Tauhi
ʻOkú Ke Ngāueʻaki ʻa e Ngaahi Polosiua ko Ení?
ʻE Lava Ke Ke Hoko ko e Kaumeʻa ʻo e ʻOtuá!
Kuo fakataumuʻa ke fakamānako ki he faʻahinga ʻoku fakangatangata ʻenau akó pe malava ke lautohí
Founga ke tuʻuaki ai iá: “ʻOkú ke fakakaukau ʻoku malava ke tau hoko ko e ngaahi kaumeʻa ʻo e ʻOtuá? [Tuku ke ne tali. Lau leva ʻa e Sēmisi 2:23.] Kuo fakataumuʻa ʻa e polosiua ko ení ke tokoniʻi kitautolu ke hoko ko e kaumeʻa ʻo e ʻOtuá, hangē ko ia ko ʻĒpalahamé.”
Te ke ʻahiʻahiʻi nai eni: Pe ʻi he ʻuluaki ʻaʻahí pe ko e toe ʻaʻahí, fakahāhā ha ako Tohi Tapu ʻaki ʻa e lāulea fakataha ki ha konga pe kotoa ʻo e lēsoni 1.
The Origin of Life—Five Questions Worth Asking
Kuo fakataumuʻa ki he toʻutupu Kalisitiane ʻoku akoʻi kinautolu ki he ʻevalūsioó ʻi he ʻapiakó pea ʻoku toe tokoni ia ʻi he taimi ʻoku fakaʻuhinga ai mo e kau tui-ʻevalūsioó, ʻakinositiká, mo e kau fakaʻikaiʻi-ʻOtuá (ʻOku ʻikai ke fakataumuʻa ʻa e polosiua ko ení ke tuʻuaki mei he fale-ki-he-fale.)
Founga ke ngāueʻaki ai ia ʻi he lea ki ha tokotaha tui-ʻevalūsiō pe ko ha tokotaha fakaʻikaiʻi-ʻOtua: “Ko e meimei kotoa ʻo e ngaahi tohi fakasaienisi he ʻaho ní ʻoku akoʻi ai ʻa e ʻevalūsioó. ʻOkú ke tui ko e ʻevalūsioó ko ha foʻi fakakaukau fakamahalo, pe ʻokú ke fakakaukau kuo fokotuʻu ia he taimí ni ko ha foʻi moʻoni? [Tuku ke ne tali.] Ke fai ha fili makatuʻunga ʻi he ʻilo totonu, ʻoku ou tui te ke loto-tatau ʻoku totonu ke tau sivisiviʻi ʻa e ongo tafaʻaki fakatouʻosi ʻo ha meʻa. ʻOku ʻomai ʻi he polosiua ko ení ha niʻihi ʻo e fakamoʻoni ʻa ia ʻoku taki atu ai ha tokolahi ke nau tui naʻe fakatupu ʻa e moʻuí.”
Te ke ʻahiʻahiʻi nai eni: Kapau ʻokú ke ʻalu ki he akó, hili ʻa e polosiuá ʻi hoʻo tesí pea sio angé kapau ʻe langaʻi hake ai ha fieʻilo ʻa ha niʻihi ʻo e kaungākalasí.
Why Should We Worship God in Love and Truth?
Kuo fakataumuʻa ke fakamānako ki he kau Hinituú
Founga ke tuʻuaki ai iá: “ʻOku pehē ʻe ha kupuʻi lotu faka-ʻInitia ʻiloa: ‘Mei he fakakaukau halá ʻoku taki atu ai au ki he moʻoní. Mei he fakapoʻulí ʻoku taki atu ai au ki he māmá.’ ʻOkú ke fakakaukau ʻoku mahuʻinga ke lotu ki he ʻOtuá ʻi he ʻofa mo e moʻoni? [Tuku ke ne tali.] Fakatokangaʻi ʻa e meʻa naʻe leaʻaki ʻe Sīsū fekauʻaki mo ení.” Lau ʻa e Sione 4:24. Lau leva ʻa e palakalafi 4 ʻi he peesi 3 pea tuʻuaki ʻa e polosiuá.
Te ke ʻahiʻahiʻi nai eni: Kapau ʻe tali ʻe he tokotaha-ʻapí ʻa e polosiuá, lea ʻo pehē: “ʻOku pehē ʻe he kau poto Hinitū ʻe niʻihi ko e moʻoní ʻoku fufū ia ʻi hotau lotó. ʻOku pehē ʻe he niʻihi ko e moʻoní ʻoku maʻu ia ʻi he ngaahi potutohi toputapú. ʻI he taimi hokó, te u saiʻia ke lāulea ki ha fehuʻi ʻoku ʻohake ʻi he ngataʻanga ʻo e palakalafi 3 ʻi he peesi 4: ‘Ko fē ʻoku totonu ke tau hanga ki ai ke maʻu ʻa e moʻoni fakaʻotuá?’”
The Pathway to Peace and Happiness
Kuo fakataumuʻa ia ke fakamānako ki he kau Putá
Founga ke tuʻuaki ai ia ki ha tokotaha taʻumotuʻa ʻa ia ko ha tokotaha Puta: “Mahalo ʻokú ke hohaʻa ʻo hangē pē ko aú fekauʻaki mo e lahi ʻo e ngaahi fakakaukau ololalo he ʻahó ni mo e uesia ʻoku fai ʻe he ngaahi meʻá ni ki heʻetau fānaú. Ko e hā e ʻuhinga, ʻokú ke fakakaukau ai, ʻoku ʻi ai ha fakautuutu pehē ʻi he ʻulungaanga taʻetāú ʻi he toʻutupú? [Tuku ke ne tali.] Naʻá ke ʻiloʻi naʻe tomuʻa tala ʻeni ʻi ha tohi naʻe kamata ke hiki ia ki muʻa fuoloa ʻi hono fokotuʻu ʻa e lotu Kalisitiané, Hinituú, mo e Mosilemí? [Lau ʻa e 2 Tīmote 3:1-3.] Fakatokangaʻi ʻoku kei mālohi pē ʻa e ngaahi tuʻunga ko ʻení neongo ʻa e hokohoko atu ʻo e ʻiló. [Lau ʻa e veesi 7.] Ko e fakamatala ʻi he polosiua ko ení naʻe tokoniʻi ai au ke u mahinoʻi ʻa e ngaahi moʻoni ʻa ia ʻoku teʻeki ʻaupito ke ako ia ʻe he tokolahi taha ʻo e kakaí. Te ke saiʻia ke lau ia?”
Te ke ʻahiʻahiʻi nai eni: ʻI ha toe ʻaʻahi he kahaʻú, hili hono fakatupulekina ʻa e mahuʻinga ʻa e tokotaha-ʻapí ʻi he Tohi Tapú, fakahā ange ki ai ʻa e ngaahi fehuʻi ʻi he tuʻa takafi ʻi muí, pea fakahaaʻi ki ai ʻa e kūponi ki he tohi Akoʻi ʻe he Tohi Tapú. Fakamatala ange naʻá ke haʻu mo ha tatau kapau ʻokú ne loto ke sio ki ai. Fakahā ange kiate ia ʻa e fakahokohoko ʻo e meʻa ʻi loto ʻi he tohí, pea lāulea ki ha palakalafi ʻe taha pe ua ʻi he vahe ʻokú ne filí.
Real Faith—Your Key to a Happy Life
Kuo fakataumuʻa ia ke fakamānako ki he kau Mosilemi ʻoku nofo ʻi ha ʻātakai ʻa ia ʻoku nau ongoʻi tauʻatāina nai ai ke ako ʻa e Tohi Tapú
Founga ke tuʻuaki ai iá: Fakaʻaliʻali ange ʻa e fakatātā ʻi he peesi 16-17 pea pehē: “Ko e fakatātā ko ení ʻoku kehe ʻaupito ia mei he meʻa ʻoku tau sio ki ai ʻi he māmaní ʻi he ʻahó ni. ʻOkú ke fakakaukau ʻe malava ke hoko ʻi ha ʻaho ʻa e māmaní ʻo hangē ko ení? [Tuku ke ne tali.] Fakatokangaʻi ʻa e meʻa ʻoku talaʻofa mai ʻe he tohi ko eni ʻa e ʻOtuá. [Lau ha taha ʻo e ngaahi konga Tohi Tapu ʻoku lave ki aí mei hoʻo Tohi Tapú.] ʻOku tokoniʻi kitautolu ʻe he polosiua ko ení ke tau fakatupulekina ʻa e tui moʻoni ko e ngaahi talaʻofa peheé ʻe hoko moʻoni.”
Te ke ʻahiʻahiʻi nai eni: ʻI he ngataʻanga ʻo e ʻuluaki ʻaʻahí, ʻeke ange ki he tokotaha-ʻapí ke ne fili ha taha ʻo e ngaahi fehuʻi ʻi he tuʻa takafi ʻi muí. Pea fai leva ha ngaahi fokotuʻutuʻu ke lāulea ai mei he polosiuá ki he talí ʻi hoʻo toe foki atú.
Lasting Peace and Happiness—How to Find Them
Kuo fakataumuʻa ia ke fakamānako ki he kau Siainá
Founga ke tuʻuaki ai iá: “Ko e moʻui he ʻaho ní ʻoku lahi ai ʻa e ngaahi polé ʻa ia ʻoku lava ke ne kaihaʻasia meia kitautolu ʻa e fiefiá. Ko e hā te ne tokoniʻi koe ke hoko ʻo fiefiá neongo ʻa e ngaahi palopalemá? [Tuku ke ne tali.] Kuo maʻu ʻe he kakai tokolahi ʻa e fiefiá mei he muimui ki he akonaki ʻa e Tohi Tapú. [Lau ʻa e Saame 119:1, 2.] ʻOku siʻaki ʻe he niʻihi ʻa e Tohi Tapú ʻo pehē ko ha tohi ia ʻo e Hihifó. Kae fakatokangaʻi angé eni. [Lāulea ki he palakalafi 16 ʻi he peesi 17.] ʻOku lāulea ʻa e polosiua ko ení ki he founga ʻe lava ai ke tau maʻu ʻa e melino mo e fiefia tuʻuloá.”
Te ke ʻahiʻahiʻi nai eni: Kapau ʻoku tali ʻe he tokotaha-ʻapí ʻa e polosiuá, lau fakataha ʻa e ngaahi ʻuluaki sētesi ʻe tolu ʻo e palakalafi 18 ʻi he peesi 17 pea pehē: “ʻI heʻeku toe foki maí, te u saiʻia ke fakahā atu kia koe ʻa e meʻa ʻe lava ke tau hanga atu ki ai ʻo fakatatau ki he Tohi Tapú.” ʻI hoʻo toe fokí, lāulea ki he taha ʻo e ngaahi poini ʻi he palakalafi 6 ʻi he peesi 30.