FOUNGA KE FAKANGATA AI ʻA E TUPULAKI ʻA E TĀUFEHIʻÁ

1 | Hoko ʻO Taʻefilifilimānako

Akonaki ʻa e Tohi Tapú:

“ʻOku ʻikai ke filifilimānako ʻa e ʻOtuá, ka ʻi he puleʻanga kotoa pē, ko e [tokotaha kotoa] ko ia ʻoku manavahē kiate ia mo fai ʻa e meʻa ʻoku totonú, ʻokú ne tali ia.”—NGĀUE 10:34, 35.

Ko Hono ʻUhingá:

Ko Sihovaa ko e ʻOtuá ʻoku ʻikai ke ne fakamāuʻi kitautolu ʻo makatuʻunga ʻi hotau fonuá, matakalí, lanu hotau kilí pe anga fakafonuá. ʻI hono kehé, ʻokú ne tokangataha ki he meʻa ʻoku mahuʻinga moʻoní—ko hotau tangata ʻi lotó. Ko e moʻoni, “ʻoku sio ʻa e tangatá pē ki he meʻa ʻoku hā ki he matá, ka ʻoku sio ʻa Sihova ia ki he lotó.”—1 Sāmiuela 16:7.

Meʻa ʻe Lava Ke Ke Faí:

Neongo ʻoku ʻikai lava ke tau sio ki he lotó, ʻe lava ke tau faʻifaʻitaki ki he ʻOtuá pea vakai taʻefilifilimānako ki he niʻihi kehé. Feinga ke vakai ki he kakaí ʻi honau tuʻunga fakatāutahá kae ʻikai ko ha kulupu. Kapau ʻokú ke ongoʻi ʻokú ke maʻu ha ngaahi ongoʻi ʻikai lelei ki he niʻihi kehé—mahalo ko e faʻahinga mei ha matakali pe fonua kehe—lotu ki he ʻOtuá ʻo kole ange kiate ia ke ne tokoniʻi koe ke taʻakifuʻu ʻa e ngaahi ongoʻi ko iá. (Saame 139:23, 24) Kapau ʻokú ke kole loto-moʻoni kia Sihova ke ne ʻoatu kiate koe ʻa e mālohi ke hoko ʻo taʻefilifilimānako, ʻoku lava ke ke fakapapauʻi te ne fanongo ki hoʻo lotú pea tokoniʻi koe.—1 Pita 3:12.

a Ko Sihova ʻa e huafa fakafoʻituitui ʻo e ʻOtuá.—Saame 83:18.

“Kuo teʻeki ai ʻaupito ke u tangutu melino mo ha pālangi . . . Naʻá ku hoko he taimi ko ení ko e konga ʻo ha fetokouaʻaki fakavahaʻapuleʻanga moʻoni.”—TITUS

Hokosia Moʻoni—TITUS

Ikuʻi ʻa e Tāufehiʻá

Naʻe hoko ʻa Titus ko ha mēmipa ʻo ha kengi fakamālohi ʻa ia naʻa nau ʻita ʻi he ngaahi lao lau-lanu fakamaau taʻetotonu. ʻOkú ne pehē: “Naʻa mau ʻalu ki he ngaahi feituʻu ʻi he koló naʻe ʻikai talitali lelei ai ʻa e kau ʻuliʻulí, hangē ko e ngaahi hōtelé mo e paá, ke fakalanga fuhu pē.” ʻOku fakahaaʻi ʻe Titus naʻe ueʻi ia ʻe he tāufehiʻá, pea ʻokú ne toe pehē: “Kapau naʻá ku kau ki ha fakafekiki mo ha taha, tangata pe fefine, ko au maʻu pē naʻá ku ʻuluaki tukí.”

Naʻe kamata ke liliu ʻa Titus ʻi heʻene ako ʻa e Tohi Tapú mo e Kau Fakamoʻoni ʻa Sihová. ʻI he taimi naʻá ne lau ai ʻa e Tohi Tapú, naʻe maongo moʻoni ia kiate ia. Naʻe ueʻi moʻoni ia ʻe he talaʻofa fekauʻaki mo ha māmani ʻi he kahaʻú ʻa ia “ʻe ʻikai ke toe ʻi ai ha mate, pe ha mamahi pe ha tangi pe ha langa.”—Fakahā 21:3, 4.

ʻI he kamatá, naʻe fāinga ʻa Titus ke taʻakifuʻu ʻa e tāufehiʻá mei hono lotó. “Naʻe faingataʻa ʻaupito ke liliu ʻa e anga ʻo ʻeku fakakaukaú mo e tōʻongá,” ko ʻene leá ia. Ka naʻe tokoniʻi ia ʻe he meʻa naʻá ne ako mei he Ngāue 10:34, 35, ʻa ia ʻoku fakamatalaʻi ai ko e ʻOtuá ʻoku ʻikai ke filifilimānako.

Ko e hā ʻa e olá? ʻOku fakamatala ʻa Titus: “Naʻá ku hoko ʻo tuipau ʻoku ngāueʻi ʻe he Kau Fakamoʻoni ʻa Sihová ʻa e lotu moʻoní ʻi heʻeku sio ki he ʻofa naʻe hā mahino ʻi honau lotolotongá, ʻo tatau ai pē pe ko e hā honau matakalí pe lanu ʻo e kilí. Naʻa mo e ki muʻa ke u papitaiso ʻo hoko ko ha Fakamoʻoní, naʻe fakaafeʻi au ʻe ha mēmipa pālangi ʻo e fakatahaʻangá ki hono falé ke kai mo ia. Naʻe hangē ia ha misí. Kuo teʻeki ai ʻaupito ke u tangutu melino mo ha pālangi, tuku kehe ange ʻa e kai mo ia ʻi hono ʻapí. Naʻá ku hoko he taimi ko ení ko e konga ʻo ha fetokouaʻaki fakavahaʻapuleʻanga moʻoni.”