FOUNGA KE FAKANGATA AI ʻA E TUPULAKI ʻA E TĀUFEHIʻÁ

3 | Toʻo Atu Mei Ho ʻAtamaí ʻA e Tāufehiʻá

Akonaki ʻa e Tohi Tapú:

“Ke fai homou liliú ʻaki hono fakafoʻou homou ʻatamaí, koeʻuhi ke mou lava ʻo fakamoʻoniʻi kiate kimoutolu ʻa e finangalo lelei mo fakahōifua mo haohaoa ʻo e ʻOtuá.”—LOMA 12:2.

Ko Hono ʻUhingá:

Ko e anga ʻo ʻetau fakakaukaú ʻoku mahuʻinga ki he ʻOtuá. (Selemaia 17:10) Ko e moʻoni ʻoku totonu ke tau fakaʻehiʻehi mei hono leaʻaki pe fai ha meʻa fakatupu tāufehiʻa, ka ʻoku fiemaʻu ke tau fai ʻa e meʻa lahi ange ai. Ko e tāufehiʻá ʻoku kamata ia mei he ʻatamaí mo e lotó. Ko ia ai, kuo pau ke tau taʻakifuʻu ha fakaʻilonga pē ʻo e tāufehiʻá mei heʻetau fakakaukaú mo e ngaahi ongoʻí. Ko e toki taimi ia ʻe lava moʻoni ai ke fai hotau “liliú” pea fakangata ʻa e tupulaki ʻa e tāufehiʻá.

Meʻa ʻe Lava Ke Ke Faí:

Sivisiviʻi faitotonu ʻa e anga hoʻo fakakaukau mo e ongoʻi fekauʻaki mo e niʻihi kehé—tautefito ki he faʻahinga mei ha matakali pe fonua kehe. ʻEke hifo kiate koe: ‘ʻOku anga-fēfē ʻeku vakai kiate kinautolú? ʻOku makatuʻunga ʻeku fakakaukaú ʻi he meʻa ʻoku ou ʻiloʻi fekauʻaki mo kinautolú? Pe ʻoku makatuʻunga ia ʻi he tomuʻa fehiʻá?’ Fakaʻehiʻehi mei he mītia fakasōsiale, faiva pe fakafiefia ʻoku hā ai ʻa e tāufehiʻá mo e fakamālohí.

Ko e Folofola ʻa e ʻOtuá ʻoku lava ke ne tokoniʻi kitautolu ke ikuʻi ʻa e tāufehiʻa ʻi hotau lotó mo e ʻatamaí

ʻOku ʻikai ke faingofua maʻu pē ke sivisiviʻi faitotonu ʻetau ngaahi fakakaukaú mo e ongoʻí. Ka ko e Folofola ʻa e ʻOtuá ʻe lava ke ne tokoniʻi kitautolu ke “vavanga ki he ngaahi fakakaukau mo e ngaahi taumuʻa ʻo e lotó.” (Hepelū 4:12) Ko ia hokohoko atu hono vakaiʻi ʻa e Tohi Tapú. Fakahoa ʻene ngaahi akonakí mo hoʻo fakakaukaú, pea fai ho lelei tahá ke fakatonutonu hoʻo fakakaukaú ki he meʻa ʻoku akoʻi ʻe he Tohi Tapú. Ko e Folofola ʻa e ʻOtuá ʻoku lava ke ne tokoniʻi kitautolu ke ikuʻi ʻa e tāufehiʻa “ʻoku mālohi hangē ha ngaahi kolotaú” ʻi hotau ʻatamaí mo e lotó.—2 Kolinitō 10:4, 5.

Hokosia Moʻoni—STEPHEN

Liliu ʻa e Anga ʻEne Fakakaukaú

Ko Stephen mo e ngaahi mēmipa hono fāmilí naʻa nau hokosia ʻa e tāufehiʻa mei he kau pālangí. Ko hono olá, naʻe tākiekina ia ʻe ha kulupu fakapolitikale ʻa ia naʻa nau fakafepakiʻi fakakautau ʻa e ngaahi ʻīsiu ki he totonu ʻa e tangatá. ʻI he faai atu ʻa e taimí, naʻá ne kau ʻi he ngaahi faihia tupu mei he tāufehiʻá. ʻOku pehē ʻe Stephen: “ʻI he taimi ʻe niʻihi, naʻá ku ʻalu mo hoku ngaahi kaumeʻá ʻo sio ʻi he faiva naʻe hā ai hono ngaohikoviʻi ʻa e kau pōpula ʻAfiliká ʻi ʻAmelika. ʻI he ʻita lahi he ngaahi fakamaau taʻetotonu ko iá, naʻa mau haha ʻa e toʻutupu pālangi naʻe ʻi he fale faivá. Naʻa mau ʻalu leva ki he ngaahi kaungāʻapi pālangí, ʻo kumi ha kakai tokolahi ange ke haha.”

Ko e fakakaukau ʻa Stephen naʻe liliu fakaʻaufuli ʻi he taimi naʻá ne kamata ako ai ʻa e Tohi Tapú mo e Kau Fakamoʻoni ʻa Sihová. ʻOkú ne manatu: “ʻI heʻeku siotonu ʻi he lahi ʻo e tomuʻa fehiʻa fakamatakalí, naʻá ku ʻohovale ʻi he ngaahi meʻa ʻoku ou sio ai ʻi he lotolotonga ʻo e Kau Fakamoʻoní. Ko e fakatātaá, ʻi he folau ha Fakamoʻoni pālangi ki ha fonua muli, naʻe tuku ʻene fānaú ke tokangaʻi ʻe ha fāmili ʻuliʻuli. Pehē foki, naʻe ʻave ʻe ha fāmili pālangi ki honau ʻapí ha toʻutupu ʻuliʻuli naʻá ne fiemaʻu ha feituʻu ke nofo ai.” Naʻe tuipau ʻa Stephen ko e Kau Fakamoʻoni ʻa Sihová ko e fetokouaʻaki anga-ʻofa ia naʻe tomuʻa tala ʻe Sīsū ʻe ʻi he lotolotonga ʻo e kau Kalisitiane moʻoní.—Sione 13:35.

Ko e hā naʻá ne ʻai ke malava ʻa Stephen ʻo liʻaki ʻene ngaahi tōʻonga tāufehiʻá? Ko e Loma 12:2 naʻá ne tokoniʻi iá. ʻOkú ne pehē: “Naʻe kamata ke u ʻiloʻi ai naʻe fiemaʻu ke liliu ʻeku fakakaukaú. Naʻe pau ke u fakafoʻou hoku ʻatamaí koeʻuhí ke ʻoua ʻe ngata pē ʻi heʻeku hoko ʻo fakamelinó kae toe sio ko e founga moʻui lelei tahá eni.” Kuo maʻu ʻe Stephen he taimí ni ha moʻui ʻoku ʻatā mei he ngaahi ongoʻi tāufehiʻá ʻo laka hake ʻi he taʻu ʻe 40.