Faiako ʻAki ʻa e Polosiua Ongoongo Lelei
1. ʻOku anga-fēfē hono faʻu ʻa e polosiua Ongoongo Lelei?
1 Hangē ko ia naʻe lāulea ki ai ʻa e ʻīsiu ʻo e Ko ʻEtau Ngāue Fakafaifekau ʻo Siulaí, ko e taha ʻo e meʻangāue mahuʻinga ʻi heʻetau puha meʻangāué ko e polosiua Ongoongo Lelei mei he ʻOtuá! Ko e ngaahi konga Tohi Tapú ʻoku ʻikai hā hono fakaleá koeʻuhí ke lava ʻa e tokotaha-ʻapí ʻo ako hangatonu ia mei he Tohi Tapú. Koeʻuhi ko e lahi taha ʻo ʻetau ʻū tohi akó kuo hiki ia ʻi ha founga ʻoku lava ke ako ʻa e tokotaha lautohí ʻiate ia pē, ko e tohi ko ení naʻe faʻu ia ke lāulea ki ai mo ha faiako. Ko ia ai, ʻi heʻetau tuʻuaki atu iá, ʻoku totonu ke tau feinga ke fakahāhaaʻi ʻa e akó koeʻuhi ke lava ʻa e tokotaha-ʻapí ʻo sio ki he fakafiefia hono ako ʻa e ongoongo lelei mei he Tohi Tapú.—Māt. 13:44.
2. ʻE lava fēfē ke tau ngāueʻaki ʻa e polosiua Ongoongo Lelei ʻi he ʻuluaki ʻaʻahí?
2 ʻI he ʻUluaki ʻAʻahí: Te ke pehē nai: “ʻOku ou ʻi hení koeʻuhi ʻoku hohaʻa ʻa e kakaí fekauʻaki mo e feituʻu ʻoku huʻu atu ki ai ʻa e māmani ko ení. ʻOkú ke fakakaukau ʻe toe fakaleleiʻi ʻa e ngaahi tuʻungá? [Tuku ke ne tali.] ʻOku ʻi he Tohi Tapú ʻa e ngaahi ongoongo lelei ʻoku lava ke ne ʻomai kiate kitautolu ʻa e ʻamanaki. Ko e niʻihi eni ʻo e ngaahi fehuʻi ʻoku tali ʻe he Tohi Tapú.” ʻOange ki he tokotaha-ʻapí ʻa e polosiuá, pea fakaafeʻi ia ke ne fili ha fehuʻi mei he takafi ʻi muí. Fakahāhaaʻi leva ʻa e akó ʻo ngāueʻaki ʻa e ʻuluaki palakalafi ʻo e lēsoni ko iá. Ko e fokotuʻu ʻe taha ko hono ʻeke ki he tokotaha-ʻapí ha fehuʻi langaʻi mahuʻingaʻia ʻo makatuʻunga ʻi he lēsoni naʻá ke filí pea fakahāhaaʻi leva ʻa e founga ʻe tokoni ai ʻa e polosiuá ke ne maʻu ʻa e tali mei he Tohi Tapú. Kapau ʻoku ʻi ai ha vitiō ʻoku fekauʻaki mo e lēsoni ko iá ʻi he jw.org, ʻoku huluʻi ia ʻe he kau malanga ʻe niʻihi ʻi he lolotonga ʻenau malangá.
3. Fakamatala ki he founga hono fakahoko ʻo e akó ʻo ngāueʻaki ʻa e polosiua Ongoongo Lelei.
3 Founga Hono Fakahoko ʻo e Akó: (1) Lau ʻa e fehuʻi kuo fakafika ʻoku pulusi mataʻāʻaá ke tokoniʻi ʻa e tokotaha-ʻapí ke tokangataha ki he poini tefitó. (2) Lau ʻa e palakalafi hoko haké. (3) Lau ʻa e ngaahi konga Tohi Tapu ʻoku tuʻu fakaheiheí, pea ngāueʻaki mo ha ngaahi fehuʻi fakatupu fakakaukau ke tokoniʻi ʻa e tokotaha-ʻapí ke sio ki he anga hono tali ʻe he ngaahi konga Tohi Tapú ʻa e fehuʻi kuo fakafiká. (4) Kapau ʻoku ʻi ai ha toe palakalafi ʻi lalo ʻi he fehuʻí, toe muimui pē ʻi he sitepu 2 mo e 3. Kapau ʻoku fehoanaki ʻa e vitioó mo e fehuʻí pea teʻeki ai ke ke huluʻi ia ki he tokotaha-ʻapí, fai ia ʻi he lolotonga ʻa e fetalanoaʻakí. (5) Fakaʻosí, ʻeke ki he tokotaha-ʻapí ʻa e tali ki he fehuʻi kuo fakafiká ke fakapapauʻi ʻokú ne mahinoʻi.
4. Ko e hā te ne tokoniʻi kitautolu ke ngāueʻaki pōtoʻi ʻa e meʻangāue ʻaonga ko ení?
4 Hoko ʻo maheni mo e meʻangāue ʻaonga ko ení. Ngāueʻaki ia ʻi he taimi feʻungamālie kotoa pē. Ki muʻa ʻi he ako taki taha, fakakaukau fekauʻaki mo e tokotaha akó mo e founga lelei taha ke fakaʻuhinga ai mo iá, ʻo ngāueʻaki ʻa e ngaahi konga Tohi Tapu ʻi he lēsoní. (Pal. 15:28; Ngā. 17:2, 3) ʻI hoʻo maʻu ʻa e taukei mo e pōtoʻí, te ke vakai ai ki he polosiua ko ení ko e taha hoʻo meʻangāue ʻokú ke saiʻia taha ke ngāueʻaki ki hono akoʻi ʻa e kakaí ki he moʻoní!