Fakaleleiʻi ʻEtau Pōtoʻi ʻi he Ngāue Fakafaifekaú—Tali ki he Ngaahi Taʻofiʻanga ʻo e Fetalanoaʻakí

ʻUhinga ʻOku Mahuʻinga Aí: Sioloto atu ʻokú ke ʻiloʻi ha fakatamaki fakanatula ʻoku vave ke tō mai. ʻE mate ʻa e kakaí kapau heʻikai te nau hola ke hao. ʻOkú ke ʻalu ki ho kaungāʻapí ke fakatokanga ki ai, ka ʻokú ne lea fakavave atu, ʻo pehē ʻokú ne femoʻuekina. Ko e moʻoni, heʻikai ke tuku vave hoʻo ngaahi feinga ke tokoniʻi iá! Ko e tokolahi ʻi hotau feituʻu ngāué ʻoku nau talitekeʻi kitautolu, ʻo ʻikai ʻiloʻi ʻa e mahuʻinga ʻo ʻetau pōpoaki fakahaofi moʻuí. ʻI he taimi ʻoku tau ʻaʻahi atu aí, ngalingali ʻoku nau femoʻuekina. (Māt. 24:37-39) Pe mahalo kuo nau tomuʻa fehiʻa koeʻuhi ko ha ngaahi talanoa taʻemoʻoni. (Māt. 11:18, 19) Te nau fakakaukau nai ʻoku ʻikai haʻatau kehe mei he ngaahi lotu ko ia ʻoku hā mei ai ʻa e ngaahi fua koví. (2 Pita 2:1, 2) Kapau ʻoku ʻikai mahuʻingaʻia ʻa e tokotaha-ʻapí ʻi he ʻuluaki taimí, ʻoku ʻikai totonu ke tau foʻi vave ai.

Founga Hono Fai Iá:

Ki muʻa ke kau atu ʻi he malanga fale ki he falé, ʻai ha ngaahi miniti siʻi ke fakakaukau ai fekauʻaki mo e ngaahi taʻofiʻanga ʻo e fetalanoaʻakí ʻe ngalingali te ke fetaulaki nai mo ia pea fakakaukau ki he founga ke tali ʻakí.
Kapau ʻe fakahaaʻi ʻe he tokotaha-ʻapí ha fakafepaki, feinga fakapotopoto ke hokohoko atu ʻa e fetalanoaʻakí. Ngalingali te ke fai ia ʻaki hono fakaongoongoleleiʻi ia. Ko e fakatātaá, kapau te ne pehē ʻoku ʻi ai pē ʻene lotu ʻaʻana, te ke tali nai, “Naʻá ku ʻamanaki pē ke maʻu ha taha hangē ko koé ʻa ia ʻoku mahuʻingaʻia ʻi he ngaahi meʻa fakalaumālié.” ʻI he taimi ʻe niʻihi ko hono ʻiloʻi ʻa e ngaahi ongoʻi mo e tuʻunga ʻo e tokotaha-ʻapí te ne ʻai ai koe ke hokohoko atu hoʻo faifakamoʻoní. Ko e fakatātaá, kapau ʻokú ne pehē ʻokú ne femoʻuekina, te ke tali nai, “ʻOku mahino kiate au. Ka ki muʻa ke u ʻalú, te u saiʻia ke ʻoatu eni.” Ko e fokotuʻu ʻe taha ʻe lava ke ke ʻeke ha fehuʻi kapau ʻe pehē ʻe he tokotaha-ʻapí ʻoku ʻikai ke ne mahuʻingaʻia. ʻE lava ke ke pehē, “Ko hoʻo ʻuhingá ʻoku ʻikai te ke mahuʻingaʻia ʻi he Tohi Tapú, pe ko e lotú fakalūkufua ia ʻoku ʻikai te ke mahuʻingaʻia aí?”
Ngāueʻaki ʻa e fakafuofua lelei. Manatuʻi ʻoku ʻikai fakamālohiʻi ʻe Sihova ʻa e kakaí ke nau fanongo. (Teu. 30:19) Ko e tokotaha kotoa kuo pau ke taki taha fua hono fatongia fakalaumālie. (Kal. 6:5) Kapau ʻoku anga-kakaha mai ʻa e tokotaha-ʻapí, ko e lelei tahá ke mavahe leva. ʻI hono fakahāhā ʻa e tokaʻi ki heʻene ngaahi ongoʻí, ʻoku tau fakaava nai ai ʻa e matapā ki he tokotaha malanga ʻe tahá ke ne faifakamoʻoni ki ai ʻi he kahaʻú.—1 Pita 3:15.

ʻAhiʻahiʻi Eni ʻi he Lolotonga ʻa e Māhiná:

ʻI he taimi te ke fetaulaki ai mo ha taʻofiʻanga ʻo e fetalanoaʻakí, hili ʻa e mavahe mei he tokotaha-ʻapí, talanoa mo ho hoa ngāué ki he founga lelei ange ke tali nai ʻakí.