ʻEtau Ngāue Fakafaifekaú​—Fakaʻilongaʻi ʻAki ʻa e Kātaki

1. Kuo fēfē hono fakahāhā ʻe Sihova ʻa e kātakí ki he faʻahinga ʻo e tangatá?

¹ Ko e kātakí ko ha fakaʻilonga ia ʻo e ngaahi feangainga ʻa e ʻOtuá mo e tangatá. (Eki. 34:6; Sāme 106:41-45; 2 Pita 3:9) Ko e taha ʻene ngaahi faʻifaʻitakiʻanga tuʻu-ki-muʻa ʻo ʻene kātaki anga-ʻofá ʻe lava ke hā ia ʻi he felāveʻi mo e ngāue malangaʻi ʻo e Puleʻangá ʻi māmani lahí. Kuo ngāue ʻa Sihova mo e faʻahinga ʻo e tangatá ʻi he meimei taʻu ʻe 2,000, pea ʻokú ne kei hokohoko atu ke tohoaki kiate ia ʻa e kau loto-totonú. (Sione 6:44) ʻE lava fēfē ke tapua atu heʻetau ngāue fakafaifekaú ʻa e kātaki ʻa Sihová?

2. ʻE fēfē nai haʻatau fakahāhā e kātakí ʻi he taimi ʻoku tau ngāue ai ʻi hotau feituʻu ngāué?

² Ngāue Fakafaifekau Fale-ki-he-Falé: ʻOku tau faʻifaʻitaki ki he kātaki ʻa Sihová ʻaki e malanga ʻo “ʻikai tuku” ʻi he feituʻu ngāue ʻa ia kuo teʻeki fakahāhā ai ʻe he faʻahinga taautaha ʻa e mahuʻingaʻiá. (Ng. 5:42) ʻOku tau ʻūkuma anga-kātaki ʻa e taʻemahuʻingaʻia, luma, mo e fakafepaki ki heʻetau ngāue fakafaifekaú. (Mk. 13:12, 13) ʻOku tau toe fakahāhā e kātakí ʻi heʻetau kīvoi ʻi heʻetau ngaahi feinga ko ia ke fuʻifuʻi e ngaahi tenga ʻo e moʻoní naʻa mo e taimi ʻoku faingataʻa ai ke maʻu ha kau mahuʻingaʻia ʻi ʻapí.

3. Ko e hā ʻoku fiemaʻu ai ʻa e kātakí ʻi he taimi ʻoku fai ai ʻa e ʻū toe ʻaʻahí mo hono fai ʻa e ʻū ako Tohi Tapú?

³ ʻŪ Ako Tohi Tapu: ʻOku fiemaʻu ʻa e kātaki ʻi hono tō ko ia ha fuʻu ʻakau. ʻE lava ke tau tokangaʻi ia, ka heʻikai lava ke tau fakavaveʻi ʻene tupú. (Sem. 5:7) ʻOku pehē pē, ko e tupu fakalaumālié ʻoku hoko māmālie ia pea ʻi he ngaahi tuʻunga. (Mk. 4:28) ʻOku faingataʻa nai ki he faʻahinga ʻoku tau ako mo iá ke tuku ange ʻa e ngaahi tui fakalotu loí pe ngaahi anga-fakafonua taʻefakatohitapú. ʻOku ʻikai totonu ke tau feinga ke fakavaveʻi ʻa e tupú ʻaki ʻetau teke ʻetau kau akó ke fai ha ngaahi liliu. ʻOku fiemaʻu ʻa e kātakí ke fakaʻatā ai ha taimi feʻunga ki he laumālie ʻo e ʻOtuá ke ngāue ʻi he loto ʻo e tokotaha akó.—1 Kol. 3:6, 7.

4. ʻE lava fēfē ʻe he kātakí ʻo tokoniʻi kitautolu ke faifakamoʻoni ola lelei ki he ngaahi kāinga taʻetuí?

⁴ Ngaahi Kāinga Taʻetuí: Neongo ʻoku tau holi mālohi ke ako ʻe hotau ngaahi kāinga taʻetuí ʻa e moʻoní, ʻoku tau fakahāhā ʻa e kātaki ʻaki ʻa e tatali ki he taimi totonú ke fevahevaheʻaki ʻetau tuí mo kinautolu, ʻo tokanga ke ʻoua ʻe lōmekina kinautolu ʻaki ʻa e fakamatala fuʻu lahi. (Koh. 3:1, 7) ʻI he lolotongá ni, ʻoku tau tuku ke lea ʻetau faʻifaʻitakiʻangá maʻa kitautolu pea tau mateuteu ai pē ke fai ha fakamatala fekauʻaki mo ʻetau tuí ʻi he anga-vaivai mo e tailiili pe fakaʻapaʻapa loloto. (1 Pita 3:1, 15) Ko e moʻoni, ko ha ngāue fakafaifekau ʻoku fakaʻilongaʻi ʻaki ʻa e kātakí ʻe ola lelei ange ia pea ʻe fakahōifua ia ki heʻetau Tamai fakahēvaní.