Founga Hono Kamataʻi ha Fetalanoaʻaki ʻo Ngāueʻaki ʻa e Tulekí

Talu mei Sanuali 2018, ko e takafi ʻo e Polokalama Ngāue ki he Fakataha Moʻuí mo e Ngāue Fakafaifekaú kuo hā ai ʻa e sīpinga fetalanoaʻakí. Kuo fakalototoʻaʻi kitautolu ke tau tokangataha ki he fetalanoaʻaki mo e kakaí kae ʻikai ko hono tuʻuaki pē ʻa e ngaahi tohí. Ke tokoniʻi ʻa e kau malangá ke feʻunuʻaki ʻenau fakaleá, ko e vitiō ʻo e sīpinga fetalanoaʻakí ʻoku fakahaaʻi ai ʻa e founga ke kamataʻi ha fetalanoaʻaki ʻo ngāueʻaki pē ʻa e Tohi Tapú. Kae kehe, ʻoku ʻuhinga nai eni heʻikai ke tau toe ngāueʻaki ʻe kitautolu ʻa e ʻū tohí ʻi he ngāue fale ki he falé? ʻIkai! Ko e fakatātaá, ko e tulekí ʻe lava ke hoko ia ko ha founga ola lelei ke kamataʻi ai ha fetalanoaʻaki. ʻE lava ke tau ngāueʻaki ʻa e founga ko ení ʻi hono tuʻuaki ha faʻahinga tuleki pē:

1. ʻEke ʻa e fehuʻi ʻi he takafí.

2. Fakahaaʻi e tali ʻa e Tohi Tapú ʻi he konga Tohi Tapu ʻi he kamataʻanga ʻo e peesi hono hokó. Kapau ʻoku ʻi ai ha taimi, lau pea fetalanoaʻaki ki ha fakamatala ʻi he tulekí.

3. ʻAve ʻa e tulekí ki he tokotaha-ʻapí, pea fakalototoʻaʻi ke ne lau ia ʻi haʻane faingamālie.

4. Ki muʻa ke ke mavahé, fakahaaʻi ʻa e fehuʻi “Ke Fakakaukau ki Ai” pea fokotuʻutuʻu ke lāulea ki he tali ʻa e Tohi Tapú ʻi he taimi hokó.

ʻI hoʻo toe fokí, lāulea ki he talí pea tuku ha fehuʻi ke lāulea ki ai ʻi he taimi hokó. Te ke fili nai ha fehuʻi mei heʻetau uepisaití pe mei he tohi ʻoku hā ʻi he tuʻa takafí. ʻI ha taimi feʻungamālie, fakaʻaliʻali ʻa e polosiua Ongoongo Lelei mei he ʻOtuá! pe ko ha tohi ako kehe mei he Puha Meʻangāue Fakafaiakó.