Ko e Faʻahitaʻu Fakamanatú—Ko ha Faingamālie ki he Ngāue Lahi Ange!
1. Ko e hā ʻa e ngaahi ʻuhinga ʻoku tau maʻu ke fakakaukau ai ke fakalahi ʻetau ngāué lolotonga ʻa Maʻasi, ʻEpeleli, mo Meé?
1 ʻE lava ke ke fakalahi hoʻo kau ki he ngāue fakafaifekaú lolotonga ʻa e faʻahitaʻu Fakamanatu ka hoko maí? Ko e ngaahi feituʻu lahi ʻe hokosia ai ha taimi ʻalomālie mo e houa lōloa ange ʻo e taimi ʻahó. Ko e kau malanga ʻe niʻihi te nau maʻu ʻa e taimi mālōlō mei he ngāué pe akó ʻa ia ʻe lava ke nau ngāueʻaki ki he ngāue fakafaifekaú. Kamata ʻi ʻEpeleli 2, te tau fiefia ai ʻi ha feingangāue makehe ke fakaafeʻi ʻa e faʻahinga mahuʻingaʻiá ke maʻu ʻa e Fakamanatú mo kitautolu ʻi ʻEpeleli 17. Hili iá, te tau feinga ke fakatupulekina ʻa e mahuʻingaʻia ʻa e faʻahinga ko ia naʻa nau maʻú pea fakaafeʻi kinautolu ki he malanga makehe ʻa ia ʻe fakahoko lolotonga ʻa e uike ʻo ʻEpeleli 25. Ko e moʻoni, ʻoku lahi ʻa e ngaahi ʻuhinga ke fakakaukau ai ke fakalahi ʻetau ngāué lolotonga ʻa Maʻasi, ʻEpeleli, mo Meé.
2. Ko e hā ʻa e founga lelei lahi ʻe taha ke fai ai ha meʻa lahi ange ʻi heʻetau ngāue fakafaifekaú?
2 Tāimuʻa Tokoni: Ko e founga lelei lahi ʻe taha ke fai ai ha meʻa lahi angé ko e tāimuʻa tokoni. Koeʻuhi ʻoku tau femoʻuekina kotoa, ʻoku faʻa fiemaʻu heni ha palani ki muʻa mo e fai ʻo e ngaahi fengaʻunuʻaki ʻi heʻetau taimi-tēpilé. (Pal. 21:5) Mahalo ʻe lava ke toloi ha ngaahi ngāue ʻe niʻihi ʻoku ʻikai fiemaʻu ʻi hoʻo founga-tuʻumaʻu anga-mahení. (Fili. 1:9-11) Ko e hā ʻoku ʻikai fakahaaʻi ai hoʻo holi ke tāimuʻá ki he niʻihi kehe ʻi he fakatahaʻangá ke sio kapau te nau lava ke kau fakataha atu mo koe ʻi he tuʻunga ko ha tāimuʻa tokoní?
3. ʻE anga-fēfē nai ha fokotuʻutuʻu ʻa e ngaahi fāmilí ke fakalahi ʻenau ngāué?
3 Lolotonga hoʻo efiafi Lotu Fakafāmili hokó ʻe lelei ke mou lāulea ki hoʻomou ngaahi taumuʻá ʻi he tuʻunga ko ha fāmili. (Pal. 15:22) ʻI he ngāue fakatahá, mahalo ʻe lava ʻa e ngaahi mēmipa ʻe niʻihi ʻo e fāmilí ke tāimuʻa tokoni ʻi ha māhina ʻe taha pe lahi ange. Fēfē kapau ʻokú ke fakapapauʻi ʻe koe ia ʻoku ʻikai ala malava eni ia? Ko e fāmilí te nau kei lava ke fokotuʻutuʻu ke fakalahi ʻenau ngāué ʻaki ʻenau kau ki he ngāue fakafaifekaú ʻi he ngaahi efiafi ʻe niʻihi pe ʻaki ʻenau nofo fuoloa ange ʻi he ngaahi fakaʻosinga ʻo e uiké.
4. Ko e hā ʻa e ngaahi tāpuaki ʻe iku ki ai ʻi hono fakalahi ʻetau ngāue ʻi he ngāue fakafaifekaú ʻi he faʻahitaʻu Fakamanatu ko ení?
4 ʻOku fakatokangaʻi ʻe Sihova ʻa e meʻa kotoa ʻoku tau fai ke tauhi kiate iá pea houngaʻia ʻi heʻetau ngaahi feilaulaú. (Hep. 6:10) ʻOku iku ki he fiefiá hono fai ha foaki kia Sihova pea ki he niʻihi kehé. (1 Kal. 29:9; Ng. 20:35) Te ke lava ʻo fakalahi hoʻo ngāue ʻi he faʻahitaʻu Fakamanatu ko ení pea utu ʻa e fiefia lahi ange mo e ngaahi tāpuaki ʻoku iku ki ai?