TOKONI KI HE FĀMILÍ | NOFO MALI
Founga ke Fakatupulekina Ai ʻa e Kātakí
“ʻI he ʻaho kotoa pē ʻoku ʻahiʻahiʻi ai ʻa e kātaki ʻa e husepānití mo e uaifí. Ko e kātakí ʻe hā ngali ʻoku ʻikai ko ha ʻulungaanga mātuʻaki mahuʻinga ia ʻi he teʻeki ke ke malí, ka ʻoku mātuʻaki mahuʻinga ia ki ha nofo mali lavameʻa.”—John.
Ko e hā ʻokú ke fiemaʻu ai ʻa e kātakí?
ʻI he nofo malí ʻe lava ke ne ʻai koe ke ke ʻiloʻi lelei ange ʻa e ngaahi fehālaaki ho hoá.
“Hili atu ha vahaʻa taimi hoʻomo nofo malí, ʻoku faingofua ke tokangataha ki he ngaahi ʻulungaanga ʻikai lelei ho hoá. ʻI he kamata ke ke maʻu ʻa e fakakaukau ʻikai lelei ko iá, ʻe faingofua ke mole hoʻo kātakí.”—Jessena.
Ko e taʻefaʻakātakí ʻoku lava ke ne ʻai koe ke ke lea taʻefakakaukauʻi.
“ʻOku ou vave maʻu pē ke fakahaaʻi ʻeku ongoʻí ʻi he taimi ʻe niʻihi ka ʻoku ʻikai ko e meʻa ia naʻe tonu ke u leaʻakí. Kapau naʻá ku kātaki lahi ange, naʻe mei lava ke u fakakaukau pe ko e meʻa ʻoku ou loto ke leaʻakí ʻoku fuʻu fiemaʻu ke u leaʻaki pe ʻikai.”—Carmen.
ʻOku pehē ʻe he Tohi Tapú: “Ko e ʻofá ʻoku kātaki mo anga-lelei.” (1 Kolinitō 13:4) ʻOku hā ngali ʻoku ʻuhinga lelei pē ia ko ha ongo meʻa ʻokú na feʻofaʻaki, te na fakahāhā ʻa e kātakí. Ka ʻoku ʻikai ko e meʻa ia ʻoku faʻa hokó. “Hangē pē ko ha faʻahinga ʻulungaanga lelei,” fakatokangaʻi ʻa e lea ʻa John naʻe lave ki ai ki muʻá, “ʻoku vave ange hōloa ʻa e kātakí ʻi heʻene tupulakí. ʻOku fiemaʻu ʻa e feinga ke hoko ʻo kātaki lahi ange.”
ʻE lava fēfē ke ke fakahaaʻi ʻa e kātakí?
ʻI he taimi ʻoku hoko fakafokifā ai ha meʻa ʻokú ne ʻahiʻahiʻi hoʻo kātakí.
Fakatātaá: ʻOku leaʻaki ʻe ho hoá ha meʻa ʻikai lelei kiate koe. Ko hoʻo ongoʻí ke leaʻaki ha meʻa ʻikai lelei kiate ia.
Tefitoʻi moʻoni Fakatohitapu: “ʻOua ʻe vave ki he ʻitá, he ko e ʻitá ʻoku nofo ia ʻi he fatafata ʻo e kau seselé.”—Tangata Malanga 7:9, fakamatala ʻi lalo.
Founga ke fakahāhā ai ʻa e kātakí: Kiʻi longo. Ki muʻa ke ke fai ha talí, feinga ke fakakaukau ko e lea ho hoá naʻe ʻikai ke fakataumuʻa ke fakalotomamahiʻi koe. “Ko e tokolahi taha ʻo kitautolu ʻoku tau fakafeangai ʻo fakatatau ki he anga ʻetau fakakaukau ki he meʻa naʻe leaʻaki ʻe hotau hoá kae ʻikai ki he meʻa naʻá ne ʻuhinga moʻoni ki aí,” ko e lau ia ʻa e tohi Fighting for Your Marriage.
Neongo kapau naʻe feinga ho hoá ke ne fakaʻitaʻi koe, ko hoʻo fakahāhā ʻa e kātakí ʻaki hono taʻotaʻofi koe mei he faisāuní te ke fakaleleiʻi ai ʻa e tuʻungá kae ʻikai ko hono ʻai ke toe kovi ange. “ʻI he ʻikai ha fefié, ʻoku mate ʻa e afí,” ko e lau ia ʻa e Tohi Tapú.—Palōveepi 26:20.
“Kapau ʻoku kamata ke ke vakai ki ho uaifí ko ho fili ia, kiʻi tuʻu pea fakakaukau ki he ʻuhinga ʻokú ke ʻofa ai ʻiate iá pea fai leva ha meʻa lelei maʻana.”—Ethan.
Ke fakakaukau ki ai:
ʻOku anga-fēfē hoʻo fakafeangai ki ho hoá ʻi he taimi ʻokú ne leaʻaki pe fai ai ha meʻa ʻikai leleí?
ʻE lava fēfē haʻo fakahāhā ʻa e kātaki lahi ange ʻi he taimi hoko ʻe toe malanga hake ai ení?
ʻI he taimi ʻoku toutou hoko ai ha meʻa ʻo ʻahiʻahiʻi ai hoʻo kātakí.
Fakatātaá: ʻOku tōmui maʻu pē ho hoá, ʻo ne ʻai koe ke ke tatali—pea fakalalahi ai hoʻo ʻitá.
Tefitoʻi moʻoni Fakatohitapu: “Hokohoko atu ʻa e fekātakiʻaki mo e fefakamolemoleʻaki loto-lelei.”—Kolose 3:13.
Founga ke fakahāhā ai ʻa e kātakí: Feinga ke fakamuʻomuʻa ʻa e ngaahi fiemaʻu hoʻomo vahaʻangataé ʻi hoʻo ngaahi fiemaʻu fakafoʻituituí. ʻEke hifo, ‘Kapau teu ʻita ʻi he meʻa naʻe hokó, ʻe tokoni ia pe te ne uesia ʻa homa vahaʻangataé?’ Pehē foki, manatuʻi “ʻoku tau tūkia ʻo tā-tuʻo-lahi.” (Sēmisi 3:2) ʻOku ʻuhinga ení naʻa mo koe foki ʻoku ʻi ai ʻa e ngaahi meʻa ʻoku fiemaʻu ke ke ngāue ki ai.
“ʻI he taimi ʻe niʻihi ʻoku ou fakahaaʻi ʻa e kātaki lahi ange ki haku kaumeʻa ʻi hoku husepānití. Mahalo koeʻuhí he ʻoku ou fakamoleki ʻa e taimi lahi ange mo hoku husepānití pea ʻoku ou ʻiloʻi ʻene ngaahi tōnounoú. Ka ko e kātakí ko ha tafaʻaki ia ʻo e ʻofá—ko ha fakaʻilonga moʻoni ʻo e fakaʻapaʻapá—ko ia ʻoku mahuʻinga ia ʻi heʻeku nofo malí.”—Nia.
Ke fakakaukau ki ai:
ʻOku malava ke ke kātakiʻi ʻa e ngaahi fehālaaki ho hoá?
ʻE lava fēfē ke ke fakahāhā ʻa e kātaki lahi ange ʻi he kahaʻú?