Fakamānako ʻa e Faʻu ʻo e Ngaahi Tuleki Foʻoú!
1. Ko e hā ʻa e ngaahi meʻangāue ki he ngāue fakamalangá ʻoku fakamānako hono faʻu foʻoú?
1 Ko e ngaahi tuleki foʻou ʻe 5 naʻe tukuange mai ʻi he fakataha-lahi fakavahe 2013 ‘Ko e Folofola ʻa e ʻOtuá ko e Moʻoní Ia!’ Tānaki atu ki aí, ko e Ongoongo ʻo e Puleʻanga Fika 38, naʻe fakakaveinga “ʻE Toe Moʻui Mai Koā ʻa e Kau Maté?” kuo tānaki atu ki he ngaahi tuleki ko ení. Ko e ngaahi tuleki kotoa ʻe ono ko ení ʻoku fakamānako hono faʻu foʻoú. Ko e hā ʻa e ngaahi ʻuhinga ki he faʻu foʻou ko ení? ʻI he taimi ʻoku tau tuʻuaki atu ia ʻi he ngāue fale ki he falé, ʻe lava fēfē ke tau ngāueleleiʻaki ʻa e ngaahi fokotuʻutuʻu foʻou ʻi he tulekí?
2. Ko e hā ʻa e taumuʻa ʻo e faʻu foʻou ko ení?
2 Ko e Hā ʻOku Faʻu Foʻou Aí?: Ko e ola lelei ʻo ha tuʻuaki ʻi he ngāue fale ki he falé ʻoku faʻa kau ai ʻa e ngaahi sitepu ʻe fā ko ení: (1) ʻEke ha fehuʻi fakatupu fakakaukau ke kamata ha fetalanoaʻaki. (2) Fakahaaʻi ha fakakaukau mei he Tohi Tapú. (3) Tuʻuaki ʻa e tohi ki he tokotaha-ʻapí ke lau. (4) Tuku ha fehuʻi ke tali ʻi he ʻaʻahi hono hokó, pea fokotuʻutuʻu ke fai ha toe foki. Ko e faʻu foʻou ʻo e ngaahi tulekí ʻoku tokoniʻi ai kitautolu ke faingofua ʻetau muimui ʻi he kotoa ʻo e ngaahi sitepu ʻe faá.
3. ʻE anga-fēfē nai haʻatau tuʻuaki ʻa e taha ʻo e ngaahi tuleki foʻoú ʻi he ngāue fakafaifekaú?
3 Founga Hono Ngāueʻaki Iá: (1) Hili hono fai ha fakafeʻiloaki, fakahaaʻi ki he tokotaha-ʻapí ʻa e ngaahi fehuʻi fakamānako ʻi muʻa ʻi he tulekí, pea ʻeke ki he anga ʻene fakakaukaú. (2) Fakaava ʻa e tulekí pea lāulea ki he “Ko e Lau ʻa e Tohi Tapú.” Lau hangatonu ha konga Tohi Tapu mei he Tohi Tapú kapau ʻoku faingamālie. Kapau ʻoku ʻi ai ha taimi lahi ange ʻa e tokotaha-ʻapí, lāulea ki he “ʻAonga Te Ke Maʻu Mei Aí.” (3) Tuʻuaki ʻa e tulekí pea fakalototoʻaʻi ia ke lau kotoa ʻi haʻane faingamālie. (4) Ki muʻa ke ke mavahé, fakahaaʻi ange kiate ia ʻa e fehuʻi ʻi he peesi fakaʻosi ʻo e tulekí “Ke Fakakaukau Ki Ai” pea fai ha ngaahi fokotuʻutuʻu ke lāulea ki he tali mei he Tohi Tapú ʻi he ʻaʻahi hokó.
4. ʻE anga-fēfē haʻatau ngāueʻaki ʻa e ngaahi tuleki foʻoú ʻi he toe ʻaʻahí?
4 ʻOku faingofua foki ʻa e toe ʻaʻahí. Ngāueʻaki ʻa e konga Tohi Tapu ʻoku hā ʻi he peesi fakaʻosi ʻo e tulekí ke tali ʻa e fehuʻi naʻá ke ʻeke ʻi he fakaʻosinga hoʻo ʻaʻahi fakamuimuí. Ki muʻa ke ke mavahé, fakahaaʻi ʻa e fakatātā ʻo e polosiua Ongoongo Lelei pea fili ʻa e lēsoni ʻoku ʻi ai ʻa e fakamatala lahi ange ki he kaveinga ko iá pea tuʻuaki ʻa e polosiuá. Kapau te ne saiʻia ai, fai ha fokotuʻutuʻu ke lāulea ki he poloisuá ʻi hoʻo ʻaʻahi hono hokó. Kuó ke kamata ha Ako Tohi Tapu! Kapau ʻoku ʻikai tuʻuaki ʻa e polosiuá, ʻe lava ke ke tuʻuaki ha tuleki kehe pea fokotuʻutuʻu ke toe foki ʻo lāulea ki ai mo e tokotaha-ʻapí.
5. Ko e hā hono mahuʻinga ʻo e ngaahi tulekí ʻi heʻetau ngāue fakafaifekaú?
5 Kuo ngāueʻaki ʻa e ngaahi tulekí ʻi heʻetau ngāue fakafaifekaú ʻo laka hake ʻi he taʻu ʻe 130. Neongo ko honau lalahí mo hono faʻú ʻoku kehekehe, ka kuo hoko ia ko ha meʻangāue ola lelei ʻaupito ʻi he faifakamoʻoní. ʻOfa ke tau ngāueleleiʻaki ʻa e faʻu foʻou ko ení ke hokohoko atu hono fakamafola ʻa e ʻilo faka-Tohi Tapú ʻi he māmaní.—Pal. 15:7a.