Fakatokanga ʻa e Kau Politikí Fekauʻaki mo ʻĀmaketone​—Ko e Hā ʻa e Lau ʻa e Tohi Tapú?

ʻI he pongipongi Mōnite, ʻOkatopa 10, 2022, naʻe fana misaile ʻe Lūsia ha ngaahi kolo ʻi ʻIukalaine ko ʻenau sāuniʻi ia ha fakapā pomu ʻi he ʻaho ʻe ua ki muʻá ʻa ia naʻe maumau ai ʻa e hala fakakavakava ʻokú ne fakafehokotaki ʻa Kulimia mo Lūsiá. Ko e hili atu pē eni mei ha ngaahi fakatokanga ʻa e kau politikí ʻoku ngalingali te tau fehangahangai mo ʻĀmaketone.

• “Kuo teʻeki ai ke tau ofi peheni ke hoko ʻa ʻĀmaketone talu mei he [Palesiteni ʻo ʻAmelika ko John F.] Kennedy mo e Cuban Missile Crisis. . . . ʻOku ʻikai ke u tui ʻoku malava ke ngāueʻaki ha naunau tau fakaniukilia ʻo ʻikai fakatupunga ai ke hoko ʻa ʻĀmaketone.”​—Palesiteni ʻo ʻAmelika ko Joe Biden, ʻOkatopa 6, 2022.

• “ʻOku ou tui ʻoku vavé ni ke tau fehangahangai mo ʻĀmaketone, ʻe fakatuʻutāmaki ia ki he māmaní kotoa.”​—Palesiteni ʻo ʻIukalaine ko Volodymyr Zelensky, ʻi he ʻeke ange ʻa e ngaahi nunuʻa hono ngāueʻaki ʻa e ngaahi naunau tau fakaniukiliá, Ongoongo BBC, ʻOkatopa 8, 2022.

ʻE malava nai ke hoko hono ngāueʻaki ʻa e ngaahi naunau tau fakaniukiliá ʻo taki atu ki ʻĀmaketone? Ko e hā ʻa e lau ʻa e Tohi Tapú?

ʻE fakatupunga ʻe he ngaahi naunau tau fakaniukiliá ʻa ʻĀmaketone?

ʻIkai. Ko e foʻi lea “ʻĀmaketone” ʻoku hā tuʻo taha pē ʻi he Tohi Tapú ʻi he Fakahā 16:16. ʻOku ʻikai ʻuhinga ia ki ha faitau ʻa e ngaahi puleʻangá ka ʻoku ʻuhinga iá ki ha tau ʻi he vahaʻa ʻo e ʻOtuá pea mo e “ngaahi tuʻi ʻo e māmani kotoa kuo nofoʻí.” (Fakahā 16:14) ʻE ngāueʻaki ʻe he ʻOtuá ʻa e tau ʻo ʻĀmaketoné ke fakangata ʻa e ngaahi founga-pule fakaetangatá.​—Taniela 2:44.

Ke ako lahi ange fekauʻaki mo e meʻa ʻe hoko ki he māmaní ʻi ʻĀmaketoné, lau ʻa e kupu Ko e Hā ʻa e Tau ʻo ʻĀmaketoné?

ʻE fakaʻauha ʻa e foʻi māmaní mo e faʻahinga ʻoku nofo aí ʻi ha tau fakaniukilia?

ʻIkai. Neongo ʻe ngāueʻaki nai ʻe he kau pule fakaetangatá ha ngaahi naunau tau fakaniukilia ʻi he kahaʻú, ʻe ʻikai ke fakaʻatā ʻe he ʻOtuá ke fakaʻauha ʻa e foʻi māmaní. ʻOku pehē ʻe he Tohi Tapú:

• “ʻOku kei tuʻu ai pē ʻa e foʻi māmaní ʻo taʻengata.”​—Tangata Malanga 1:4.

• “Ko e kau māʻoniʻoní te nau maʻu ʻa e māmaní, pea te nau nofo ai ʻo taʻengata.”​—Saame 37:29.

Kae kehe, ʻoku fakahaaʻi mai ʻe he kikite Fakatohitapú mo e ngaahi meʻa ʻoku lolotonga hokó ʻoku vavé ni ke tau hokosia ha liliu fakaʻaufuli ʻi he hisitōlia ʻo e tangatá. (Mātiu 24:3-7; 2 Tīmote 3:1-5) Fekumi ki he meʻa ʻoku leaʻaki ʻe he Tohi Tapú fekauʻaki mo e kahaʻú fakafou ʻi heʻemau ako Tohi Tapu fetalanoaʻaki taʻetotongí.