Ko e Hā ʻOku ʻIkai Tali Ai ʻe he ʻOtuá ʻa e Lotu Kotoa Pē?

“ʻI hono fai ha lotú, ʻoua ʻe toutou leaʻaki ʻa e ngaahi meʻa tatau.”​—Mātiu 6:7.

ʻOku ʻikai ke finangalo ʻa Sihova ke tau toutou leaʻaki ha ngaahi lotu kuo ako maʻuloto pe lau ia mei ha tohi lotu. ʻI hono kehé, ko hono finangaló ke tau lotu mei he lotó. Sioloto atu ki he fakatupu ʻita ʻa ha kaumeʻa ʻokú ne toutou leaʻaki ʻa e meʻa tatau ʻi he ʻaho ki he ʻaho. Ko e ngaahi kaumeʻa leleí ʻoku nau lea tauʻatāina mo loto-moʻoni. ʻI heʻetau lotu ʻo ngāueʻaki ʻetau lea pē ʻatautolú, ʻoku tau talanoa fekoekoeʻi ai mo ʻetau Tamai fakahēvaní.

“ʻI he taimi ʻoku mou kole aí, ʻoku ʻikai te mou maʻu koeʻuhí ʻoku mou kole ʻi ha taumuʻa hala.”​—Sēmisi 4:3.

Heʻikai ʻaupito ke tau ʻamanekina ʻe tali ʻe he ʻOtuá ʻetau ngaahi lotú kapau te tau kole ha ngaahi meʻa ʻoku tau ʻiloʻi ʻoku ʻikai ke ne finangalo ke tau fai pe maʻu. Ko e fakatātaá, ʻe tali ʻe Sihova ʻa e kole ha tokotaha pelepaʻanga ki ha monū lolotonga iá kuó Ne fakatokanga mahino mai fekauʻaki mo e mānumanú mo e tui fakafaʻahikehe ki he monuú? (ʻAisea 65:11; Luke 12:15) He taʻeʻuhinga ē ke ʻamanekina ʻe tali ʻe Sihova ʻa e ngaahi lotu peheé! Ke tali ʻe he ʻOtuá ʻetau lotu kiate iá, kuo pau ke tau fakapapauʻi ʻoku fehoanaki ʻetau ngaahi kolé mo e meʻa ʻokú ne tala mai ʻi he Tohi Tapú.

“Ko e tokotaha ʻoku fakafisi ke fanongo ki he laó​—naʻa mo ʻene lotú ʻoku fakalielia ia.”​—Palōveepi 28:9.

ʻI he taimi ʻo e Tohi Tapú, naʻe ʻikai ke tali ʻe he ʻOtuá ʻa e faʻahinga ko ia naʻa nau siʻaki ʻene ngaahi lao māʻoniʻoní. (ʻAisea 1:15, 16) Kuo ʻikai liliu ʻene ngaahi ongoʻí. (Malakai 3:6) Kapau ʻoku tau loto ke tali ʻe he ʻOtuá ʻetau lotú, kuo pau ke tau feinga ke moʻui ʻo fehoanaki mo ʻene ngaahi laó. Kae fēfē kapau naʻa tau fai ʻa e ngaahi fehālaaki ʻi he kuohilí? ʻOku ʻuhinga iá heʻikai ʻaupito ke fanongo mai ʻa e ʻOtuá kiate kitautolu? ʻIkai ʻaupito! ʻE fakamolemoleʻi anga-ʻofa kitautolu ʻe he ʻOtuá kapau te tau tafoki pea fai hotau lelei tahá ke fakahōifuaʻi ia.​—Ngāue 3:19.