FOUNGA KE FAKANGATA AI ʻA E TUPULAKI ʻA E TĀUFEHIʻÁ

4 | Ikunaʻi ʻA e Tāufehiʻá ʻI he Tokoni ʻA e ʻOtuá

Akonaki ʻa e Tohi Tapú:

“Ko e fua ʻo e laumālié ko e ʻofa, fiefia, melino, kātaki, anga-lelei, lelei, tui, anga-malū, mapuleʻi-kita.”—KALĒTIA 5:22, 23.

Ko Hono ʻUhingá:

Ko hono fakangata ʻa e tupulaki ʻa e tāufehiʻá ʻoku malava ia fakafou ʻi he tokoni ʻa e ʻOtuá. Ko hono laumālie māʻoniʻoní ʻe lava ke ne fakatupulekina ʻiate kitautolu ʻa e ʻulungaanga heʻikai ʻaupito ke tau maʻu ʻiate kitautolu pē. Ko ia ʻi he ʻikai feinga ke ikuʻi ʻa e tāufehiʻá ʻi he mālohi pē ʻotautolú, ʻoku lelei ke tau falala ki he tokoni mei he ʻOtuá. Kapau te tau fai pehē, ʻe lava ke tau maʻu ʻa e hokosia tatau mo e ʻapositolo ko Paulá, ʻa ia naʻá ne tohi: “Oku ou malava ʻa e meʻa kotoa pē koeʻuhi ʻoku ou maʻu ʻa e ivi fakafou ʻi he tokotaha ko ia ʻokú ne ʻomai kiate au ʻa e mālohí.” (Filipai 4:13) Ko e moʻoni, ʻe malava ke tau lea ʻo pehē: “ʻOku haʻu ʻa hoku tokoní meia Sihova.”—Saame 121:2.

Meʻa ʻe Lava Ke Ke Faí:

“Kuo liliuʻi au ʻe Sihova mei ha tangata anga-fakamālohi ki ha tokotaha fakamelino.”—WALDO

Lotu kia Sihova, ʻo kole loto-moʻoni kiate ia ki hono laumālie māʻoniʻoní. (Luke 11:13) Kole ange ke ne tokoniʻi koe ke fakahāhā ʻa e ngaahi ʻulungaanga fakaʻotuá ʻi hoʻo moʻuí. Ako ki he meʻa ʻoku leaʻaki ʻe he Tohi Tapú fekauʻaki mo e ngaahi ʻulungaanga te ne ikuʻi ʻa e tāufehiʻá, hangē ko e ʻofa, melino, kātaki mo e mapuleʻi-kita. Kumi ki he ngaahi founga ke fakatupulekina ai ʻa e ngaahi ʻulungaanga ko iá ʻi hoʻo moʻuí tonu. Pea feohi mo e faʻahinga ʻoku nau feinga ke fakatupulekina ʻa e ngaahi ʻulungaanga ko iá. Ko e faʻahinga peheé ʻe lava ke nau “ueʻi ai [koe] ki he ʻofá mo e ngaahi ngāue leleí.”—Hepelū 10:24; fakamatala ʻi lalo.

Hokosia Moʻoni—WALDO

Ikunaʻi ʻa e Fakamālohi Tupu mei he Tāufehiʻá

Ko Waldo naʻá ne tupu hake ʻi ha ʻātakai fakamālohi ʻo ne ʻai ai ke ne fonu ʻi he tāufehiʻa. ʻOkú ne pehē: “Naʻá ku kau maʻu pē ʻi he ngaahi fuhu ʻi he hala puleʻangá mo e kau tila faitoʻo kona tapú . . . ʻI ha taimi ʻe taha, naʻe totongi ʻe ha kau kengi ʻe taha naʻa mau feʻauʻauhi ha tokotaha ʻiloa ʻi he sinaipá ke ne tāmateʻi au, ka naʻe malava ke u hao neongo naʻá ku lavea.”

Naʻe ʻikai fiefia ʻa Waldo ʻi he kamata ke ako ʻe hono uaifí ʻa e Tohi Tapú mo e Kau Fakamoʻoni ʻa Sihová. ʻOkú ne pehē: “Naʻá ku fehiʻa ʻi he Kau Fakamoʻoní, pea ʻi he taimi lahi naʻá ku kaikaila ʻo leakoviʻi kinautolu. Ka naʻa nau fakafeangai melino maʻu pē.”

Naʻe faai atu pē ʻo kamata ako Tohi Tapu mo Waldo. ʻOkú ne pehē: “Naʻe ʻikai faingofua ke u ngāueʻaki ʻa e meʻa naʻá ku akó. Naʻá ku tuipau ʻe ʻikai ʻaupito ke malava ke u mapuleʻi ʻa ʻeku ʻita anga-fakamālohí.” Ka naʻe ʻi ai ha meʻa naʻá ne ako mei he Tohi Tapú naʻe maongo moʻoni kiate ia.

ʻOku fakamatala ʻa Waldo: “ʻI he ʻaho ʻe taha, ko ʻeku tokotaha faiakó, ʻa Alejandro, naʻá ne kole mai ke u lau ʻa e Kalētia 5:22, 23. . . . Naʻe fakamatala ʻe Alejandro ko ʻeku fakatupulekina ʻa e ngaahi ʻulungaanga ko iá naʻe ʻikai ke fakatuʻunga ia ʻi hoku mālohi pē ʻoʻokú ka ʻi hono kehé, ko e laumālie māʻoniʻoni ia ʻo e ʻOtuá. Ko e moʻoni ko iá naʻá ne liliu fakaʻaufuli ʻa ʻeku fakakaukaú!”

ʻI he falala ki he tokoni ʻa e ʻOtuá, naʻe fakangata lavameʻa ʻe Waldo ʻa e tupulaki ʻa e tāufehiʻá ʻi heʻene moʻuí. ʻOkú ne pehē: “Ko hoku kāingá mo e ngaahi kaungāmeʻa ki muʻá naʻe ʻikai malava ke nau tui ki he liliu lahi naʻá ku faí.” ʻOkú ne toe pehē: “Kuo liliuʻi au ʻe Sihova mei ha tangata anga-fakamālohi ki ha tokotaha fakamelino.”