Fakaleleiʻi ʻEtau Pōtoʻi ʻi he Ngāue Fakafaifekaú—Founga ʻo e Tali ki ha Tokotaha-ʻApi ʻIteʻita

ʻUhinga ʻOku Mahuʻinga Aí: Ko e tokolahi ʻoku tau fetaulaki mo ia ʻi he ngāue fakafaifekaú ʻoku nau anga-lelei. Kae kehe, naʻe kikiteʻi ʻe Sīsū ko e niʻihi te nau fehiʻa ʻiate kitautolu. (Sione 17:14) Ko ia ai, ʻoku ʻikai totonu ke tau ʻohovale kapau ʻoku tau fetaulaki mo ha tokotaha-ʻapi ʻiteʻita. ʻI he taimi ʻoku hoko ai ení, ʻoku tau loto ke tali ʻi ha founga te ne fakahōifuaʻi ai ʻa e tokotaha ko ia ʻoku tau fakafofongaʻí, ʻa Sihova. (Loma 12:17-21; 1 Pita 3:15) ʻI hono fai ení ngalingali te ne taʻofi ʻa e fakalalahi e tuʻungá. ʻOku toe ʻoatu ai ha fakamoʻoni ki he tokotaha-ʻapí pea mo e faʻahinga ʻoku ʻi aí, ʻo ueʻi ai kinautolu ke nau hehemangofua ke fanongo ʻi ha toe ʻaʻahi atu ʻa e Kau Fakamoʻoni ʻa Sihová.—2 Kol. 6:3.