Ngāue Leva ke Fakahoko ʻa e Ngaahi Fiemaʻú

Talu ʻa hono toe fokotuʻutuʻu foʻou ʻetau Uepisaití, kuo tupu fakautuutu ʻa e kole ki ha ngaahi ako Tohi Tapu ʻi he ʻinitanetí. Naʻe toe tānaki mai mo ha ngaahi kole ki ha ako Tohi Tapu ʻo fakafou ʻi he founga foʻou ʻo e faifakamoʻoni ʻi he feituʻu kakaí. Naʻe ngāue ki ai ʻa e ʻōfisi vaʻá ʻi he vave taha ʻenau malavá. Ko e fakatātaá, kapau naʻe fai mai ha kole fakafou ʻi he jw.org, ʻe fakahaaʻi ʻe he ʻōfisi vaʻá ki he kau mātuʻa ʻi he feituʻu ngāue ʻoku ʻi ai ʻa e tokotaha mahuʻingaʻiá ʻi he hili pē ha ʻaho ʻe 2. Kae kehe, ʻoku fakahaaʻi ʻi he ngaahi līpooti mei he malaʻe ngāué ko e niʻihi ko ia naʻa nau kole ki ha ako Tohi Tapú ʻoku teʻeki ai pē ke fai ange ha fetuʻutaki ʻi ha ngaahi uike. ʻE lava fēfē ke tau fakapapauʻi ke ʻoatu ha tokoni ki ha taha ki muʻa ke mole atu ʻene mahuʻingaʻiá?—Mk. 4:14, 15.

Kapau ʻoku ʻikai ke nofo ʻa e tokotaha mahuʻingaʻiá ʻi hoʻo feituʻu ngāué, fakafonu leva ʻa e foomu Please Follow Up (S-43) pea ʻoange ia ki he sekelitalí ʻo ʻikai toe tōmui ange ʻi he fakataha hokó. ʻOku totonu ke ʻave ʻe he sekelitalí ʻa e fakamatalá ki he fakatahaʻanga ʻoku feʻungamālie mo iá ʻi ha ʻaho ʻe taha pe ua pe ʻave ia ki he ʻōfisi vaʻá ʻo ngāueʻaki ʻa e Congregation tab ʻi he jw.org. ʻOku totonu ke vakaiʻi maʻu pē ʻe he kau mātuʻá ʻa e Uepisaití. Kapau ʻoku fakahaaʻi mai ke nau ʻaʻahi ki ha taha, ʻoku totonu ke nau fakahoko ia ʻi he vave tahá. Kapau ʻoku kole ki ha tokotaha malanga ke ne fai ʻa e ʻaʻahí ʻoku totonu ke ne ʻai ko e meʻa muʻomuʻá ia. Kapau ʻoku ʻikai ke ʻi ʻapi ʻa e tokotahá, ʻe lava nai ke ke tuku ha kiʻi nouti fakataha mo ho tuʻasilá.