Te Ke Tāimuʻa Tokoni?
1. Ko e hā ʻoku hoko ai ʻa e faʻahitaʻu Fakamanatú ko ha taimi lelei ia ke fakalahi ai ʻetau ngāue fakafaifekaú?
1 Ko e faʻahitaʻu Fakamanatú ko ha taimi lelei ia ke fakalahi ai ʻetau ngāue fakafaifekaú. Ko ha taimi ia ʻoku tau fakakaukauloto ai ki he ʻofa lahi ʻa Sihová ʻi he tokonaki mai ʻa hono ʻAló ko ha huhuʻí. (Sione 3:16) ʻOku ʻai heni ke tupulekina ʻa e houngaʻia ʻi hotau lotó, pea fakautuutu ai ʻetau holi ke tala ki he niʻihi kehé fekauʻaki mo Sihova mo e meʻa kuó ne fai maʻá e faʻahinga ʻo e tangata. (ʻAi. 12:4, 5; Luke 6:45) Ko ha toe taimi ia ke tau fiefia ai ʻi he feingangāue makehe ke fakaafeʻi ʻa e ngaahi mahení mo e kakai ʻi he feituʻú ke kau fakataha mo kitautolu ki he Fakamanatú. Hili iá, ʻoku tau feinga mālohi ke fakatupulekina ʻa e mahuʻingaʻia ʻa kinautolu ʻa ia naʻe lava maí. Te ke fakalahi hoʻo ngāue fakafaifekaú ʻaki haʻo tāimuʻa tokoni lolotonga ʻo Maʻasi, ʻEpeleli pe ko Mē?
2. Ko e hā ʻoku hoko ai ʻa Maʻasi ko ha māhina lelei ʻaupito ia ki he tāimuʻa tokoní?
2 ʻAi ʻa Maʻasi ko ha Māhina Makehe: Ko Maʻasi ko ha māhina lelei ʻaupito ia ki he tāimuʻa tokoní. Ko kinautolu ʻoku kole ke kaú ʻe lava ke nau fili ʻa e houa ʻoku fiemaʻu maí ko e houa ʻe 30 pe houa ʻe 50. Kapau ko e ʻaʻahi ʻa e ʻovasia sēketí ʻoku fai ia ʻi he lolotonga ʻo Maʻasí, ʻe lava nai ke kau kakato ʻa e kau tāimuʻa tokoní ki he fakataha ʻa ia ʻokú ne fai mo e kau tāimuʻa tuʻumaʻú mo e kau tāimuʻa makehé. Ko e feingangāue ke tufaki ai ʻa e ngaahi tohi fakaafe ki he Fakamanatú, ʻa ia ʻe fakahoko ʻi he Tūsite ʻo Maʻasi 26, 2013, kuo fakalahi mei he ngaahi taʻu ki muʻá pea ʻe kamata ia ʻi Maʻasi 1. Tānaki atu ki ai, ʻoku ʻi ai ʻa e ngaahi fakaʻosinga uike kakato ʻe nima ʻi Maʻasi. Ko ia, ko e hā ʻoku ʻikai te ke fakakaukau fakamātoato ai pe ʻe lava ke ke kau hono ʻai ia ke hoko ko e māhina makehe taha ʻo e taʻú?
3. ʻE lava fēfē ke tau palani ke fakalahi ʻetau ngāue fakafaifekaú?
3 Palani ʻi he Taimí Ni: Ko e taimi eni ke toe vakaiʻi ai hoʻo taimi-tēpilé pea sio ki he ngaahi feʻunuʻaki ʻoku fiemaʻú kae lava ai ke ke tāimuʻa. Ko e fetalanoaʻaki mo e fāmilí ʻe mahuʻinga, ko ia vaheʻi ha taimi lolotonga ʻa e efiafi Lotu Fakafāmilí ke lāulea ki he ngaahi taumuʻa ʻa e fāmilí pea ʻai ha taimi-tēpile. (Pal. 15:22) Kapau ʻoku ʻikai lava ke ke tāimuʻa tokoni ʻoua ʻe loto-siʻí. Te ke lava ke feʻunuʻaki ho taimi-tēpilé ke lōloa ange hoʻo malanga ʻi he ngaahi ʻaho kuó ke vaheʻi ke ke malanga aí? Te ke lava ke tānaki atu ha ʻaho ʻe taha ki he ʻaho anga-maheni ʻokú ke malanga ai he uiké?
4. Ko e hā ʻa e ngaahi ʻaonga ʻe maʻu mei hono fakalahi ʻetau ngāué lolotonga ʻa Maʻasi, ʻEpeleli mo Meé?
4 ʻI heʻetau fakalahi ʻetau ngāué lolotonga ʻa Maʻasi, ʻEpeleli mo Meé te tau fakatupulekina ai ʻa e fiefia mo e fiemālie te tau maʻu mei he tauhi kia Sihova mo e foaki atu ki he niʻihi kehé. (Sione 4:34; Ngā. 20:35) Ko e mahuʻinga tahá, ko ʻetau ngaahi feinga feilaulauʻi-kitá te ne ʻai ʻa Sihova ke fiefia.—Pal. 27:11.