Kau Kalisitiané mo e Taú—Ko e Hā ʻa e Lau ʻa e Tohi Tapú?

Hangē ko ia kuo fakahaaʻi mahino ʻi he tau ʻi ʻIukalainé, ko e kau taki lotu faka-Kalisitiane tokolahi ʻoku nau pouaki longomoʻui ʻa e taú. Fakatokangaʻi ʻa e anga hono poupouʻi ʻe he haʻa faifekaú ʻa e ongo tafaʻaki ʻo e taú:

• “He fakaʻapaʻapa mo e houngaʻia lahi ē ki he kotoa ʻetau kau tau ʻoku nau maluʻi honau fonua tupuʻanga ko ʻIukalainé mei he filí . . . ʻOku ʻiate kimoutolu maʻu pē homau lotó, ko ʻemau lotu loto-moʻoní mo e poupoú.”​—Metropolitan Epiphanius I ʻo Kyiv, hangē ko ia ʻoku fakamatalaʻi ʻi he The Jerusalem Post, Maʻasi 16, 2022.

• “Ko e taki ʻo e Siasi ʻOfotokisī ʻo Lūsiá naʻá ne fai ha ouau lotu maʻá e kau sōtia Lūsiá ʻi he Sāpaté ʻo ne fakalototoʻaʻi ai kinautolu ke nau maluʻi honau fonuá ‘he ko e kau Lūsiá pē te nau lava ʻo fai iá’ ʻi he hokohoko atu ko ia ke fakahoko ʻe Mosikou ʻenau kemipeini fakakautau ʻi ʻIukalainé.”​—Reuters, ʻEpeleli 3, 2022.

ʻOku totonu ke kau ʻa e kau Kalisitiané ʻi he taú? Ko e hā ʻa e lau ʻa e Tohi Tapú?

Meʻa ʻoku leaʻaki moʻoni ʻe he Tohi Tapú

ʻOku fakahaaʻi ʻi he Tohi Tapú ko e faʻahinga ʻoku nau muimui moʻoni kia Sīsū Kalaisí ʻoku ʻikai ke nau kau ʻi he taú.

• “Fakafoki hoʻo heletaá ki hono ʻaiʻangá, he ko kinautolu kotoa ʻoku nau toʻo ʻa e heletaá te nau ʻauha ʻi he heletaá.”​—Mātiu 26:52.

  Ko ha tokotaha ʻoku poupou ki he taú pe kau ʻi he taú ʻokú ne talangofua moʻoni koā ki he ngaahi lea ʻa Sīsuú?

• “ʻOku ou ʻoatu ha fekau foʻou kiate kimoutolu, ke mou feʻofaʻaki; hangē tofu pē ko ʻeku ʻofaʻi kimoutolú, ke mou feʻofaʻaki foki. Ko e meʻa eni ʻe ʻilo ai ʻe he faʻahinga kotoa ko ʻeku kau ākonga kimoutolú​—ʻo kapau ʻoku mou maʻu ʻa e ʻofá ʻi homou lotolotongá.”​—Sione 13:34, 35.

  Ko ha tokotaha ʻoku poupou ki he taú ʻokú ne fakahāhā ʻa e faʻahinga ʻofa naʻe leaʻaki ʻe Sīsū ʻe ʻiloʻiʻaki ʻene kau ākongá pe kau muimuí?

Ki ha fakamatala lahi ange, lau ʻa e kupu “ʻOku Hoa ʻa e Taú mo e Lotu Kalisitiané?”

Kau Kalisitiané mo e taú ʻi he ʻahó ni

ʻOku totonu ki he kau Kalisitiané ke nau fakaʻehiʻehi mei he taú he ʻahó ni? ʻIo. Naʻe tomuʻa tala ʻe he Tohi Tapú ʻi hotau taimí, ʻa ia ko e vahaʻa taimi ʻoku ui ko e “ngaahi ʻaho fakaʻosí,” ʻe ʻi ai ʻa e kakai mei he ngaahi puleʻanga kotoa pē ʻe ʻikai “te nau toe ako tau,” ʻo fehoanaki ia mo e ngaahi akonaki ʻa Sīsuú.​—ʻAisea 2:2, 4, fakamatala ʻi lalo.

• Ke ako lahi ange, lau ʻa e kupu hokohoko ʻi he Taua Leʻo ʻoku fakakaveinga “Fēfē Vakai ʻa e ʻOtuá ki he Taú?”

Ko Sihova,a ʻa e “ʻOtua ʻo e melinó,” ʻoku vavé ni ke ne ngāueʻaki ʻene founga-pule fakahēvaní ke ne fakahaofi ʻa e kakaí “mei he fakafeʻātungiá pea mei he fakamālohí.”​—Filipai 4:9; Saame 72:14.

• Ke sio ki he foungá, mamata ʻi he vitiō Ko e Hā ʻa e Puleʻanga ʻo e ʻOtuá?