ʻOkú Ke Maʻu ʻAonga mei Hono Vakaiʻi Fakaʻaho ʻa e Tohi Tapú?

ʻOku kau ʻi hoʻo taimi-tēpile fakalaumālié ʻa hono lau ʻa e konga tohi mo e fakamatala mei Hono Vakaiʻi Fakaʻaho ʻa e Tohi Tapú? Kapau ʻoku ʻikai, ʻe lava ke ke ʻai ia ko e konga hoʻo taimi-tēpilé? Ko e tokolahi ʻoku nau lāulea ki he konga tohí ʻi he houa pongipongí kae lava ke nau fakalaulauloto ki he ngaahi fakakaukau ko iá lolotonga ʻa e ʻahó. (Sios. 1:8; Saame 119:97) ʻE lava fēfē ke ke maʻu ʻaonga lahi ange mei he konga tohí? Lau ʻa e potutohi ʻo e konga Tohi Tapú ke fakapapauʻi ʻa e puipuituʻá. Fakakaukau ki ha fakamatala Fakatohitapu ʻoku fakatātāʻi ai ʻa e tefitoʻi moʻoni ʻoku fakamamafaʻi ʻi he konga tohí. Ngāueʻaki leva ia ʻi hoʻo moʻuí tonu. ʻI hono tākiekina ʻe he Folofola ʻa e ʻOtuá hoʻo ngaahi filí te ne tataki hoʻo moʻuí pea te ke maʻu ʻaonga moʻoni mei ai.—Saame 119:105.

Ko e fāmili Pēteli ʻi he kotoa ʻo e māmaní ʻoku nau Vakaiʻi Fakaʻaho ʻa e Tohi Tapú lolotonga e kai pongipongí. ʻI he ngaahi taʻu ki muí ni maí, kuo lava ke maʻu ʻa e ngaahi lāulea ko ení ʻi he JW Broadcasting^® ʻi he FAKATAHA MAKEHE. Ko fē taimi fakamuimui taha naʻá ke toe sio ai he taha ʻo e polokalama ko ení? Mahalo ko e ngaahi fakamatala ko iá, ko e meʻa tofu pē ia ʻokú ke fiemaʻú. Ko e fakatātaá, ʻe lava fēfē ke tākiekina hoʻo ngaahi filí ʻe he talanoa kia Loté?

SIO ʻI HE VITIŌ ʻOUA ʻE ʻOFA KI HE MĀMANÍ (1 SIO. 2:15), PEA TALI LEVA ʻA E NGAAHI FEHUʻI KO ENÍ:

• Ko e hā ʻa e tefitoʻi moʻoni Fakatohitapu naʻe makatuʻunga ai ʻa e lāulea ʻi he Lotu Pongipongi ko ení?

• ʻOku anga-fēfē hono fakatātaaʻi ʻe he talanoa kia Loté ʻa e fakatuʻutāmaki ʻo e ʻofa ki he māmaní pe ko e ngaahi meʻa ʻi aí?—Sēn. 13:12; 14:12; 19:3, 12, 13, 24-26

• ʻE lava fēfē ke tau fakahāhā ʻoku tau ʻofa kia Sihova kae ʻikai ko e māmaní pe ko e ngaahi meʻa ʻi aí?