FOUNGA KE FAKANGATA AI ʻA E TUPULAKI ʻA E TĀUFEHIʻÁ

2 | ʻOua ʻE Faisāuni

Akonaki ʻa e Tohi Tapú:

“ʻOua ʻe fetongi ʻa e koví ʻaki ʻa e kovi ki ha taha. . . . ʻO ka ala lava, ʻo fakatatau ki he lahi taha ʻo hoʻomou malavá, mou nofo melino mo e tangata kotoa pē. ʻOua te mou faisāuni maʻamoutolu, . . . he kuo tohi: ‘“Ko e sāuní ʻoku ʻaʻaku ia; te u fai ʻe au ʻa e totongi fakafokí,” ko e folofola ia ʻa Sihová.’”—LOMA 12:17-19.

Ko Hono ʻUhingá:

Neongo ʻoku fakanatula ke ongoʻi ʻita ʻi he taimi ʻoku faihala mai ai ha taha, ʻoku ʻikai ke tali ʻe he ʻOtuá ke tau faisāuni. ʻI hono kehé, ʻokú ne ekinaki mai ke tau tatali kiate ia koeʻuhí ʻoku vavé ni ke ne fakatonutonu ʻa e faihala kotoa pē.—Saame 37:7, 10.

Meʻa ʻe Lava Ke Ke Faí:

ʻI he taimi ʻoku faisāuni ai ʻa e tangata taʻehaohaoá, ʻoku ʻai ai ke toe tupulaki ʻa e tāufehiʻá. Ko ia ai, kapau kuo fakaʻitaʻi koe ʻe ha taha pe fai atu ha kovi kiate koe, ʻoua ʻe faisāuni. Feinga ke tali ʻi he melino pea mapuleʻi-kita. ʻI he ngaahi tuʻunga ʻe niʻihi, ko e lelei tahá ke tukunoaʻi ʻa e meʻa naʻe hokó. (Palōveepi 19:11) Ka ʻi he tuʻunga ʻe niʻihi, ʻoku hā mahino ʻe lelei ange nai ke ke fai ha ngāue ki he meʻa naʻe hokó. Ko e fakatātaá, ʻi he ngaahi tuʻunga ʻoku maʻukovia ai koe ʻi ha faihia, te ke fili nai ke līpooti ʻa e faihiá ki he kau polisí pe ki ha kau maʻu mafai kehe.

Ko e faisāuní ʻoku fakatuʻutāmaki pē kia kita

Fēfē kapau ʻoku hā ngali ʻoku ʻikai ke ʻi ai ha founga melino ke fakaleleiʻi ai ʻa e palopalemá? Pe fēfē kapau kuó ke fai ʻa e meʻa kotoa ʻokú ke malavá ke fakaleleiʻi ia ʻi ha founga melino? ʻOua ʻe faisāuni. ʻOku ngalingali ʻe ʻai ai ke toe kovi ange ʻa e tuʻungá. ʻI hono kehé, fakangata ʻa e tupulaki ʻa e tāufehiʻá. ʻE lava ke ke ako ke falala ki he founga hono fakaleleiʻi ʻe he ʻOtuá ʻa e palopalemá. “Falala kiate ia, pea te ne fai ha meʻa maʻau.”—Saame 37:3-5.

Hokosia Moʻoni—ADRIÁN

Ikuʻi ʻa e Ngaahi Ongoʻi ke Faisāuní

ʻI he taʻu hongofulu tupu ʻa Adrián naʻá ne hoko ko ha tokotaha tāufehiʻa faisāuni ʻo faʻa fuhu ʻi he halá. ʻOkú ne pehē: “Naʻá ku faʻa kau ʻi he tau fana, pea ʻi he taimi lahi naʻe faʻa liʻaki au ke mate ʻi he halá ʻoku ou toto ʻatā.”

Naʻe kamata ke ako ʻe Adrián ʻa e Tohi Tapú ʻi heʻene taʻu 16. ʻOkú ne pehē: “ʻI he fakalakalaka ʻeku ako Tohi Tapú, naʻá ku ʻiloʻi ai ʻa e fiemaʻu ke fai ha ngaahi liliu ʻi hoku angaʻitangatá.” Naʻe fiemaʻu ke ne tuku ange ʻa e tāufehiʻá pea tuku ʻa e tōʻonga fakamālohí. Naʻe tautefito ʻene houngaʻiá ʻi he meʻa naʻá ne ako ʻi he Loma 12:17-19 fekauʻaki mo e ʻoua ʻe faisāuní. ʻOkú ne pehē: “Naʻá ku tui ʻe fakaleleiʻi ʻe Sihova ʻa e fakamaau taʻetotonú ʻi he founga mo e taimi pē ʻaʻana. Faai atu pē ʻa e taimí, naʻá ku ikuʻi ʻeku founga moʻui fakamālohí.”

ʻI he efiafi ʻe taha, naʻe ʻohofi ʻa Adrián ʻe ha kau kengi. Naʻe kaila mai ʻa e takí: “Kumi haʻo moʻui!” ʻOku pehē ʻe Adrián: “Naʻá ku loto-lahi ke ʻoho atu.” Ka ʻi he ʻikai ke faisāuní, naʻá ne lotu nounou kia Sihova pea mavahe leva.

ʻOku toe pehē ʻe Adrián: “ʻI he ʻaho ʻe tahá, naʻá ku fetaulaki mo e taki e kau kengí. Naʻá ku ʻita peá u loto ke u taaʻi ka naʻá ku toe kole fakalongolongo kia Sihova ke tokoniʻi au ke u mapuleʻi-kita. Naʻá ku ʻohovale ʻi heʻene haʻu ʻo pehē mai: ‘Fakamolemoleʻi au ki he meʻa naʻe hoko ʻanepoó. Ko hono moʻoní, ʻoku ou loto ke u hangē ko koé. ʻOku ou fie ako ʻa e Tohi Tapú.’ He fiefia ē ka ko au ʻi heʻeku lava ʻo mapuleʻi ʻeku ʻitá! Naʻá ku fakamālō ʻi he meʻá ni, ko ia naʻe kamata ke ma ako ʻa e Tohi Tapú.”