Ngaahi Tōnounou ke Fakaʻehiʻehi mei Ai ʻi Hono Fai ha Ako Tohi Tapu

Fuʻu Lahilahi Fakamatala: ʻOua ʻe fakakaukau kuo pau ke ke fakamatalaʻi e meʻa kotoa pē. Naʻe ngāueʻaki ʻe Sīsū ʻa e ngaahi fehuʻí ke tokoniʻi e kakaí ke fakakaukau pea aʻu ki he fakamulituku totonu. (Māt. 17:24-27) Ko e ngaahi fehuʻí ʻokú ne ʻai ʻa e akó ke longomoʻui pea tokoniʻi koe ke fakapapauʻi ʻa e meʻa ʻoku mahinoʻi mo tui ki ai hoʻo tokotaha akó. (be 253 ¶3-4) ʻI hono ʻeke ha fehuʻi, anga-kātaki pē ʻo tatali ki he talí. Kapau ʻe hala ʻa e tali e tokotaha akó, toe ngāueʻaki ha fehuʻi taki ke aʻu ai ki he fakamulituku totonú kae ʻikai ko hono tala ange ʻa e talí. (be 238 ¶1-2) Lea ʻi ha vave ʻoku fakaʻatā ai ʻa e tokotaha akó ke mahinoʻi ʻa e ngaahi fakakaukau foʻoú.​—be 230 ¶4.

ʻAi ke Fihi: Fakaʻehiʻehi mei he fakatauele ko ia ke fakamatalaʻi kotoa e meʻa ʻokú ke ʻilo fekauʻaki mo e kaveingá. (Sione 16:12) Fakahanga taha pē ki he poini tefito ʻi he palakalafí. (be 226 ¶4-5) Ko e ngaahi fakaikiikí, naʻa mo e fakaikiiki ʻoku fakamānakó, ʻoku lava pē ke fakapuputuʻuʻi ai ʻa e ngaahi poini tefitó. (be 235 ¶3) Ko ʻene mahinoʻi pē ʻe he tokotaha akó ʻa e poini tefitó, hiki leva ki he palakalafi hokó.

ʻOsiki Pē ʻa e Fakamatalá: Ko ʻetau taumuʻá ke aʻu ki he loto ʻo e tokotaha akó kae ʻikai ko hono ʻosiki ʻa e fakamatalá. (Luke 24:32) Ngāueʻaki ʻa e mālohi ʻo e Folofola ʻa e ʻOtuá ʻo tokangataha ki he ngaahi konga Tohi Tapu tefito ʻi he lēsoní. (2 Kol. 10:4; Hep. 4:12; be 144 ¶1-3) Ngāueʻaki ha ngaahi talanoa fakatātā faingofua. (be 245 ¶2-4) Fakakaukau ki he pole fakafoʻituitui ʻa e tokotaha akó mo ʻene tuí, pea ʻai ʻa e fakamatalá ke fehoanaki mo ia. ʻEke ʻa e ngaahi fehuʻi hangē ko ení: “ʻOku fēfē hoʻo ongoʻi fekauʻaki mo e meʻa ʻokú ke ako ʻi hení?” “Ko e hā ʻoku akoʻi mai heni ʻo fekauʻaki mo Sihová?” “Ko e hā ʻa e lelei ʻokú ke maʻu ʻi hono ngāueʻaki ʻa e akonaki ko ení?”—be 238 ¶3-5; 259 ¶1.