Tau Fakahāhaaʻi ʻEtau Houngaʻia—ʻE Kātoangaʻi e Fakamanatú ʻi ʻEpeleli 17
1. Ko e hā e ongoʻi ʻa e tokotaha-tohi-sāmé ʻoku tautefito ʻene feʻungamālie lolotonga ʻa e faʻahitaʻu Fakamanatú?
1 ʻI hono ueʻi ʻe he ngaahi ngāue lahi ʻo e meesi mo e faifakahaofi ʻa Sihová, naʻe ʻeke ai ʻe he tokotaha-tohi-sāmé: “Te u totongi fefe kia Sihova ʻa e fuʻu hulu ʻene ʻofa kia kita?” (Sāme 116:12) ʻI he ʻahó ni, ko e kau sevāniti ʻa e ʻOtuá ʻoku nau maʻu ʻa e ʻuhinga ʻoku toe lahi ange ki he houngaʻiá. Hili ha ngaahi senituli mei hono hiki ʻo e ngaahi lea fakamānavaʻí ni, naʻe foaki ai ʻe Sihova ki he faʻahinga ʻo e tangatá ʻa ʻene meʻaʻofa lahi tahá—ko e huhuʻí. ʻI heʻetau teuteu atu ke fakamanatu ʻa e pekia ʻa Kalaisí ʻi ʻEpeleli 17, ʻoku tau maʻu ʻa e ʻuhinga lelei ke fakahāhaaʻi kitautolu ʻoku tau fakamālōʻia.—Kol. 3:15, NW.
2. Ko e hā ʻa e ngaahi ʻuhinga ʻe niʻihi ʻoku tau houngaʻia ai ʻi he huhuʻí?
2 Ngaahi Tāpuaki ʻo e Huhuʻí: Fakafou ʻi he huhuʻí, ʻoku tau malava ai ʻo maʻu ʻa e “fakamolemole ʻetau ngaahi angahala.” (Kol. 1:13, 14) ʻOku fakamafeia ai heni kitautolu ke lotu kia Sihova ʻaki ha konisēnisi maʻa. (Hep. 9:13, 14) Te tau lava ai ʻo maʻu ʻa e mālohi, pe tauʻatāina ʻo e lea, kia Sihova ʻi he taimi ʻoku tau lea ai kiate ia ʻi he lotú. (Hep. 4:14-16) Ko e faʻahinga ko ia ʻoku tui pīkitai, pe ngāueʻi ʻa e tui ki he huhuʻí ʻoku nau maʻu ʻa e ʻamanaki maʻongoʻonga ʻo e moʻui taʻengatá!—Sione 3:16.
3. ʻE lava fēfē ke tau fakahāhā ʻetau houngaʻia kia Sihova koeʻuhi ko e huhuʻí?
3 Fakahāhā ʻa e Houngaʻia: Ko e founga ʻe taha ke fakahāhā ai ʻetau houngaʻia lolotó ko e lāulea ki he lau Tohi Tapu ʻo e Fakamanatú ʻi he ʻaho taki taha pea fakalaulauloto ki ai. Ko e kupu ʻi he Watchtower ʻo Fepueli 1, 2011, ʻoku fakakaveinga “Are You Prepared for the Most Important Day of the Year?” naʻe fakataumuʻa ia ke tokoniʻi kitautolu ke fai eni. ʻE lava ke tau toe fakahā kia Sihova fakafou ʻi he lotu ongoʻi loto-moʻoni ʻa ʻetau fakamahuʻingaʻi lahi ʻa e huhuʻí. (1 Tes. 5:17, 18) Ko ʻetau ʻi ai ʻi he kātoanga Fakamanatú ʻi he talangofua ki he fekau ʻa Sīsuú ʻoku fakahaaʻi ai ʻetau fakamālōʻiá. (1 Kol. 11:24, 25) ʻIkai ko ia pē, ʻe lava ke tau faʻifaʻitaki ki he ʻofa hulu ʻa Sihová ʻo fakaafeʻi ʻa e tokolahi taha ʻe ala lavá ke maʻu mo kitautolu ia.—Ai. 55:1-3.
4. Ko e hā ʻoku totonu ko ʻetau fakapapaú iá?
4 Ko e kau sevāniti houngaʻia ʻa Sihová heʻikai ke nau lau ʻa e kātoanga ʻo e Fakamanatú ko ha toe fakataha pē ʻe taha. Ko e fakataha mahuʻinga taha ia ʻo e taʻú! ʻI he fakaofi mai ʻa e Fakamanatú, ʻofa ke hangē ʻetau fakapapaú ko ia ʻo e tokotaha-tohi-sāmé ʻa ia naʻá ne tohi: “Fakafetaʻi kia Sihova, ʻa hoku laumalie; Pea ʻoua naʻa ngalo ʻene meʻaʻofa fulipe.”—Sāme 103:2.