MOʻUI KO HA KALISITIANE
Ko Hai Ho Kaungāmeʻa ʻi he ʻInitanetí?
ʻOku fakaʻuhingaʻi ʻa e kaumeʻá ko ha “tokotaha ʻoku pipiki ki ha taha ʻi he ʻofá pe ko e mahuʻingaʻiá.” Ko e fakatātaá, naʻe kamata ʻa e kaungāmeʻa tuʻuloa ʻa Sionatane mo Tēvitá ʻi he hili hono tāmateʻi ʻe Tēvita ʻa Kolaiaté. (1 Sām. 18:1) Naʻá na maʻu ʻa e ngaahi ʻulungaanga naʻe tohoakiʻi ai kinaua ke na kaungāmeʻá. Ko ia ai, ko ha kaumeʻa mālohi ʻoku makatuʻunga ia ʻi he ʻilo totonú. Ke hoko ʻo ʻiloʻi lelei ha tokotaha ʻoku fiemaʻu ki ai ʻa e taimi mo e feinga. Kae kehe, ʻoku faingofua ki he kakaí ke maʻu ha “ngaahi kaungāmeʻa” ʻi he netiueka fakasōsialé ʻi ha kiʻi foʻi lomi pē. Koeʻuhi ko e kakai ʻoku nau ngāueʻaki ʻa e ʻInitanetí, ʻoku malava ke nau leaʻaki ʻa e meʻa ʻoku nau fie leaʻakí pea puleʻi ʻa e anga ʻo e vakai ʻa e niʻihi kehé kiate kinautolú. Ko ia, ʻoku faingofua ke nau fufū honau angaʻitangatá tonu. Ko ia ai, ʻoku totonu ke ke fakakaukau fakalelei ki he faʻahinga kakai ʻokú ke tali ke hoko ko ho kaungāmeʻá. Kapau ʻoku ʻikai te ke ʻiloʻi lelei ʻa e tokotahá pea ʻoua te ke tali ia ʻi he mītia fakasōsialé. ʻOua te ke ilifia naʻa ʻokú ke fakalotomamahiʻi ia ʻi hoʻo tukunoaʻi mo talitekeʻi iá. ʻI he vakai atu ki he ngaahi fakatuʻutāmaki ʻe ala hokó, ʻoku fili ai ʻa e niʻihi ke ʻoua te nau ngāueʻaki ʻa e netiueka fakasōsialé. Kae kehe, kapau ʻokú ke fili ke ngāueʻaki ʻa e netiueka fakasōsialé, ko e hā ʻoku totonu ke ke manatuʻí?
SIO ʻI HE VITIŌ NGĀUEʻAKI FAKAPOTOPOTO ʻA E ʻINITANETÍ, PEA TALI LEVA ʻA E NGAAHI FEHUʻI KO ENÍ:
Ko e hā ʻoku totonu ke ke fakakaukau ki aí ki muʻa ke ke fai ha tohi pea tuku atu ha ngaahi tā?
Ko e hā ʻoku totonu ai ke ke fili fakapotopoto ho ngaahi kaumeʻa ʻi he ʻInitanetí?
Ko e hā ʻoku totonu ai ke ke fokotuʻu ha taimi fakangatangata ʻi hoʻo ngāueʻaki ʻa e netiueka fakasōsialé?—ʻEf. 5:15, 16