Fakahāhā ʻa e Houngaʻia ʻi he Meʻaʻofa Lahi Taha ʻa e ʻOtuá

1. Ko e hā ʻoku tautefito ai ʻetau houngaʻia ʻia Sihová?

¹ ʻI he ngaahi “meʻaʻofa lelei” lahi ʻa Sihová, ko e huhuʻi naʻe tokonaki mai ʻe hono ʻAlo ʻofaʻangá ʻa e meʻaʻofa lahi tahá. (Sem. 1:17, Ko e Taulua) ʻOkú ne ʻai ke malava ʻo maʻu ʻa e ngaahi tāpuaki lahi, ʻo kau ai ʻa e fakamolemole ʻo ʻetau angahalá. (Ef. 1:7) ʻOku tau houngaʻia maʻu pē ʻi he meʻá ni. ʻOku tau vaheʻi tautefito ʻi he lolotonga ʻa e faʻahitaʻu Fakamanatú ʻa e taimi ke fakalaulauloto ai ki he meʻaʻofa mahuʻinga ko ení.

2. ʻE lava fēfē ke tau langaʻi ʻa e houngaʻia ki he huhuʻí ʻi hotau fāmilí pea mo kitautolu tonu?

² Langaʻi ʻa e Houngaʻia: Koeʻuhi ke langaʻi ʻa e houngaʻia ʻa ho fāmilí, ʻi he ngaahi uike ki muʻa ʻi he Fakamanatú ʻi Maʻasi 30, ko e hā ʻoku ʻikai ngāueʻaki ai homou taimi lolotonga ʻa e efiafi ʻo hoʻomou Lotu Fakafāmilí ke fakamanatu ai ʻa e fakamatala ki he huhuʻí? Toe lāulea foki ki he lau Tohi Tapu makehe ki he Fakamanatú ʻi he ʻaho taki taha ʻi he tuʻunga ko ha fāmili. Fakakaukauloto ki he founga kuó ke maʻu ʻaonga ai mei he huhuʻí pea ueʻi ai hoʻo fakakaukaú kia Sihova, kiate koe tonu, niʻihi kehé, pea mo e kahaʻú. Te ke toe ʻiloʻi foki ʻoku ʻaonga ke ʻahiʻahiʻi hono hivaʻi ʻa e ongo foʻi hiva ʻa ia ʻe ngāueʻaki ʻi he Fakamanatú, ko e fika 8 mo e fika 5.—Sāme 77:12.

3. ʻE fēfē nai haʻatau fakahāhā ʻetau houngaʻiá?

³ Fakahāhā ʻa e Houngaʻia: Ko e houngaʻia ki he huhuʻí ʻokú ne ueʻi kitautolu ke tau talanoa ki he niʻihi kehé fekauʻaki mo Sihova mo ʻene ʻofa lahi ʻi hono fekau mai ʻa hono ʻAló. (Sāme 145:2-7) Lolotonga ʻa Maʻasi, ʻEpeleli, mo Meé, ʻoku fakahāhā ai ʻe he ngaahi fāmili ʻe niʻihi ʻenau houngaʻiá ʻaki hono fokotuʻutuʻu ʻo ʻikai siʻi hifo he mēmipa ʻe taha ʻi honau fāmilí ke tāimuʻa tokoni. Kapau ʻoku ʻikai malava eni, ʻe lava ke ke “fakatau mai ʻa e taimi” ke fakalahi hoʻo kau ʻi he ngāue fakafaifekaú? (Ef. 5:16, NW) ʻE toe ueʻi kitautolu ʻe he houngaʻiá ke tau tokoniʻi ʻa e niʻihi kehé ke nau maʻu fakataha mo kitautolu ʻa e Fakamanatú. (Fkh. 22:17) Kamata ʻaki hono faʻu ha lisi ʻo e ngaahi toe ʻaʻahi, kau ako Tohi Tapu, kāinga, kaungāngāue, mo e kaungāʻapí ke fakaafeʻi, pea kau kakato leva ʻi he feingangāue tufa tohi fakaafe makehe ki he Fakamanatú.

4. ʻI he ngaahi founga fē te tau ngāue fakapotopoto ʻaki ai ʻa e faʻahitaʻu Fakamanatú?

⁴ Ko e faʻahitaʻu Fakamanatú ʻoku ʻomai ai ʻa e ngaahi faingamālie foʻou ke fakahāhā ai kia Sihova ʻa e lahi ʻo ʻetau houngaʻia ki heʻene meʻaʻofa ki he faʻahinga ʻo e tangatá. ʻOfa ke tau ngāueʻaki ʻa e taimi ko ení ke langaʻi ai mo fakahāhā ʻetau houngaʻia ki he huhuʻí pea mo e “koloa tae faa hakule a Kalaisi.”—Ef. 3:8, PM.