Tupulaki ʻa e Hulutuʻa ʻo e Taʻelatá​—Meʻa ʻOku Leaʻaki ʻe he Tohi Tapú

Fakatatau ki ha līpooti fakamāmanilahi ki muí ni mai,a ʻoku fakafuofua ki he toko taha ʻi he toko fā ʻoku nau ongoʻi taʻelata.

• “Ko e fakamavaheʻi fakasōsialé ʻoku lava ke ne uesia ha faʻahinga tokotaha pē, ʻo tatau ai pē pe ko e hā hono taʻumotuʻá pe feituʻu ʻoku haʻu mei aí.”​​—Chido Mpemba, ko e sea ʻo e World Health Organization’s Commission on Social Connection.

ʻI he kehe mei he fakakaukau ʻa e tokolahi, ko e taʻelatá ʻokú ne uesia ʻa e kakai taʻumotuʻá pe faʻahinga ʻoku nau fakamavaheʻi pē kinautolú pea pehē foki ki he faʻahinga kei siʻí, moʻui leleí, lavameʻá, mo ʻosi malí. Ko e fakamavaheʻi fakasōsialé mo e taʻelatá ʻoku lava ke ne uesia moʻoni ʻa e tuʻunga moʻui lelei fakaesino mo fakaeongo ʻa ha tokotaha.

• “Ko e taʻelatá ʻoku kau ki ai ʻa e meʻa lahi ange ʻi he ongoʻi koví pē,” ko e fakahaaʻi ia ʻe he ʻōfisa pule fakafaitoʻo mei ʻAmelika ko Dr. Vivek Murthy. Naʻá ne toe pehē: “Ko e fakatuʻutāmaki ʻo e fakamavaheʻi fakasōsialé pe ʻikai fetuʻutaki mo e niʻihi kehé ʻoku meimei tatau pē ia mo e fakatuʻutāmaki ʻo hono ifi ha foʻi sikaleti ʻe 15 ʻi he ʻaho.”

Meʻa ʻoku leaʻaki ʻe he Tohi Tapú

ʻOku ʻikai loto hotau Tokotaha-Fakatupú ke tau fakamavaheʻi fakasōsiale kitautolu. Ko e taumuʻa maʻu pē ia ʻa e ʻOtuá ke fiefia ʻa e faʻahinga ʻo e tangatá ʻi hono maʻu ha ngaahi kaungāmeʻa lelei.

• Tefitoʻi moʻoni Fakatohitapu: “Naʻe folofola [ʻa e] ʻOtuá: ‘ʻOku ʻikai lelei ki he tangatá ke hokohoko atu ʻene nofo toko tahá.’”​​—Sēnesi 2:18.

ʻOku loto ʻa e ʻOtuá ke tau fakatupulekina ha vahaʻangatae mo ia. ʻOkú ne talaʻofa te ne ʻunuʻunu ofi mai kiate kitautolu ʻi he taimi ʻoku tau feinga ai ke ʻunuʻunu ofi kiate iá.​​—Sēmisi 4:8.

• Tefitoʻi moʻoni Fakatohitapu: “Fiefia ē ko kinautolu ʻoku nau lāuʻilo ki heʻenau fiemaʻu fakalaumālié, he ʻoku ʻonautolu ʻa e Puleʻanga ʻo hēvaní.”​​—Mātiu 5:3.

ʻOku loto ʻa e ʻOtuá ke tau lotu kiate ia fakataha mo e niʻihi kehé. ʻI heʻetau fai peheé, te tau hoko ai ʻo fiefia.

• Tefitoʻi moʻoni Fakatohitapu: “Tuku ke tau fetokangaʻaki koeʻuhi ke fakaʻaiʻai ai kitautolu ki he ʻofá mo e ngaahi ngāue leleí, ʻo ʻoua ʻe liʻaki ʻa ʻetau fakataha fakatahatahá, . . . kae fefakalototoʻaʻaki.”​​—Hepelū 10:24, 25.

Ki ha fakamatala lahi ange fekauʻaki mo e ʻuhinga ʻoku mahuʻinga ai ke faitau mo e taʻelatá, lau ʻa e kupu “Taʻelata ʻi ha Māmani ʻo e Tekinolosiá.”