Palani ʻi he Taimí Ni ke Fakalahi Hoʻo Ngāue Fakafaifekaú
1. Ko e hā ʻa e meʻa mahuʻinga ʻo fekauʻaki mo e faʻahitaʻu Fakamanatú, pea ʻe lava fēfē ke tau teuteu atu ki ai?
1 Ko e faʻahitaʻu Fakamanatu taki taha ʻokú ne ʻomai ai kiate kitautolu ha ngaahi faingamālie foʻou ke tau “fakafetaʻi lahi kia Sihova.” (Saame 109:30) Te ke fakalahi ʻa hoʻo ngāue fakafaifekaú lolotonga ʻa Maʻasi, ʻi he tuʻunga ko e taha ia ʻo e founga ke fakahaaʻi ai ʻa e houngaʻia ʻi he Tokotaha-Tokonaki ʻo e huhuʻí? Ko e taimi eni ke kamata ai hono fai ha ngaahi palani.—Pal. 21:5.
2. Naʻe anga-fēfē ʻa hoʻo fakafeangai ʻa koe mo ha niʻihi kehe ki he fokotuʻutuʻu ko ia ʻo ha holoki ʻa e houa ʻoku fiemaʻu ki he kau tāimuʻa tokoní ʻi ʻEpeleli taʻu kuo ʻosí?
2 Tāimuʻa Tokoni: ʻI he taʻu kuo ʻosí naʻe fonu ʻi he fiefiá ʻa e ngaahi fakatahaʻangá ʻi he taimi naʻa nau fanongo ai ki he fokotuʻutuʻu ko ia ʻa ia ʻe malava ai ke nau tāimuʻa tokoni ʻi ʻEpeleli fakataha mo hono holoki ʻa e houa ʻe fiemaʻu ki aí. Naʻe tohi ʻe ha tokoua ʻe taha: “ʻOku ou kei ʻi he kolisí, pea kuo ʻikai pē ke malava ia kiate au ke u tāimuʻa tuʻumaʻu. Ka te u tohi kole pē ki he houa ʻe 30 pea feinga mālohi ki he houa ʻe 50 ʻi he māhina ko ʻEpelelí.” Naʻe tohi ʻe ha tuofefine ʻoku ngāue taimi-kakato: “Houa ʻe tolungofulu—ʻoku mātuʻaki malava ia!” ʻI he taimi naʻe fanongonongo ai ʻa e fokotuʻutuʻu ko ʻení, ko ha tāimuʻa mālōlō ʻe taha, ʻa ia ʻokú ne ʻi hono taʻu 80 tupú, naʻá ne pehē: “Ko e mōmeniti eni naʻá ku tali ki aí! Naʻe ʻiloʻi ʻe Sihova naʻe hoko ʻa e tāimuʻá ko e taimi lelei taha ia ʻo ʻeku moʻuí!” Ko e faʻahinga kehe ʻa ia naʻe ʻikai lava ke nau tāimuʻa tokoní naʻa nau fokotuʻu ha ngaahi taumuʻa ke nau fai ʻa e meʻa lahi ange ʻi he ngāue fakafaifekaú.
3. Ko e hā ʻa e ngaahi ʻuhinga ke fakakaukau ai ke tāimuʻa tokoni lolotonga ʻa Maʻasi, ʻEpeleli, mo Meé?
3 ʻE hoko ʻa Maʻasi ko ha māhina lelei ʻaupito ia ke tāimuʻa tokoni ai koeʻuhí te tau toe maʻu ai ʻa e fili ko ia ki ha houa ʻe 30 pe houa ʻe 50. ʻIkai ko ia pē, kamata ʻi he ʻaho Tokonaki, Maʻasi 17, te tau kau atu ai ki ha feingangāue makehe ke fakaafeʻi mai ʻa e niʻihi kehé ke nau kau fakataha mo kitautolu ʻi he Fakamanatú ʻi ʻEpeleli 5. ʻE fiefia lahi ʻaupito ʻa e tokolahi ʻi he fakalahi ko ia ʻenau kau atu ki he ngāue fakafaifekaú pea te nau loto ai ke nau tāimuʻa tokoni ʻi ʻEpeleli pea mo Mē foki, ʻa ia ʻe houa ʻe 50 ʻa e fiemaʻu ki aí.
4. ʻE lava fēfē ke tau fakalahi atu ʻetau kau ʻi he ngāue fakafaifekaú, pea ko e hā ʻa e ola ʻe hoko aí?
4 ʻI he lolotonga ʻa hoʻomou efiafi Lotu Fakafāmili hono hokó, fēfē kapau te mou lāulea ki he founga ʻe lava ai ʻe he tokotaha taki taha ʻi he fāmilí ʻo fakalahi atu ʻene ngāue fakafaifekaú lolotonga ʻa e faʻahitaʻu Fakamanatú? (Pal. 15:22) Kole kia Sihova ke ne tāpuakiʻi hoʻo ngaahi feingá. (1 Sio. 3:22) ʻI hoʻo fakalahi ko ia hoʻo kau atu ki he ngāue fakafaifekaú, ʻe ʻikai ngata pē ʻi he toe lahi ange ai ʻa hoʻo fakahīkihikiʻi ʻa Sihová ka ʻe toe fakalahi ai foki ʻa hoʻo fiefiá.—2 Kol. 9:6.