Ko ʻEtau Uepisaiti Fakaʻofisialé—Ngāueʻaki Ia ʻi Hoʻo Ngāue Fakafaifekaú
Fakahanga ʻa e Kakaí ki he Uepisaití: Ko e niʻihi ʻoku nau toumoua ke talanoa mo kitautolu pe tali ʻa e ʻū tohí te nau loto-lelei ke sivisiviʻi ʻa e Kau Fakamoʻoni ʻa Sihová ʻaki hono kumi ʻi he jw.org ʻiate ia pē ʻi hono ʻapí. Ko ia fakamatalaʻi ki he kakaí ʻa e Uepisaití ʻi he faingamālie kotoa pē.
Tali ʻa e Fehuʻí: ʻI he taimi ʻe niʻihi ko ha tokotaha-ʻapi, ko ha tokotaha mahuʻingaʻia pe ko ha maheni te ne ʻeke ha fehuʻi fekauʻaki mo e Kau Fakamoʻoni ʻa Sihová pe ko ʻetau ngaahi tuí. Fakahaaʻi ange ʻa e talí ʻi he taimi pē ko iá, ngāueʻaki ʻa e telefoni toʻotoʻó pe ko ha komipiuta. ʻOku faʻa lelei tahá ke lau ʻa e potu folofola ʻoku haá mei he Tohi Tapú. Kapau ʻoku ʻikai ke ʻi ai haʻo meʻa fakaʻinitaneti, fakamatalaʻi ki he tokotahá ʻa e founga hono ngāueʻaki ʻa e jw.org ke kumi ʻa e talí ʻiate ia pē.—ʻAlu ki he “Bible Teachings/Bible Questions Answered” pe “About Us/Frequently Asked Questions.”
ʻOatu ha Kupu pe ha Tohi ki ha Taha ʻOkú Ke ʻIlo: ʻAi ʻa e PDF pe EPUB kuo hikí ki he ʻīmeilí. Pe hiki ha vitiō ʻo e tohí ki ha CD. Ko e taimi taki taha te ke ʻoange ai ki ha tokotaha ʻoku ʻikai papitaiso ha tohi kakato fakaʻilekitulōnika, polosiua pe makasini te ke lau nai ia ko e tufa tohi. ʻOku totonu ke ʻoua ʻe ʻave ʻa e fakamatalá ʻo fuʻu lahi pe ki ha taha ʻoku ʻikai ke ne ʻiloʻi koe. Pehē foki ke ʻoua ʻe toe hiki ki ha faʻahinga Uepi kehe.—ʻAlu ki he “Publications.”
Fakahaaʻi ʻa e Ongoongo Fakamuimui Tahá Fekauʻaki mo e Kau Fakamoʻoni Sihová: ʻE tokoniʻi heni ʻa e tokotaha ako Tohi Tapú mo e niʻihi kehe ʻokú ke ʻaʻahi ki aí ke fakatupulekina ha houngaʻia ki he tuʻunga fakaemāmani lahi ʻo ʻetau ngāué mo ʻetau fāʻūtaha faka-Kalisitiané. (Saame 133:1)—ʻAlu ki he “News.”
[Fakatātā ʻi he peesi 5]
(Ki he fakamatala kakato, sio ki he tohí)
ʻAhiʻahiʻi Ia
1 ʻI he “Publications,” kumi ʻa e meʻa ʻokú ke loto ke hikí pea lomi ki he fakamatala pe fōmeti vitiō ʻokú ke fiemaʻú.
2 Lomiʻi ʻa e MP3 ke ʻasi mai ha lisi ʻo e ngaahi kupu taki taha. Lomiʻi ʻa e kupu ʻo e kaveinga ke hikí pe ▸ fanongo ki ai ʻi he netí.
3 Fili ha lea ʻe taha mei he lisi ko ení kapau ʻokú ke loto ke hiki ha tohi ʻi he lea ko iá.