ʻAi ʻa e Faʻahitaʻu Fakamanatu ko Ení ko e Tahaʻi Meʻa Fakafiefia!

1. Ko e hā ʻa e founga ʻe taha ke fakatupulekina ai ʻetau fiefiá lolotonga ʻa e faʻahitaʻu Fakamanatu ko ení?

¹ Te ke saiʻia ke fakatupulekina hoʻo fiefiá lolotonga ʻo Maʻasi, ʻEpeleli mo Mē? Ko e founga ʻe taha ke fai iá ko hono fakalahi atu hoʻo ngāue fakafaifekaú, kapau ʻoku malava ke hoko ʻo tāimuʻa tokoni. ʻE anga-fēfē ke tānaki atu eni ki hoʻo fiefiá?

2. ʻI hono fakalahi atu ʻetau ngāue fakafaifekaú ʻe anga-fēfē ke tupulaki ai ʻetau fiefiá?

² Fakatupulekina Hoʻo Fiefiá: Naʻe fakatupu kitautolu ʻe Sihova fakataha mo e malava ke tau hokosia ʻa e fiefia mo e fiemālie, he lotu kiate iá ʻi hano fakalato ʻetau fiemaʻu fakalaumālie naʻa tau tupu mo iá. (Māt. 5:3) Naʻá ne toe ngaohi kitautolu ʻi he founga ʻe lava ke tau maʻu ai ʻa e fiefia ʻi he foaki atu ki he niʻihi kehé. (Ngā. 20:35) ʻOku fakaʻatā kitautolu ʻe he ngāue fakafaifekaú ke tau fakahoko fakatouʻosi—ʻa e lotu ki he ʻOtuá mo tokoni ki he kakaí. ʻOku hā mahino, ko e kau lahi ange ʻi he ngāue fakafaifekaú ko e ola ʻe maʻu aí ko e fiefia lahi ange. Tānaki atu ki ai, ko e lahi ange ʻetau malangá, te tau hoko nai ʻo pōtoʻi ange. ʻI heʻetau maʻu ʻa e pōtoʻí, ʻe langa hake ai ʻetau tuipau mo fakasiʻisiʻi ai ʻetau ongoʻi manavasiʻí. Te tau maʻu ai ʻa e faingamālie lahi ange ke faifakamoʻoni mo kamata ha ngaahi ako Tohi Tapu. Ko e ngaahi meʻá ni kotoa ʻokú ne ʻai ʻa e ngāue fakafaifekaú ke toe fakafiefia ange.

3. Ko e hā ʻe hoko ai ʻa Maʻasi mo ʻEpeleli ko e ongo māhina makehe ʻoku lelei ki he tāimuʻa tokoní?

³ Ko Maʻasi mo ʻEpeleli ʻe hoko ia ko e ongo māhina makehe ʻoku lelei ki he tāimuʻa tokoní koeʻuhi ʻe lava ke tau fili ʻa e fiemaʻu ki he houa ʻe 30 pe 50. Tānaki atu ki ai, ʻe kamata ʻi he ʻaho Tokonaki 22 ʻo Maʻasí, pea hokohoko atu ʻo aʻu ki he Fakamanatú ʻi he ʻaho Mōnite 14 ʻo ʻEpelelí, te tau kau atu ʻi he feinga ngāue fakafiefia ke fakaafeʻi ʻa e niʻihi kehé ke nau maʻu ʻa e Fakamanatú. ʻE fiefia lahi ʻa e ngaahi Fakatahaʻangá ʻi he hoko ʻa e tokolahi ʻo ngāue “uouangataha” ke ʻosiki ʻa e feituʻu ngāué fakatatau ki he taimi kuo tuku maí ʻoka malava.—Sēf. 3:9.

4. Kapau ʻoku tau loto ke tāimuʻa tokoni, ko e hā ʻoku totonu ke tau faí?

⁴ Teuteu he Taimí Ni: Kapau ʻoku teʻeki ai ke ke mateuteu ki ai, vaheʻi ha taimi ke vakaiʻi hoʻo taimi-tēpilé pea sio ki ha ngaahi feʻunuʻaki ʻe lava ke ke fai ke fakalahi atu ai hoʻo ngāue fakafaifekaú ʻi ha māhina ʻe taha pe lahi ange. Lotu fekauʻaki mo ia. (Sēm. 1:5) Talanoa ki ai mo ho fāmilí mo e niʻihi kehe ʻi he fakatahaʻangá. (Pal. 15:22) Te ke ʻiloʻi nai neongo ʻa e pole ʻo e tuʻunga mahamahakí pe taimi-tēpile femoʻuekina he ngaahi ngāué, ʻe lava ke ke hokosia foki ʻa e fiefia ʻoku maʻu mei he tāimuʻa tokoní.

5. Ko e hā e ola kapau te tau fakalahi atu ʻetau ngāue fakafaifekaú ʻi he faʻahitaʻu Fakamanatu ko ení?

⁵ ʻOku finangalo ʻa Sihova ke fiefia ʻene kau sevānití. (Saame 32:11) ʻI heʻetau feinga mālohi ke fakalahi atu ʻetau ngāue fakafaifekaú ʻi he faʻahitaʻu Fakamanatu ko ení, ʻe ʻikai ngata pē ʻi he tupulaki ʻetau fiefiá, ka ʻe toe ʻoatu ai ʻa e fiefia ki heʻetau Tamai fakahēvaní.—Pal. 23:24; 27:11.