻE ʻikai ngata pē ʻi hono tokoniʻi ai heni kitautolu ke tau fiemālié ka te ne toe ʻai ai ʻa e tokotaha-ʻapí ke fiemālie foki.
5 ʻI he taimi ʻoku ʻahiʻahiʻi aí, ʻoku ʻaonga ke taimiʻi hoʻo tuʻuakí koeʻuhi ke ke lava ʻo fakahā ange ki he tokotaha-ʻapí ʻa e lōloa ʻe fakahāhaaʻi ai ʻa e akó. ʻI he hili hono fakafeʻiloaki iá, ko e lea eni ʻa ha tokoua ʻe taha: “Naʻá ku afe maí ke fakahā atu kiate koe ʻemau polokalama ako Tohitapu taʻetotongi. ʻOku miniti pē nai ʻe nima ke fakahāhaaʻi aí. ʻOku ʻi ai haʻo kiʻi miniti ʻe nima?” Ko e Lēsoni 1 ʻo e polosiua Fiemaʻu ʻe lava ke fakahāhaaʻi ia ʻi he miniti ʻe nima nai. Ko ia ai, ko e ngaahi konga Tohitapu ʻosi filifilí pē ʻe lava ke lau ʻi he taimi ko ʻení, ka ʻi hono fakaʻosi ʻa e ʻuluaki lēsoní ʻi ha miniti siʻi, ʻoku malava leva ʻa e tokotaha-ʻapí ke aʻusia ʻa e ʻuluaki akó. Pea ʻai ia ke ne ʻiloʻi ʻi he taimi te ke toe foki atu ai ke ako ʻa e Lēsoni 2, te ke fai ia ʻi he miniti ʻe 15 pē.
6 Kuo fakamoʻoniʻi kuo ola lelei ʻa e tuʻuaki hoko haké:
◼ “Te u saiʻia ke fakahāhaaʻi atu kiate koe ha founga ako Tohitapu faingofua ʻaupito, kae vave, ʻo ngāueʻaki ʻa e polosiua ko eni Ko e Hā ʻOku Fiemaʻu ʻe he ʻOtuá Meiate Kitautolú? Kuo ʻiloʻi ʻe he tokolahi ʻi ha miniti pē ʻe 15 pe siʻi ange ʻi ha uike ʻi he uike ʻe 16, ʻe lava ai ke nau ʻilo ʻa e ngaahi tali Fakatohitapu fakafiemālie ki he ngaahi fehuʻi faka-Tohitapu mahuʻinga ko ʻení.” Fakahaaʻi nounou ʻa e ngaahi meʻa ʻi lotó. Huke ki he Lēsoni 1, peá ke pehē: “Kapau te ke tuku mai kiate kimaua ha miniti ʻe nima nai, te ma saiʻia ke fakahā atu kiate koe ʻa e founga ʻoku fakahoko ai ʻení. ʻOku fakakaveinga ʻa e Lēsoni 1 ko e ‘Founga ʻOku Lava ke ʻIlo Ai ʻa e Meʻa ʻOku Fiemaʻu ʻe he ʻOtuá.’” Ko hono hokó, lau ʻa e ngaahi fehuʻi ʻe tolú, pea fakamatalaʻi ʻa e ngaahi fika ʻi he pelēketí. Lau ʻa e palakalafi 1, pea fakahā ange ki he tokotaha-ʻapí ʻa e founga ke maʻu ai ʻa e talí. ʻE kole nai ki he tokotaha-ʻapí ke ne lau ʻa e palakalafi 2. Peá ke pehē: “Fakatuʻunga ʻi he fakamatalá ni, ʻe lava fēfē ke ke tali ʻa e fehuʻi ko ʻení? [Toe lau ʻa e fehuʻí, pea tuku ki he tokotaha-ʻapí ke ne fakamatalaʻi.] Te ke fakatokangaʻi ʻoku ʻi ai ʻa e ngaahi konga Tohitapu ʻi he palakalafi taki taha. ʻOku fakahanga heni ʻetau tokangá ki he tali faka-Tohitapu ki he ngaahi fehuʻi ko ʻení. Ko e fakatātaá, te tau lau angé ʻa e 2 Timote 3:16, 17 peá ke sio ai, pe ʻokú ne poupouʻi ʻa e tali naʻá ke ʻomai fekauʻaki mo e faʻutohi ʻo e Tohitapú.” ʻI he hili hono lau ʻa e palakalafi 3, lāulea ki he fehuʻí, pea lau ʻa e Sione 17:3, fakahanga ʻa e tokanga ʻa e tokotaha-ʻapí ki he ʻilo kuó ne maʻú ʻi hono fakamanatu ʻa e Lēsoni 1. ʻI he tuʻunga ko ʻení ʻe lava ai ke ke huke ki he Lēsoni 2 pea lau ʻa e fehuʻi fakaʻosí, “Ko e hā ʻa e founga ʻe ua ʻoku malava ke tau ako ai ʻo kau ki he ʻOtuá?” Peá ke ʻeke ange: “Ko fē ʻa e taimi te ke maʻu ai ʻa e miniti ʻe 15 nai koeʻuhi ke lava ke tau fai ai ʻa e Lēsoni 2 pea kumi ki he talí?”
7 ʻOku mahuʻinga ke tauhi ʻa e fetalanoaʻakí ke faingofua pea fakaongoongoleleiʻi ʻa e tokotaha-ʻapí ʻo ka malava. ʻI hono fokotuʻutuʻu ki ha toe ʻaʻahi, ʻi he ʻikai ke ʻeke ange kapau ʻokú ne loto ke hoko atú, fakalototoʻaʻi pē ia ke muimui ʻi he founga tatau ki he lēsoni hono hokó. ʻAi ke ne ʻiloʻi ʻokú ke fakatuʻotuʻa atu ke ke toe foki ange. Ko e kau malanga ʻe niʻihi kuo nau tuʻuaki ke fai ha lēsoni fakafou ʻi he telefoní kapau kuo hoko ʻo faingataʻa ʻa hono fakataimi-tēpileʻí. Te ke toe fakalototoʻaʻi nai ʻa e tokotaha akó ke ne tuku ʻa e polosiuá ʻi ha feituʻu malu, mo faingamālié ʻa ia ʻe faingofua ke maʻu ki hoʻo ʻaʻahi hono hokó.
8 Ke Fakapapauʻi: Neongo ko e kī ki he lavameʻá ko e teuteu, kuo pau ke tau fakapapauʻi ke muimui ki ai. Ko hono akoʻi ha lēsoni ʻi ha miniti siʻi pē ʻe lava ke hoko ko ha pole, ko ia fakapapauʻi ke ʻahiʻahiʻi ʻa e tuʻuakí tuʻo lahi ʻo ka fiemaʻu koeʻuhi ke ke pōtoʻi ʻi hono fakahāhaaʻi ʻa e akó. Feinga ke fakahāhaaʻi ha ako mo e tokotaha kotoa ʻokú ke fetaulaki mo ia ʻi he matapaá, fakamoʻoni ʻikai ʻi he founga anga-mahení, pea ʻi he faifakamoʻoni he telefoní. Kapau ʻokú ke faingataʻaʻia ke kamata ha ako Tohitapu, ʻoua ʻe foʻi. Ko e lavameʻa ʻi hono kamata ha ngaahi ako Tohitapú ʻoku fiemaʻu ʻa e fakapapauʻi mo ha holi loto-totonu ke ʻoatu ʻa e moʻoní ki he niʻihi kehé.—Kal. 6:9.
9 ʻI hono ngāueʻaki ʻa e ngaahi fokotuʻu ko ʻení, te ke maʻu mo koe foki ha monū ʻo hono tokoniʻi ha tokotaha ʻi he hala ki he moʻuí, ʻaki hono kamata pea fai ha ako Tohitapu ʻi he polosiua Fiemaʻu.—Mt. 7:14.